দোহা, ২৫ নৱেম্বৰ (হি.স.)। ফিফা অনূৰ্ধ্ব-১৭ বিশ্বকাপত এইবাৰ নতুন চেম্পিয়ন লাভ কৰিব। সোমবাৰে অনুষ্ঠিত ছেমি ফাইনেল খেলত পৰ্তুগাল আৰু অষ্ট্ৰিয়াই প্ৰথমবাৰৰ বাবে ফাইনেলত প্ৰৱেশ কৰি ইতিহাস ৰচনা কৰে। পৰ্তুগালে ব্ৰাজিলক ৬-৫ গ’লত পৰাস্ত কৰাৰ বিপৰীতে অষ্ট্ৰিয়াই ইটালীক ২-০ গ’লত পৰাস্ত কৰে।
অষ্ট্ৰিয়াৰ আকৰ্ষণীয় উত্থান অব্যাহত আছে। আন্তঃৰাষ্ট্ৰীয় ফুটবলত অষ্ট্ৰিয়াৰ প্ৰভাৱ ক্ৰমাৎ বৃদ্ধি পাইছে। ২৮ বছৰৰ পাছত ছিনিয়ৰ পুৰুষ দলটোৱে ফিফা বিশ্বকাপৰ বাবে যোগ্যতা অৰ্জন কৰাৰ বিপৰীতে ১৭ বছৰ অনুৰ্ধৰ দলটোৱে নিজৰ আকৰ্ষণীয় দৌৰ অব্যাহত ৰাখি ফাইনেলত প্ৰৱেশ কৰে। তাৰকা ষ্ট্ৰাইকাৰ জোহানেছ ম’জাৰে দুয়োটা গ’ল দিয়ে। প্ৰতিযোগিতাখনৰ সৰ্বাধিক গ’লদাতা (৭খন মেচত ৮টা গ’ল) ম’জাৰে ৫৭ মিনিটত প্ৰথমটো গ’ল দি আঘাতৰ সময়ত সুন্দৰ ফ্ৰী কিকেৰে দ্বিতীয়টো গ’ল সংযোজন কৰে।
পৰ্তুগাল বনাম ব্ৰাজিল: কঠিন যুঁজ
পৰ্তুগাল আৰু ব্ৰাজিলৰ মাজত অনুষ্ঠিত হোৱা দ্বিতীয়খন ছেমি ফাইনেলত ঘনিষ্ঠ প্ৰতিদ্বন্দ্বিতা হয়। গোটেই মেচখনত মাত্ৰ চাৰিটা শ্বটহে লক্ষ্যত আঘাত কৰা হৈছিল, আৰু মুঠ ৩৫টা ফাউল কৰা হৈছিল। চাৰিটা খিতাপ দখল কৰি প্ৰতিযোগিতাখনত আকৰ্ষণীয় অভিলেখ গঢ়িবলৈ সক্ষম হোৱা ব্ৰাজিলে আগতীয়াকৈ অগ্ৰগতি লাভ কৰাৰ চেষ্টা চলাইছিল। উদীয়মান তাৰকা ডেলে কেইবাবাৰো চেষ্টা চলাইছিল যদিও পৰ্তুগালৰ গ’লৰক্ষক ৰোমাৰিয়া কুনহাই বাৰে বাৰে তেওঁক বাধা দিছিল।
নাটকীয় পেনাল্টি শ্বুটআউট: দুয়োটা দলে প্ৰথম চাৰিটা পেনাল্টি সফলতাৰে ৰূপান্তৰিত কৰে। পঞ্চম পেনাল্টিত পৰ্তুগালৰ কুনহাই বাৰৰ ওপৰেৰে শ্বট দিয়ে। ব্ৰাজিলে খেলখনত জয়ী হোৱাৰ সোণালী সুযোগ লাভ কৰিছিল যদিও ৰুৱান পাবলোৰ শ্বটটোৱে পোষ্টত খুন্দা মাৰিছিল। ইয়াৰ পিছতে জোচে নেটোৱে সপ্তম পেনাল্টিৰ পৰা গ’ল দিয়ে আৰু ব্ৰাজিলৰ এঞ্জেলো কেণ্ডিডোৱে মিছ কৰি পৰ্তুগালে প্ৰথমবাৰৰ বাবে ১৭ বছৰ অনুৰ্ধ বিশ্বকাপৰ ফাইনেল নিশ্চিত কৰে।
২৭ নৱেম্বৰত ফাইনেল : ২৭ নৱেম্বৰত ডোহাৰ খলিফা আন্তঃৰাষ্ট্ৰীয় ষ্টেডিয়ামত পৰ্তুগাল আৰু অষ্ট্ৰিয়াৰ মাজত অনুষ্ঠিত হ’ব ফাইনেল। একেদিনাই ডোহাৰ এছপাইৰ একাডেমীত অনুষ্ঠিত হ’ব ব্ৰাজিল আৰু ইটালীৰ মাজত তৃতীয় স্থানৰ বাবে মেচ।
हिन्दुस्थान समाचार / অৰৱিন্দ
