নতুন দিল্লী, ২৫ নৱেম্বৰ (হি.স.)। প্ৰধানমন্ত্ৰী নৰেন্দ্ৰ মোদীয়ে বুধবাৰে হায়দৰাবাদৰ ৰাজীৱ গান্ধী আন্তঃৰাষ্ট্ৰীয় বিমানবন্দৰৰ জিএমআৰ এৰ’স্পেচ এণ্ড ইণ্ডাষ্ট্ৰিয়েল পাৰ্ক (এছইজেড)ত অৱস্থিত চফ্ৰান এয়াৰক্ৰাফ্ট ইঞ্জিন চাৰ্ভিচেছ ইণ্ডিয়া (এছএইএছআই)ৰ সুবিধা ভিডিঅ’ কনফাৰেন্সিঙৰ জৰিয়তে উদ্বোধন কৰিব।
প্ৰধানমন্ত্ৰীৰ কাৰ্যালয়ৰ মতে, এয়াৰবাছ এ৩২০নিঅ’ আৰু বয়িং ৭৩৭ মেক্স বিমানক শক্তি প্ৰদান কৰা লিপ ইঞ্জিনৰ বাবে ছাফ্ৰানৰ নিবেদিত ৰক্ষণাবেক্ষণ, মেৰামতি আৰু অভাৰহ’ল (এম আৰ অ’) সুবিধা বিকশিত কৰা হৈছে। গ্লোবেল ইঞ্জিন অৰিজিনেল ইকুইপমেণ্ট মেনুফেকচাৰে (অ'ইএম) ভাৰতত প্ৰথমবাৰৰ বাবে এম আৰ অ’ অপাৰেচন স্থাপন কৰিছে। এই সুবিধা বিশ্বৰ সৰ্ববৃহৎ বিমানৰ ইঞ্জিন এম আৰ অ’ স্থাপনৰ ভিতৰত অন্যতম হ’ব।
প্ৰায় ১,৩০০ কোটি টকাৰ প্ৰাৰম্ভিক বিনিয়োগেৰে বিকশিত এই অত্যাধুনিক সুবিধাটোৱে ৪৫,০০০ বৰ্গমিটাৰ এলেকাত বিস্তৃত। সম্পূৰ্ণ ক্ষমতা লাভ কৰাৰ লগে লগে ২০৩৫ চনৰ ভিতৰত ই বছৰি প্ৰায় ৩০০টা লিপ ইঞ্জিনৰ সেৱা আগবঢ়াব পাৰিব আৰু ১০০০ৰো অধিক ভাৰতীয় কাৰিকৰী আৰু অভিযন্তাক নিয়োগ কৰিব পাৰিব। এই সুবিধাত উন্নত সঁজুলি ব্যৱহাৰ কৰি বিশ্বমানৰ ইঞ্জিন ৰক্ষণাবেক্ষণ আৰু মেৰামতি সেৱা আগবঢ়োৱা হ’ব।
এই এম আৰ অ’ সুবিধাক বিমান পৰিবহণ খণ্ডত আত্মনিৰ্ভৰশীলতাৰ দিশত এক বৃহৎ পদক্ষেপ হিচাপে বিবেচিত হৈছে। থলুৱা এম আৰ অ’ৰ সামৰ্থ্য বিকাশে বৈদেশিক মুদ্ৰাৰ ব্যয় হ্ৰাস কৰাত সহায় কৰিব, উচ্চ দক্ষতাসম্পন্ন কৰ্মসংস্থাপনৰ সুযোগ বৃদ্ধি কৰিব, যোগান শৃংখল শক্তিশালী কৰিব, আৰু ভাৰতক বিশ্ব বিমান পৰিবহণৰ কেন্দ্ৰ হিচাপে প্ৰতিষ্ঠা কৰিব।
বিমান পৰিবহণ খণ্ডৰ দ্ৰুতগতিত বৃদ্ধি পোৱা প্ৰয়োজনীয়তা পূৰণৰ বাবে চৰকাৰে এক শক্তিশালী এম আৰ অ’ পৰিৱেশ তন্ত্ৰ গঢ়ি তুলিবলৈ কাম কৰি আছে। ২০২৪ চনৰ জি এছ টি সংস্কাৰ, এম আৰ অ’ গাইডলাইন ২০২১, আৰু ৰাষ্ট্ৰীয় অসামৰিক বিমান পৰিবহণ নীতি ২০১৬কে ধৰি কেইবাটাও নীতিগত পদক্ষেপে এম আৰ অ’ প্ৰদানকাৰীৰ বাবে কৰ গাঁথনি যুক্তিসংগত কৰি তোলা আৰু ৰয়েল্টিৰ বোজা হ্ৰাস কৰাত মূল ভূমিকা পালন কৰিছে।
हिन्दुस्थान समाचार / অৰৱিন্দ
