গুৱাহাটী, ২৩ নৱেম্বৰ (হি.স.)। ভাৰত আৰু দক্ষিণ আফ্ৰিকাৰ মাজত অনুষ্ঠিত হোৱা দুখন টেষ্ট শৃংখলাৰ দ্বিতীয়খন টেষ্ট গুৱাহাটীৰ বৰ্ষাপাৰা ক্ৰিকেট ষ্টেডিয়ামত অনুষ্ঠিত হৈছে। টছত জয়ী হৈ প্ৰথমে বেটিং কৰিবলৈ বাছি লোৱা দক্ষিণ আফ্ৰিকাই প্ৰথম ইনিংছত মুঠ ৪৮৯ ৰান সংগ্ৰহ কৰে। দক্ষিণ আফ্ৰিকাৰ হৈ ২০৬ বলত ১০৯ ৰানৰ উজ্জ্বল শতক অৰ্জন কৰে ছেনুৰাণ মুথুছামিয়ে, যিটো তেওঁৰ প্ৰথম টেষ্ট শতক। ভাৰতৰ হৈ স্পিন বলাৰ কুলদীপ যাদৱে সৰ্বাধিক উইকেট দখল কৰি চাৰিটা উইকেট দখল কৰে।

দেওবাৰে দক্ষিণ আফ্ৰিকাই কালি (শনিবাৰে) ২৪৭/৬ স্ক’ৰৰ পৰা পুনৰ খেল আৰম্ভ কৰে। চেনুৰাণ মুথুছামি আৰু কাইল ভেৰেইনে উজ্জ্বল বেটিং কৰে। দ্বিতীয় দিনৰ প্ৰথম অধিবেশনত দুয়োজন বেটছমেনে কোনো উইকেট ৰক্ষা নকৰাত দলটোৰ স্ক’ৰ ৩০০ৰ ওপৰলৈ উঠে।চাহ বিৰতিৰ পিছত ভাৰতীয় স্পিনাৰ ৰবীন্দ্ৰ জাডেজাই কাইল ভেৰেইনক আউট কৰি অংশীদাৰিত্ব ভংগ কৰে। ভেৰেইনে ৪৫ ৰানত আউট হয়। মুথুছামিয়ে আনটো মূৰৰ পৰা ইনিংছ অব্যাহত ৰাখি প্ৰথমটো টেষ্ট শতক অৰ্জন কৰে। মাৰ্কো জান্সেনৰ সৈতে অংশীদাৰিত্বৰে মুথুছামিয়ে ৪০০ৰ ওপৰেৰে স্ক’ৰ কৰে।

মহম্মদ ছিৰাজে মুথুছামীক আউট কৰি ভাৰতক এক বৃহৎ অগ্ৰগতি প্ৰদান কৰিছিল। ২০৬টা বলত ১০টা চাৰি আৰু ২টা ছয়কে ধৰি ১০৯ ৰান সংগ্ৰহ কৰি আউট হৈছিল মুথুছামি। বেগী বলাৰ জছপ্ৰীত বুমৰাহে চাইমন হাৰ্মাৰক বোল্ড কৰি ভাৰতক নৱম উইকেট প্ৰদান কৰে। ছাইমনে ৫ ৰান সংগ্ৰহ কৰে। ইয়াৰ পিছতে কুলদীপ যাদৱে মাৰ্কো জান্সেনক আউট কৰি দক্ষিণ আফ্ৰিকাৰ ইনিংছ সমাপ্ত কৰে। জানচেনে ৯১টা বলত ৯৩ ৰান সংগ্ৰহ কৰে, য’ত ৬টা চাৰি আৰু ৭টা ছয়। ১২ ৰানত অপৰাজিত হৈ থাকে কেশৱ মহাৰাজে।

ইয়াৰ পূৰ্বে শনিবাৰে আইডেন মাৰ্কৰাম আৰু ৰিয়ান ৰিকেলটনে এক সুদৃঢ় আৰম্ভণি কৰিছিল। মাৰ্কৰামে ৩৮ ৰান আৰু ৰিকেলটনে ৩৫ ৰান সংগ্ৰহ কৰে। ৫টা চাৰিৰ সহায়ত ৯২টা বলত ৪১ ৰান সংগ্ৰহ কৰি অধিনায়ক টেম্বা বাভুমা আউট হয়। ইয়াৰ পিছতে ট্ৰিষ্টান ষ্টাবছে চাৰিটা চাৰি আৰু দুটা ছয়ৰ সহায়ত ৪৯ ৰান, উইয়ান মুল্ডাৰে ১৩ ৰান আৰু টনি ডি জিঅৰ্জিয়ে ২৮ ৰান সংগ্ৰহ কৰে।

ভাৰতৰ হৈ স্পিনাৰ কুলদীপ যাদৱে ৪টা উইকেট দখল কৰাৰ বিপৰীতে যশপ্ৰীত বুমৰাহ, মহম্মদ ছিৰাজ, আৰু ৰবীন্দ্ৰ জাদেজাই দুটাকৈ উইকেট দখল কৰে।

দুখন মেচৰ টেষ্ট শৃংখলাত ১-০ ব্যৱধানত আগবাঢ়ি আছে দক্ষিণ আফ্ৰিকা। কলকাতাৰ ইডেন গাৰ্ডেনত অনুষ্ঠিত প্ৰথম টেষ্টত আফ্ৰিকান দলটোৱে ভাৰতীয় দলটোক ৩০ ৰাণত পৰাস্ত কৰিছিল।

हिन्दुस्थान समाचार / অৰৱিন্দ