নতুন দিল্লী, ২২ নৱেম্বৰ (হি.স.)। এক বৃহৎ অভিযান চলাই দিল্লী আৰক্ষীৰ অপৰাধ শাখাই পাকিস্তানৰ চোৰাংচোৱা সংস্থা আই এছ আইৰ সহায়ত আন্তঃৰাষ্ট্ৰীয় অস্ত্ৰ সৰবৰাহৰ চক্ৰ এটা উৎখাত কৰিছে। এই চক্ৰটোৱে ড্ৰ’ন ব্যৱহাৰ কৰি পাকিস্তানৰ পৰা ভাৰতলৈ অত্যাধুনিক বিদেশী পিষ্টল সৰবৰাহ কৰিছিল। এই নেটৱৰ্কৰ সৈতে জড়িত চাৰিটা গুৰুত্বপূৰ্ণ চোৰাংচোৱাক গ্ৰেপ্তাৰ কৰি আৰক্ষীয়ে তেওঁলোকৰ হাতৰ পৰা ১০টা হাই-এণ্ড ছেমি অটোমেটিক পিষ্টল আৰু ৯২টা লাইভ কাৰ্টিজ উদ্ধাৰ কৰে। এই অস্ত্ৰসমূহৰ ভিতৰত আছে বিশেষ বাহিনীয়ে ব্যৱহাৰ কৰা পিএক্স-৫.৭ তুৰ্কী নিৰ্মিত পিষ্টল।
ক্ৰাইম ব্ৰাঞ্চৰ উপ আৰক্ষী আয়ুক্ত সঞ্জীৱ যাদৱে শনিবাৰে কয় যে ক্ৰাইম ব্ৰাঞ্চে ১৯ নৱেম্বৰত তথ্য লাভ কৰিছিল যে দিল্লীৰ ৰোহিনী অঞ্চলত আন্তঃৰাজ্যিক অস্ত্ৰ সৰবৰাহকাৰীয়ে বিদেশী অস্ত্ৰৰ চালান ডেলিভাৰী কৰিবলৈ আহিছিল। এই তথ্যৰ ভিত্তিত পৰিদৰ্শক মান সিং আৰু পৰিদৰ্শক সুন্দৰ গৌতমৰ দলটোৱে ৰোহিনীৰ ২৮ নং ছেক্টৰৰ খাতু শ্যাম মন্দিৰৰ সমীপত ফান্দ পাতিলে। ঘটনাস্থলীত উপস্থিত হয় এখন বগা ৰঙৰ চুইফট ডিজায়াৰ গাড়ী। তালাচী চলাই গাড়ীখনৰ স্পীকাৰ বক্সৰ ভিতৰত লুকুৱাই থোৱা এটা ডাফেল বেগ উদ্ধাৰ কৰে, য’ত আছিল ৮টা বিদেশী নিৰ্মিত পিষ্টল আৰু ৮৪টা কাৰ্টিজ।
আটকাধীন অভিযুক্ত মণিদীপ সিং আৰু দলৱিন্দৰ কুমাৰ বুলি জানিব পৰা গৈছে। সোধা-পোছাৰ সময়ত তেওঁলোকে বিদেশী হেণ্ডলাৰৰ সংস্পৰ্শত থকাৰ লগতে সমগ্ৰ ভাৰতবৰ্ষৰ বিভিন্ন গেঙলৈ অস্ত্ৰ-শস্ত্ৰ যোগান ধৰা বুলি জানিব পৰা গৈছে। তেওঁলোকৰ তথ্যৰ পিছতে আৰু দুজন গেং মেম্বাৰ ৰোহন টোমাৰ আৰু অজয় ওৰফে মনুক গ্ৰেপ্তাৰ কৰা হয়। তেওঁলোকৰ হাতত আৰু দুটা পিষ্টল আৰু ৮টা কাৰ্টিজ উদ্ধাৰ।
পাকিস্তানৰ পৰা ড্ৰোনযোগে যোগান ধৰা হৈছিল
তদন্তত প্ৰকাশ পাইছে যে পাকিস্তানৰ পৰা ড্ৰ’ন যোগে নিশা ভাৰতৰ সীমান্তত অস্ত্ৰ-শস্ত্ৰ নিক্ষেপ কৰা হৈছিল। জিপিএছৰ স্থানৰ ওপৰত ভিত্তি কৰি গেংটোৱে টোপোলাবোৰ তুলি লৈছিল। এই অস্ত্ৰসমূহ ধৰা নপৰিবলৈ কাৰ্বন পেপাৰত মেৰিয়াই থোৱা হৈছিল। বৰ্তমান আমেৰিকাত থকা বিদেশী গেংষ্টাৰ সোণু খাত্ৰী ওৰফে ৰাজেশ কুমাৰৰ নিৰ্দেশত এই গেংটোৱে কাম কৰিছিল। তেওঁৰ সহযোগী জছপ্ৰীত ওৰফে জাছে আই এছ আই সমৰ্থিত মডিউলৰ পৰা অস্ত্ৰ ক্ৰয় কৰিছিল।
গেং সদস্যৰ অপৰাধমূলক পটভূমি
হত্যা, হত্যাৰ চেষ্টা, গেংষ্টাৰ আইন, এনডিপিএছ আইনকে ধৰি কেইবাটাও গোচৰত বিচাৰি থকা হৈছে মনদীপ সিঙক। আৰ্থিক অসুবিধাৰ বাবে দলৱিন্দৰে অস্ত্ৰ সৰবৰাহৰ লগত জড়িত হৈ পৰে। ৰোহন তোমাৰে গগী, ভাউ, নন্দু চক্ৰক অস্ত্ৰ যোগান ধৰি আহিছে। ইয়াৰ পূৰ্বে তেওঁৰ পৰা ১৭টা পিষ্টল আৰু ৭০০টা কাৰ্টিজ উদ্ধাৰ কৰা হৈছিল। মনু নামেৰেও পৰিচিত অজয়ে কেইবাটাও গেঙক অস্ত্ৰ যোগান ধৰিছিল আৰু ইয়াৰ পূৰ্বেও চুৰিৰ গোচৰত গ্ৰেপ্তাৰ হৈছিল।
हिन्दुस्थान समाचार / অৰৱিন্দ
