জোহান্সবাৰ্গ, ২২ নৱেম্বৰ (হি..স.)। দক্ষিণ আফ্ৰিকাৰ জোহান্সবাৰ্গত চলি থকা জি-২০ সন্মিলনত আমেৰিকাই সম্পূৰ্ণৰূপে বৰ্জন কৰাৰ পিছতো অন্যান্য গুৰুত্বপূৰ্ণ নেতাই চূড়ান্ত ঘোষণাৰ খচৰা সফলতাৰে প্ৰস্তুত কৰিছে। অৱশ্যে দেশখনৰ অবিহনে তেনে কৰাৰ সিদ্ধান্তক আমেৰিকাই লজ্জাজনক বুলি অভিহিত কৰিছে।
সংবাদ মাধ্যমৰ বাতৰি অনুসৰি দক্ষিণ আফ্ৰিকাৰ ৰাষ্ট্ৰপতি চাইৰিল ৰামাফোছাই আফ্ৰিকা মহাদেশৰ প্ৰথমখন জি-২০ শীৰ্ষ সন্মিলনক বহুপক্ষীয় কূটনৈতিক বিজয় হিচাপে উপস্থাপন কৰিব বিচাৰিছে। অৱশ্যে আমেৰিকাৰ অনুপস্থিতিয়ে এই কামটো কঠিন কৰি তুলিছে।
কিন্তু কিছুমান ৰাজনৈতিক সূত্ৰৰ মতে আমেৰিকাৰ অনুপস্থিতিৰ ফলত জলবায়ু পৰিৱৰ্তন আৰু উন্নয়নশীল দেশসমূহক সহায় কৰা আদি বিষয়ত আন দেশসমূহে অধিক মুকলি সহমতত উপনীত হ’ব পাৰিব।
সূত্ৰ অনুসৰি জি-২০ৰ কূটনীতিবিদসকলে শীৰ্ষ সন্মিলনৰ পূৰ্বে নেতাসকলৰ বাবে ঘোষণাপত্ৰ প্ৰস্তুত কৰিছে, জলবায়ু পৰিৱৰ্তন এক মূল কাৰ্যসূচী। সূত্ৰটোৰ মতে, আমেৰিকাৰ বিৰোধিতা সত্ত্বেও ঘোষণাত স্পষ্টভাৱে “জলবায়ু পৰিৱৰ্তন” শব্দটো ব্যৱহাৰ কৰা হৈছে।
উল্লেখযোগ্য যে শেহতীয়াকৈ আমেৰিকাৰ ৰাষ্ট্ৰপতি ড’নাল্ড ট্ৰাম্পে জলবায়ু পৰিৱৰ্তনক প্ৰৱঞ্চনা বুলি উলাই কৰি ব্ৰাজিলত অনুষ্ঠিত ৰাষ্ট্ৰসংঘৰ জলবায়ু পৰিৱৰ্তন সন্মিলন (চিওপি ৩০)লৈ প্ৰতিনিধি দল প্ৰেৰণ কৰা নাছিল। তেওঁ এই সন্মিলনৰ বাবে দক্ষিণ আফ্ৰিকাৰ এজেণ্ডাক কঠোৰভাৱে নাকচ কৰে, য’ত উন্নয়নশীল দেশসমূহক জলবায়ু দুৰ্যোগৰ পৰা নিজকে ৰক্ষা কৰাত সহায় কৰা, স্বচ্ছ শক্তিলৈ পৰিৱৰ্তন আৰু ঋণ হ্ৰাস কৰা আদি অন্তৰ্ভুক্ত কৰা হৈছিল।
অৱশ্যে ৰামাফোছাই যোৱা সপ্তাহত উল্লেখ কৰিছিল যে তেওঁ আমেৰিকা খালী হাত এৰি যাব নিবিচাৰে।
১৯৯৯ চনত গঠন কৰা জি-২০ (গ্ৰুপ অৱ টুৱেণ্টি) প্ৰথম অৱস্থাত কেৱল বিত্তমন্ত্ৰী আৰু কেন্দ্ৰীয় বেংকৰ গৱৰ্ণৰৰ বৈঠক হিচাপেহে জনা গৈছিল যদিও ২০০৮ চনৰ বিশ্ব বিত্তীয় সংকটৰ পিছত ইয়াক শীৰ্ষ সন্মিলনৰ মৰ্যাদালৈ উন্নীত কৰা হৈছিল। বৰ্তমান জি-২০ দেশসমূহে বিশ্বৰ মুঠ ঘৰুৱা উৎপাদনৰ (জিডিপি) প্ৰায় ৮৫ শতাংশ, আন্তঃৰাষ্ট্ৰীয় বাণিজ্যৰ ৭৫ শতাংশ আৰু বিশ্বৰ জনসংখ্যাৰ দুই তৃতীয়াংশক প্ৰতিনিধিত্ব কৰে।
हिन्दुस्थान समाचार / অৰৱিন্দ
23 Nov 2025
