শোণিতপুৰ, ২২ নৱেম্বৰ (হি.স.)। ঢেকীয়াজুলিৰ শিঙৰী ঐতিহাসিক গুপ্তেশ্বৰ দেৱালয়ত অহা কালিৰ পৰা ৩০ নবেম্বৰলৈ আঠ দিনীয়াকৈ অনুষ্ঠিত হব অতি ৰুদ্ৰ মহাযজ্ঞ ৷ ইয়াত উপস্থিত থাকিব অসমৰ মুখ্যমন্ত্ৰী ড° হিমন্ত বিশ্ব শৰ্মা ৷ শিঙৰীৰ ঐতিহাসিক শ্ৰীশ্ৰীগুপ্তেশ্বৰ দেৱালয়ত অনুষ্ঠিত হব লগা অতি ৰুদ্ৰ মহাযজ্ঞৰ প্ৰস্তুতি প্ৰায় সম্পূৰ্ণ হৈছে ৷ আজি প্ৰস্তুতিৰ বুজ লবলৈ যজ্ঞস্থলীত আহি উপস্থিত হৈছে অসমৰ কেবিনেট মন্ত্ৰী অশোক সিংঘাল আৰু বৰছলাৰ বিধায়ক গনেশ লিম্বু ৷বৰ্তমান শিঙৰীৰ গুপ্তেশ্বৰ দেৱালয়ত বিশাল আয়োজন চলিছে ৷
দক্ষিণ ভাৰতৰ প্ৰায় তিনিশ ব্ৰাহ্মণ পুৰোহিতে তদাৰক কৰিব অতি ৰুদ্ৰ মহাযজ্ঞ ৷ ইতিমধ্যে শতাধিক ব্ৰাহ্মণ পুৰোহিত আহি উপস্থিত হৈছে গুপ্তেশ্বৰ দেৱালয়ত ৷ প্ৰতিদিনে বিশৰ পৰা ত্ৰিশ হাজাৰ মানুহৰ সমাগম ঘটিব বুলি জানিব দিয়ে উদ্যোক্তা সকলে ৷ অতি ৰুদ্ৰ মহাযজ্ঞত ৰাজ্যৰ মুখ্যমন্ত্ৰী গৰাকীক আদৰিবলৈ এতিয়া ৰাইজৰ মাজত ব্যাপক উৎসাহ পৰিলক্ষিত হৈছে ৷ অহাকালি পুৱা ৮.৩০ বজাত আৰম্ভ হব অতি ৰুদ্ৰ মহাযজ্ঞ ৷
হিন্দুস্থান সমাচাৰ / নিৰ্মলেন্দু
