বেলেম, ১৮ নৱেম্বৰ (হি.স.)। কেন্দ্ৰীয় পৰিৱেশ, বন আৰু জলবায়ু পৰিৱৰ্তন মন্ত্ৰী ভূপেন্দ্ৰ যাদৱে ব্ৰাজিলৰ বেলেমত অনুষ্ঠিত ৰাষ্ট্ৰসংঘৰ জলবায়ু পৰিৱৰ্তন সন্মিলন (COP30)ত আন্তঃৰাষ্ট্ৰীয় বিগ কেট এলায়েন্স (আই বি চি এ) উচ্চ পৰ্যায়ৰ মন্ত্ৰী অধিবেশনত ভাৰতৰ প্ৰতিশ্ৰুতি পুনৰ দৃঢ় কৰি ঘোষণা কৰে যে ভাৰতে ২০২৬ চনত নতুন দিল্লীত গ্লোবেল বিগ কেটছ সন্মিলন আয়োজন কৰিব। নেপালৰ কৃষি আৰু পশুপালন মন্ত্ৰী ড০ মদন প্ৰসাদ পাৰিয়াৰেও এই অনুষ্ঠানত অংশগ্ৰহণ কৰে।
কেন্দ্ৰীয় পৰিৱেশ, বন আৰু জলবায়ু পৰিৱৰ্তন মন্ত্ৰালয়ৰ তথ্য অনুসৰি ভূপেন্দ্ৰ যাদৱে উল্লেখ কৰে যে ডাঙৰ মেকুৰী প্ৰজাতি কেৱল বন্যপ্ৰাণী নহয় বৰঞ্চ প্ৰকৃতিৰ ভাৰসাম্য বজাই ৰখাৰ মূল উপাদান। তেওঁ কয় যে য’ত ডাঙৰ মেকুৰীক সুৰক্ষিত কৰা হয়, তাত অৰণ্য শক্তিশালী হয়, ঘাঁহনি পুনৰুত্পাদন হয়, পানী ব্যৱস্থাই ভালদৰে কাম কৰে, আৰু প্ৰাকৃতিক কাৰ্বন অধিক ফলপ্ৰসূভাৱে সংৰক্ষণ কৰা হয়। এই প্ৰজাতিসমূহৰ অৱনতিৰ ফলত পৰিৱেশ তন্ত্ৰ দুৰ্বল হৈ পৰে, জলবায়ু পৰিৱৰ্তনৰ প্ৰতি স্থিতিস্থাপকতা হ্ৰাস পায় আৰু প্ৰাকৃতিক কাৰ্বন মজুতত প্ৰভাৱ পৰে।
বিগ কেট পৰিস্থিতিক প্ৰকৃতিভিত্তিক জলবায়ু সমাধান বুলি অভিহিত কৰি তেওঁ ভৱিষ্যতৰ ৰাষ্ট্ৰীয়ভাৱে নিৰ্ধাৰিত অৱদান (এনডিচি)ত প্ৰকৃতিভিত্তিক জলবায়ু কাৰ্য্যক বিশিষ্টভাৱে অন্তৰ্ভুক্ত কৰাৰ আহ্বান জনায়। তেওঁ উল্লেখ কৰে যে ভাৰতত বিশ্বৰ সাতটা ডাঙৰ মেকুৰী প্ৰজাতিৰ ভিতৰত পাঁচটা প্ৰজাতিৰ বাসস্থান আৰু সংৰক্ষণৰ ক্ষেত্ৰত উল্লেখযোগ্য সাফল্য অব্যাহত ৰাখিছে। ভাৰতে নিৰ্ধাৰিত সময়ত বাঘৰ সংখ্যা দুগুণ বৃদ্ধি কৰিছে, এছিয়াত সিংহৰ সংখ্যাও ক্ৰমাগতভাৱে বৃদ্ধি পাইছে। সমগ্ৰ দেশতে বাঘ, সিংহ, নাহৰফুটুকী, আৰু তুষাৰ নাহৰফুটুকীৰ নিয়মীয়া লোকপিয়ল কৰি ভাৰতে বিশ্বৰ অন্যতম বিস্তৃত বন্যপ্ৰাণীৰ তথ্যকোষ প্ৰস্তুত কৰিছে। তদুপৰি ভাৰতে সংৰক্ষিত অঞ্চল সম্প্ৰসাৰণ, কৰিডৰ সুৰক্ষিত, আৰু সম্প্ৰদায়ভিত্তিক জীৱিকাৰ প্ৰসাৰ ঘটাই সংৰক্ষণৰ প্ৰচেষ্টা শক্তিশালী কৰিছে।
আই বি চি এৰ ক্ৰমবৰ্ধমান সদস্য সংখ্যাৰ কথা উল্লেখ কৰি ভূপেন্দ্ৰ যাদৱে ব্যাখ্যা কৰে যে এই পদক্ষেপ প্ৰধানমন্ত্ৰী নৰেন্দ্ৰ মোদীৰ এক ধৰা, এক বিশ্ব, এক ভৱিষ্যতৰ দৃষ্টিভংগীৰ ওপৰত ভিত্তি কৰি লোৱা হৈছে। এই পৰ্যন্ত ১৭খন দেশে আনুষ্ঠানিকভাৱে যোগদান কৰাৰ বিপৰীতে ৩০খনতকৈও অধিক দেশে যোগদানৰ ইচ্ছা প্ৰকাশ কৰিছে। জৈৱ বৈচিত্ৰ্য আৰু জলবায়ু সুৰক্ষাক অগ্ৰাধিকাৰ দিয়া ৰাষ্ট্ৰসমূহকে ধৰি সকলো ডাঙৰ মেকুৰী ৰেঞ্জৰ দেশক এই মিত্ৰজোঁটৰ অংশ হিচাপে লোৱাৰ লক্ষ্য ৰাখিছে ভাৰতে।
हिन्दुस्थान समाचार / অৰৱিন্দ
