ইছলামাবাদ/আম্মান, ১৭ নৱেম্বৰ (হি.স.)। পাকিস্তান আৰু জৰ্ডানৰ মাজত ঐতিহাসিক সম্পৰ্ক আৰু অধিক শক্তিশালী কৰি দ্বিপাক্ষিক সম্পৰ্ক শক্তিশালী কৰাৰ ওপৰত গুৰুত্ব আৰোপ কৰি দেওবাৰে ৰজা দ্বিতীয় আব্দুল্লাৰ পাকিস্তান ভ্ৰমণৰ দুদিনীয়া সামৰণি পৰে।

২১ বছৰৰ ভিতৰত জৰ্ডানৰ শাসকৰ পাকিস্তানলৈ এইটোৱেই আছিল প্ৰথম আনুষ্ঠানিক ভ্ৰমণ। এই ভ্ৰমণৰ সময়ত ৰজা আব্দুল্লাক পাকিস্তানৰ সৰ্বোচ্চ অসামৰিক সন্মান ‘নিশান-ই-পাকিস্তান’ৰে সন্মানিত কৰা হয়।

সংবাদ মাধ্যমৰ খবৰ অনুসৰি শনিবাৰে ইছলামবাদত উপস্থিত হোৱা ৰজা আব্দুল্লাক আদৰণি জনায় পাকিস্তানৰ প্ৰধানমন্ত্ৰী শ্বাহবাজ শ্বৰীফে। এই ভ্ৰমণৰ উদ্দেশ্য আছিল বিশেষকৈ সামৰিক, অৰ্থনৈতিক আৰু আঞ্চলিক সহযোগিতাৰ ক্ষেত্ৰত দ্বিপাক্ষিক সম্পৰ্ক আৰু অধিক গভীৰ কৰা।

ৰজা আব্দুল্লাই পাকিস্তানী সেনা প্ৰধান জেনেৰেল অছিম মুনিৰৰ সৈতেও সাক্ষাৎ কৰি গ্ল’বেল ইণ্ডাষ্ট্ৰিয়েল এণ্ড ডিফেন্স ছলিউচনছ (জিআইডিএছ) ভ্ৰমণ কৰে, য’ত দুয়োপক্ষই সামৰিক সহযোগিতা বৃদ্ধিৰ বাবে সন্মতি প্ৰকাশ কৰে।

দেওবাৰে ৰজা আব্দুল্লাই পাকিস্তানৰ ৰাষ্ট্ৰপতি আছিফ আলী জাৰ্দাৰীৰ সৈতে সাক্ষাৎ কৰি আঞ্চলিক শান্তি, সন্ত্ৰাসবাদ বিৰোধী প্ৰচেষ্টা, অৰ্থনৈতিক অংশীদাৰিত্বৰ বিষয়ে আলোচনা কৰে। পিছত তেওঁ টিলা ফিল্ড ফায়াৰিং ৰেঞ্জ পৰিদৰ্শন কৰে, য’ত প্ৰধানমন্ত্ৰী শ্বৰীফও উপস্থিত আছিল।

ইফালে, পাকিস্তানী সামৰিক মুখপাত্ৰই কয় যে এই ভ্ৰমণে দুয়োখন দেশৰ ঐতিহাসিক সম্পৰ্কক নতুন উচ্চতালৈ উন্নীত কৰিব।

জৰ্ডানৰ ৰজা আব্দুল্লাই নিজৰ ৰাজ্যিক ৱেবছাইটত প্ৰকাশ কৰা এক বিবৃতিত কয় যে, পাকিস্তান আৰু জৰ্ডানৰ মাজৰ ভাতৃত্ববোধৰ সম্পৰ্ক শতিকা পুৰণি। এই ভ্ৰমণে আমাক সাধাৰণ প্ৰত্যাহ্বানৰ সন্মুখীন হ'বলৈ ইয়াক শক্তিশালী কৰাৰ সুযোগ প্ৰদান কৰিছে। তেওঁ পাকিস্তানী নেতৃত্বৰ প্ৰতি কৃতজ্ঞতা প্ৰকাশ কৰি ভৱিষ্যতে অধিক সহযোগিতা আগবঢ়োৱাৰ প্ৰতিশ্ৰুতি দিয়ে।

পিছত পাকিস্তানৰ প্ৰধানমন্ত্ৰী শ্বৰীফেও ছ’চিয়েল মিডিয়া প্লেটফৰ্মত এটা পোষ্টত লিখিছে, ৰজা আব্দুল্লাৰ এই ভ্ৰমণে আমাৰ দ্বিপাক্ষিক সম্পৰ্কৰ এক নতুন অধ্যায়ৰ সূচনা কৰিছে। আমি সামৰিক, বাণিজ্য, আৰু সাংস্কৃতিক ক্ষেত্ৰত সহযোগিতা বৃদ্ধি কৰিম।

এই ভ্ৰমণৰ সময়ত দুয়োখন দেশে প্ৰতিৰক্ষা সঁজুলি যোগান আৰু যৌথ সামৰিক অনুশীলনকে ধৰি কেইবাখনো চুক্তিত স্বাক্ষৰ কৰে। দেওবাৰে সন্ধিয়া আম্মানলৈ উভতি আহে ৰজা আব্দুল্লা।

हिन्दुस्थान समाचार / অৰৱিন্দ