নতুন দিল্লী, ১৭ নৱেম্বৰ (হি.স.)। ছিডনীত মঙলবাৰৰ পৰা আৰম্ভ হ’বলগীয়া অষ্ট্ৰেলিয়ান অ’পেন ছুপাৰ ৫০০ বেডমিণ্টন প্ৰতিযোগিতাত পুনৰবাৰ শীৰ্ষ বাচনিৰ পুৰুষৰ ডাবলছ যুটি সাতৱিকসাইৰাজ ৰেংকিৰেডী আৰু চিৰাগ শ্বেট্টীৰ ওপৰত নিৰ্ভৰ কৰিব ভাৰতৰ আটাইতকৈ ডাঙৰ আশা। ছিজনৰ প্ৰথমটো খিতাপ দখল কৰিবলৈ চেষ্টা কৰিব এই যুটিয়ে।
এছিয়ান গেমছৰ স্বৰ্ণ পদক বিজয়ী সাতৱিক-চিৰাগে এইবাৰ ভাৰতীয় বেডমিণ্টনৰ বাবে কঠিন সময়ছোৱাত ধাৰাবাহিকভাৱে জিলিকি উঠিছে। বিশ্ব চেম্পিয়নশ্বিপত ব্ৰঞ্জৰ পদক লাভ কৰাৰ লগতে হংকং ছুপাৰ ৫০০ আৰু চাইনা মাষ্টাৰছ ছুপাৰ ৭৫০ত ৰানাৰ্ছ আপৰ স্থান দখল কৰে। বিশ্বৰ এক নম্বৰ ৰেংকিঙত ১৮ সপ্তাহ কটোৱাৰ পিছত মে’ মাহত ২৭ নম্বৰলৈ নামি অহাৰ পিছত এতিয়া এই যুটিটোৱে তৃতীয় স্থানলৈ উভতি আহিছে। তেওঁলোকে চীনৰ টাইপেইৰ চাং কো-চি আৰু পো লি-ৱেইৰ বিৰুদ্ধে অভিযান আৰম্ভ কৰিব।
লক্ষ্য সেন আৰু এইচ. এছ প্ৰণয়ৰ ছন্দৰ সন্ধান
এই প্ৰতিযোগিতাখন ভাৰতৰ শীৰ্ষ একক খেলুৱৈ লক্ষ্য সেন আৰু এইচ. এছ প্ৰণয়ে সামঞ্জস্য বিচাৰিবলৈ সুযোগ লাভ কৰিব। দীৰ্ঘদিনীয়া দুৰ্বল দৌৰৰ অন্তত লক্ষ্যই শক্তিশালী প্ৰত্যাৱৰ্তন কৰি হংকং অ’পেনৰ ফাইনেলত প্ৰৱেশ কৰে। যোৱা সপ্তাহত জাপানত ছেমিফাইনেলতো প্ৰৱেশ কৰিছিল। সপ্তম বাচনিৰ লক্ষ্যই প্ৰথম ৰাউণ্ডত চাইনিজ টাইপেইৰ ছু লি ইয়াঙৰ বিৰুদ্ধে খেলিব।
২০২৩ চনৰ বিশ্ব চেম্পিয়নশ্বিপৰ ব্ৰঞ্জৰ পদক বিজয়ী প্ৰণয়ে যোৱা বছৰ এই প্ৰতিযোগিতাত ৰানাৰ্ছ আপৰ স্থান দখল কৰিছিল। আঘাতৰ পৰা উভতি অহা প্ৰণয়ে জাপানৰ কুমামোটোত ভাল প্ৰদৰ্শন আগবঢ়ায়। তেওঁৰ প্ৰথমখন মেচত কানাডাৰ ব্রায়ান ইয়াঙৰ মুখামুখি হ’ব ৷
অন্যান্য ভাৰতীয় খেলুৱৈ
এইবাৰ মালয়েছিয়া মাষ্টাৰছত ৰানাৰ্ছ আপ স্থান দখল কৰা কিদাম্বী শ্ৰীকান্তৰ প্ৰথম ৰাউণ্ডত মুখামুখি হ’ব পঞ্চম বাচনিৰ লিন চুন-য়ি। ইউ এছ অ’পেন চেম্পিয়ন আয়ুছ শ্বেট্টীৰ মুখামুখি হ’ব মালয়েছিয়াৰ জাষ্টিন হোহৰ। কিৰণ জৰ্জৰ মুখামুখি হ’ব ষষ্ঠ ছিড কেন্টা নিছিমোটোৰ। ডেনমাৰ্কৰ মেগনাছ জোহানছনৰ বিৰুদ্ধে অভিযান আৰম্ভ কৰিব থাৰুণ মাননেপালীয়ে।
মহিলাৰ একক আৰু ডাবলছ
ভাৰতীয় আকৰ্ষী কাশ্যপে মহিলা একক শাখাত কঠিন আৰম্ভণিৰ সন্মুখীন হ’ব, শীৰ্ষ ছিড আৰু অলিম্পিক চেম্পিয়ন আন ছে ইয়ঙৰ বিৰুদ্ধে।
দীৰ্ঘদিনীয়া বিৰতিৰ অন্তত ঘূৰি অহা গায়ত্ৰী গোপিচাণ্ড আৰু ট্ৰিছা জলীয়ে মহিলা ডাবলছত চতুৰ্থ ছিড য়ান ফেই চেন আৰু চাইনিজ টাইপেইৰ লিয়াং চিং ছানৰ বিৰুদ্ধে খেলিব।
মিক্সড ডাবলছত মোহিত জাগলান আৰু লক্ষিতা জাগলানৰ মুখামুখি হ’ব কানাডাৰ নীল ইয়াকুৰা আৰু ক্রিষ্টাল লাই৷
এই সপ্তাহটো হ’ব অষ্ট্ৰেলিয়ান অ’পেনত ভাৰতীয় খেলুৱৈসকলৰ বাবে নিজৰ ফৰ্ম আৰু ছন্দ মজবুত কৰাৰ এক গুৰুত্বপূৰ্ণ সুযোগ।
हिन्दुस्थान समाचार / অৰৱিন্দ
