পাটনা, ১৫ নৱেম্বৰ (হি.স.)। বিহাৰত আৰা লোকসভা সমষ্টিক প্ৰতিনিধিত্ব কৰা ভাৰতীয় জনতা পাৰ্টিৰ সাংসদ তথা প্ৰাক্তন কেন্দ্ৰীয় মন্ত্ৰী ৰাজ কুমাৰ সিঙক দলৰ পৰা বহিষ্কাৰ কৰা হৈছে। বিহাৰ বিধানসভা নিৰ্বাচন ২০২৫ ৰ ফলাফল ঘোষণাৰ লগে লগে তেওঁক দল বিৰোধী কামত লিপ্ত হোৱাৰ অভিযোগ উত্থাপন কৰি বিজেপিৰ প্ৰাথমিক সদস্যপদৰ পৰা নিলম্বন কৰা হয়।

বিহাৰত ৰাষ্ট্ৰীয় গণতান্ত্ৰিক মিত্ৰজোঁটে ব্যাপক সংখ্যাগৰিষ্ঠতা লাভ কৰাৰ সময়তে আভ্যন্তৰীণ সংঘাত আৰু বিদ্ৰোহী প্ৰাৰ্থীৰ বাবে দলটোৱে কেইবাখনো আসনত লোকচানৰ সন্মুখীন হ’বলগীয়া হৈছিল। আৰ.কে.ৰ বিৰুদ্ধে এই ব্যৱস্থা নিৰ্বাচনী প্ৰচাৰৰ সময়ত আৰু ইয়াৰ আশে-পাশে দল বিৰোধী কাৰ্যকলাপত জড়িত হোৱাৰ অভিযোগৰ পিছতে গ্ৰহণ কৰা হৈছে।

আৰ.কে. সিঙৰ বিৰুদ্ধে নিৰ্বাচনী প্ৰচাৰৰ সময়ত দলীয় প্ৰাৰ্থীৰ বিৰুদ্ধে কাম কৰি মিত্ৰজোঁট আৰু দলৰ স্বাৰ্থত ক্ষতিকাৰক ৰাজহুৱা বক্তব্য দিয়াৰ অভিযোগ উত্থাপন হৈছে । তেওঁৰ এই কাৰ্যক অনুশাসনহীন বুলি বিবেচনা কৰি দলৰ নেতৃত্বই এই কঠোৰ সিদ্ধান্ত লৈ সংগঠনটোক এক শক্তিশালী বাৰ্তা প্ৰেৰণ কৰা বুলি বিশ্বাস কৰা হয়।

১৯৫২ চনৰ ২০ ডিচেম্বৰত জন্মগ্ৰহণ কৰা ৰাজ কুমাৰ সিঙে ২০১৪ চনৰ পৰা ২০২৪ চনৰ ৪ জুনলৈকে বিহাৰৰ আৰাৰ পৰা ভাৰতীয় সংসদৰ সদস্য হিচাপে কাৰ্যনিৰ্বাহ কৰিছিল। আৰ. সিং বিহাৰ কেডাৰৰ ১৯৭৫ বেটচ ভাৰতীয় প্ৰশাসনিক সেৱাৰ বিষয়া আৰু ভাৰতৰ প্ৰাক্তন গৃহ সচিব। ২০১৭ চনৰ ৩ ছেপ্টেম্বৰত তেওঁ প্ৰধানমন্ত্ৰীৰ মন্ত্ৰীসভাত শক্তি মন্ত্ৰী (স্বতন্ত্ৰ দায়িত্ব) হিচাপে নিযুক্তি লাভ কৰে।

हिन्दुस्थान समाचार / অৰৱিন্দ