ভূপাল, ০৯ অক্টোবৰ (হি.স.)। মধ্যপ্ৰদেশত বিষাক্ত কাহৰ চিৰাপৰ ফলত শিশুৰ মৃত্যুৰ ধাৰাবাহিকতা অবিৰতভাৱে অব্যাহত আছে। বুধবাৰে নিশা আন এটা শিশুৰ মৃত্যু হয়। ছিণ্ডৱাৰাৰ উমৰেঠ তহচিলৰ পাচধৰ গাঁৱৰ তিনি বছৰীয়া মায়ংক সূৰ্যবংশীয়ে চিকিৎসাৰ সময়ত অসুস্থ হৈ মৃত্যুক সাৱটি লয়। ২৫ ছেপ্টেম্বৰৰ পৰা নাগপুৰ চিকিৎসা মহাবিদ্যালয়ত ভৰ্তি হৈ আছিল। ইয়াৰ লগে লগে মৃত শিশুৰ সংখ্যা ২২ হ’ল। এই শিশুসকলৰ ভিতৰত ঊনৈশটা চিণ্ডৱাৰা, দুটা বেতুলৰ, আৰু এজন পাণ্ডুৰ্না জিলাৰ। সকলোৰে বয়স আঠ বছৰৰ তলৰ।

ইফালে কলড্ৰিফ কাহৰ চিৰাপ প্ৰস্তুত কৰা কোম্পানী শ্ৰীছান ফাৰ্মাৰ সঞ্চালক গোবিন্দন ৰংগনাথনক গ্ৰেপ্তাৰ কৰা হৈছে। এই কথা নিশ্চিত কৰিছে চিণ্ডৱাৰা আৰক্ষী অধীক্ষকে। তেওঁ উল্লেখ কৰে যে বুধবাৰে নিশা মধ্যপ্ৰদেশ চৰকাৰে গঠন কৰা বিশেষ তদন্তকাৰী দলে চেন্নাইত অভিযান চলাই কোম্পানীটোৰ সঞ্চালক ৰংগনাথনক গ্ৰেপ্তাৰ কৰে। কোম্পানীটোৰ পৰা গুৰুত্বপূৰ্ণ নথি-পত্ৰ, ড্ৰাগছৰ নমুনা, উৎপাদনৰ ৰেকৰ্ডো জব্দ কৰে এছ আই টিয়ে। তেওঁ উল্লেখ কৰে যে শ্ৰীছান ফাৰ্মাৰ সঞ্চালক ৰংগনাথনক গ্ৰেপ্তাৰ কৰাৰ পিছত আজি চেন্নাইৰ আদালতত হাজিৰ কৰা হ’ব আৰু ট্ৰেনজিট ৰিমাণ্ড লাভ কৰাৰ পিছত তেওঁক ছিণ্ডৱাৰালৈ অনা হ’ব।

কলড্ৰিফ কাহ চিৰাপৰ ফলত বৃক্কৰ সংক্ৰমণৰ ফলত মধ্যপ্ৰদেশত শিশুৰ মৃত্যুৰ ধাৰাবাহিকতাৰ পিছত বুধবাৰে মধ্যপ্ৰদেশ চৰকাৰে গঠন কৰা বিশেষ তদন্তকাৰী দল (এছ আই টি) তামিলনাডুত উপস্থিত হয় আৰু চেন্নাই আৰু কাঞ্চিপুৰমত কোম্পানীটোৰ পঞ্জীয়নভুক্ত কাৰ্যালয়ৰ লগতে কাঞ্চিপুৰমত থকা কোম্পানীটোৰ উদ্যোগটো পৰিদৰ্শন কৰি প্ৰমাণ সংগ্ৰহ কৰে। বিষয়াসকলৰ মতে, কোম্পানীটোৰ মালিকজনে তিনিদিন পূৰ্বে চৌহদৰ পৰা ওলাই গৈছিল। ইয়াৰ পিছতে পলাতক ফাৰ্মাচিউটিকেল কোম্পানী শ্ৰীছান ফাৰ্মাচিউটিকেল মেনুফেকচাৰ্ছৰ সঞ্চালক ৰংগনাথনক গ্ৰেপ্তাৰ বা গ্ৰেপ্তাৰত সহায় কৰা ব্যক্তিৰ বাবে ছিণ্ডৱাৰা মণ্ডলৰ আৰক্ষী উপ-মহাপৰিদৰ্শক ৰাকেশ কুমাৰ সিঙে বিশ হাজাৰ টকাৰ নগদ পুৰস্কাৰ ঘোষণা কৰে।

ৰংগনাথনক গ্ৰেপ্তাৰ কৰাৰ পিছতে শ্ৰীছান ফাৰ্মাৰ বিৰুদ্ধে আৰক্ষী আৰু স্বাস্থ্য বিভাগে তদন্ত তীব্ৰতৰ কৰি তুলিছে। প্ৰাথমিক তদন্তত দেখা গৈছে যে চিৰাপৰ উৎপাদনত গুণগত মানক আওকাণ কৰা হৈছিল, যাৰ ফলত এই মাৰাত্মক সামগ্ৰীটো বজাৰত উপস্থিত হৈছিল। বিষয়াসকলে কয় যে এই গোচৰত আৰু অধিক গ্ৰেপ্তাৰ সম্ভৱপৰ। চিৰাপৰ বিতৰণ নেটৱৰ্ক আৰু এই সামগ্ৰী বিক্ৰী কৰা ফাৰ্মাচীসমূহৰ বিষয়েও তদন্ত চলি আছে। ৰাইজক শীঘ্ৰে কল্ড্ৰিফ চিৰাপ ব্যৱহাৰ বন্ধ কৰি সন্তানৰ বাবে তৎকালীন চিকিৎসাৰ বাবে আহ্বান জনোৱা হৈছে।

ইফালে, ক’লড্ৰিফ কাহৰ চিৰাপৰ তদন্তৰ পৰা এটা ডাঙৰ তথ্য পোহৰলৈ আহিছে। তামিলনাডুৰ ঔষধ নিয়ন্ত্ৰণ সঞ্চালকৰ এক প্ৰতিবেদনত কোৱা হৈছে যে এই চিৰাপটো অ-ঔষধ গ্ৰেডৰ ৰাসায়নিক পদাৰ্থ ব্যৱহাৰ কৰি তৈয়াৰ কৰা হৈছে। তদন্তৰ সময়ত কোম্পানীটোৰ মালিকে দুটা বেচত ৫০ কিলোগ্ৰাম ওজনৰ দুটা বেগ প্ৰপাইলিন গ্লাইকল ক্ৰয় কৰা বুলি মৌখিকভাৱে স্বীকাৰ কৰে, অৰ্থাৎ কোম্পানীটোৱে ১০০ কিলোগ্ৰাম বিষাক্ত ৰাসায়নিক পদাৰ্থ ক্ৰয় কৰিছিল। তদন্তৰ সময়ত কোনো চালান পোৱা নগ’ল, কোনো ধৰণৰ ক্ৰয় প্ৰৱেশ লিপিবদ্ধ কৰা হোৱা নাছিল। তদন্তৰ সময়ত তদন্তকাৰী বিষয়াসকলক কোৱা হৈছিল যে নগদ ধনেৰে নহয় ইউপিআইৰ জৰিয়তে ধন পৰিশোধ কৰা হৈছে।

हिन्दुस्थान समाचार / মনোজ কুমাৰ শইকীয়া