ষ্টকহোম, ০৮ অক্টোবৰ (হি.স.)। বৰ্ষ ২০২৫ৰ ৰসায়ন বিজ্ঞানৰ নোবেল বঁটা বুধবাৰে ঘোষণা কৰা হয়। জাপানৰ চুছুমু কিটাগাৱা, অষ্ট্ৰেলিয়াৰ ৰিচাৰ্ড ৰবছন, আমেৰিকাৰ ওমৰ এম য়াঘীক এই বঁটা প্ৰদান কৰা হ’ব।
ছুইডেনৰ ৰয়েল একাডেমী অৱ চাইন্সে তেওঁলোকক ধাতু-জৈৱিক কাঠামোৰ বিকাশৰ বাবে এই সন্মান প্ৰদান কৰিছে। এইবোৰ হৈছে ধাতু আৰু জৈৱিক অণুৰে গঠিত স্ফটিকীয় পদাৰ্থ যিয়ে গেছ, ঔষধ আৰু ৰাসায়নিক পদাৰ্থৰ সংৰক্ষণ আৰু বিশুদ্ধকৰণত গুৰুত্বপূৰ্ণ ভূমিকা পালন কৰে।
ধাতু-জৈৱিক কাঠামোৰ আটাইতকৈ উল্লেখযোগ্য বৈশিষ্ট্য হ'ল ইয়াৰ অতি ছিদ্ৰযুক্ত গঠন, যাৰ ফলত ইহঁতে গেছ, তৰল পদাৰ্থ বা অণু শোষণ আৰু সংৰক্ষণ কৰিব পাৰে। এই আৱিষ্কাৰে শক্তি সংৰক্ষণ, পৰিৱেশ বিশুদ্ধকৰণ, ঔষধ প্ৰদান, গেছ পৃথকীকৰণ আদি ক্ষেত্ৰত এক বৈপ্লৱিক পৰিৱৰ্তন আনিছে।
জাপানৰ কিয়’ট’ বিশ্ববিদ্যালয়ৰ পৰা চুছুমু কিটাগাৱা, অষ্ট্ৰেলিয়াৰ মেলবৰ্ণ বিশ্ববিদ্যালয়ৰ ৰবছন আৰু আমেৰিকাৰ কেলিফৰ্ণিয়া বিশ্ববিদ্যালয়ৰ সৈতে জড়িত ওমৰ এম য়াঘী।
একাডেমীৰ তথ্য অনুসৰি, এই বঁটা প্ৰদান অনুষ্ঠানটো অহা ১০ ডিচেম্বৰত ষ্টকহ’মত অনুষ্ঠিত হ’ব, যিটো বঁটা প্ৰদানৰ প্ৰতিষ্ঠাপক আলফ্ৰেড নোবেলৰ মৃত্যুৰ বাৰ্ষিকী। বিজয়ীসকলে ১ কোটি ১০ লাখ ছুইডিছ ক্ৰ’না (প্ৰায় ১০.৩ কোটি ₹), এটা সোণৰ পদক, আৰু এখন প্ৰমাণপত্ৰ লাভ কৰিব। এই ধনৰাশি তিনিজন বঁটা বিজয়ীৰ মাজত সমানে ভাগ কৰা হ’ব।
ইয়াৰ পূৰ্বে মঙলবাৰে ছাবএটমিক কোৱাণ্টাম টানেলিঙৰ অদ্ভুত জগতখনৰ ওপৰত কৰা গৱেষণাৰ বাবে জন ক্লাৰ্ক, মিচেল এইচ ডেভ’ৰেট আৰু জন এম মাৰ্টিনিছক পদাৰ্থ বিজ্ঞানৰ নোবেল বঁটা প্ৰদান কৰা হয়। ইফালে কাইলৈ বৃহস্পতিবাৰে সাহিত্যৰ নোবেল বঁটা, শুকুৰবাৰে শান্তিৰ নোবেল বঁটা আৰু ১৩ অক্টোবৰত অৰ্থনীতিৰ নোবেল বঁটা ঘোষণা কৰা হ’ব।
১৯০১ চনত প্ৰতিষ্ঠা হোৱা নোবেল বঁটাসমূহ পদাৰ্থ বিজ্ঞান, ৰসায়ন বিজ্ঞান, চিকিৎসা, সাহিত্য, শান্তিৰ ক্ষেত্ৰত অসাধাৰণ অৱদানৰ বাবে প্ৰতি বছৰে প্ৰদান কৰা হয়।
হিন্দুস্থান সমাচাৰ / মনোজ কুমাৰ শইকীয়া
