নতুন দিল্লী, ০৮ অক্টোবৰ (হি.স.)। প্ৰধানমন্ত্ৰী নৰেন্দ্ৰ মোদীয়ে আজি পুৱা প্ৰায় ৯:৪৫ বজাত দিল্লীৰ উপকণ্ঠ অঞ্চল দ্বাৰকাৰ যশোভূমীত এছিয়াৰ সৰ্ববৃহৎ টেলিকমিউনিকেচন, মিডিয়া, আৰু টেকন’লজি অনুষ্ঠান ইণ্ডিয়া মোবাইল কংগ্ৰেছ ২০২৫ৰ নৱম সংস্কৰণ উদ্বোধন কৰিব । চাৰিদিনীয়া কংগ্ৰেছৰ বিষয়বস্তু হৈছে পৰিৱৰ্তনৰ বাবে উদ্ভাৱন (ইনোভেট টু ট্ৰান্সফৰ্ম)। টেলিকমিউনিকেচন বিভাগ (ডিওটি) আৰু ভাৰতীয় চেলুলাৰ অপাৰেটৰ এছ’চিয়েশ্যনে (চিওএআই) যৌথভাৱে ইয়াৰ আয়োজন কৰিছে। প্ৰধানমন্ত্ৰীৰ অনুষ্ঠানৰ প্ৰাকক্ষণত আনুষ্ঠানিক বিবৃতিত এই তথ্য প্ৰকাশ কৰা হৈছে।

প্ৰকাশিত বাতৰি অনুসৰি এই অনুষ্ঠানত ডিজিটেল ৰূপান্তৰ আৰু সামাজিক প্ৰগতিৰ বাবে উদ্ভাৱনৰ লাভ উঠাবলৈ ভাৰতৰ দায়বদ্ধতাক উজ্জ্বল কৰি তোলা হ’ব। আইএমচি ২০২৫-এ টেলিকমিউনিকেচন আৰু উদীয়মান প্ৰযুক্তিৰ শেহতীয়া উন্নতি প্ৰদৰ্শন কৰিব আৰু বিশ্বৰ নেতা, নীতি নিৰ্ধাৰক, উদ্যোগ বিশেষজ্ঞ, আৰু উদ্ভাৱকসকলক একত্ৰিত কৰিব। এই অনুষ্ঠানত অপটিকেল যোগাযোগ, দূৰসংযোগৰ অৰ্ধপৰিবাহী, কোৱাণ্টাম যোগাযোগ, ৬জি, আৰু জালিয়াতিৰ বিপদ সূচক আদি মূল বিষয়সমূহৰ ওপৰত গুৰুত্ব আৰোপ কৰা হ’ব। ইয়াৰ দ্বাৰা পৰৱৰ্তী প্ৰজন্মৰ সংযোগ, ডিজিটেল সাৰ্বভৌমত্ব, চাইবাৰ জালিয়াতি প্ৰতিৰোধ, আৰু বিশ্ব প্ৰযুক্তিৰ নেতৃত্বৰ ক্ষেত্ৰত ভাৰতৰ কৌশলগত অগ্ৰাধিকাৰ প্ৰতিফলিত হয়।

এই কাৰ্যসূচীত ১৫০ খনতকৈও অধিক দেশৰ ১.৫ লাখতকৈ অধিক দৰ্শনাৰ্থী, ৭,০০০ৰো অধিক বিশ্ব প্ৰতিনিধি আৰু ৪০০ৰো অধিক কোম্পানীয়ে অংশগ্ৰহণ কৰাৰ সম্ভাৱনা আছে। ৫জি/৬জি, এআই, স্মাৰ্ট মবিলিটি, চাইবাৰ সুৰক্ষা, কোৱাণ্টাম কম্পিউটিং, আৰু সেউজ প্ৰযুক্তিৰ দৰে ক্ষেত্ৰত ১৬০০ৰো অধিক নতুন ব্যৱহাৰৰ ক্ষেত্ৰ ১০০ৰো অধিক অধিবেশন আৰু কমেও ৮০০ বক্তাৰ জৰিয়তে প্ৰদৰ্শন কৰা হ’ব। আইএমচি-২০২৫-এ আন্তঃৰাষ্ট্ৰীয় সহযোগিতাৰ ওপৰতো গুৰুত্ব আৰোপ কৰে। জাপান, কানাডা, ব্ৰিটেইন, ৰাছিয়া, আয়াৰলেণ্ড, অষ্ট্ৰিয়াৰ প্ৰতিনিধি দলে অংশগ্ৰহণ কৰিছে।

উল্লেখযোগ্য যে কেন্দ্ৰীয় যোগাযোগ মন্ত্ৰী জ্যোতিৰাদিত্য এম সিন্ধিয়াই সোমবাৰে যশোভূমী ভ্ৰমণ কৰি চূড়ান্ত প্ৰস্তুতিৰ পৰ্যালোচনা কৰে। এই সময়ত তেওঁ সংবাদ মাধ্যমৰ আগত কয় যে প্ৰধানমন্ত্ৰীৰ নেতৃত্বত ভাৰতৰ টেলিকম খণ্ডই উদ্ভাৱন, সংযোগ, আৰু অন্তৰ্ভুক্তিৰ এক প্ৰধান প্ৰতীক হিচাপে আত্মপ্ৰকাশ কৰিছে। আই এম চি ২০২৫ বিশ্বৰ প্ৰতি ভাৰতৰ ডিজিটেল ৰূপান্তৰৰ প্ৰতিফলন হ’ব।

সিন্ধিয়াই কয় যে দেশখন আজি বিশ্বৰ শীৰ্ষ তিনিখন ডিজিটেল ৰাষ্ট্ৰৰ ভিতৰত অন্যতম, য’ত ১২ বিলিয়ন মোবাইল গ্ৰাহক আৰু ৯৭ কোটি ইণ্টাৰনেট ব্যৱহাৰকাৰী আছে। মাত্ৰ ২২ মাহতে বিশ্বৰ সৰ্বাধিক দ্ৰুততম ৫জি ৰোলআউট লাভ কৰিবলৈ সক্ষম হৈছে। আইএমচি ২০২৫ য়ে প্ৰযুক্তিগত আত্মনিৰ্ভৰশীলতা আৰু উদ্ভাৱনৰ এই যাত্ৰাক উদযাপন কৰিব।

हिन्दुस्थान समाचार / অৰৱিন্দ