শিলিগুৰি, ০৮ অক্টোবৰ (হি.স.)। দাৰ্জিলিং জিলাৰ মিৰিক অঞ্চলৰ ভূমিস্খলন আৰু বানপীড়িত অঞ্চল পৰিদৰ্শন কৰি কেন্দ্ৰীয় মন্ত্ৰী কিৰেন ৰিজিজুৱে সাহায্য আৰু উদ্ধাৰ অভিযানত নিয়োজিত সশস্ত্ৰ সীমা বল (এছ এছ বি) আৰু ৰাষ্ট্ৰীয় দুৰ্যোগ সঁহাৰি বাহিনী (এন ডি আৰ এফ)ৰ দলক প্ৰশংসা কৰে।

কেন্দ্ৰীয় মন্ত্ৰীগৰাকীয়ে কয় যে এই সংকটৰ সময়ত জীৱন ৰক্ষাৰ ক্ষেত্ৰত এছ এছ বি আৰু এন ডি আৰ এফৰ কৰ্মীসকলে যি তৎপৰতা আৰু সাহস প্ৰদৰ্শন কৰিছে সেয়া সঁচাকৈয়ে প্ৰশংসনীয়।

ৰিজিজুৱে ছ’চিয়েল মিডিয়াত লিখিছে, দাৰ্জিলিঙত বানপানী আৰু ভূমিস্খলনৰ ফলত হোৱা ক্ষতিৰ মূল্যায়ন কৰি থাকোঁতে খাপ্ৰাইল কেম্প আৰু মিৰিক আলাই খেলপথাৰত এছ এছ বিৰ কৰ্মীসকলৰ সৈতে সাক্ষাৎ কৰিলোঁ। সাহায্য আৰু উদ্ধাৰ অভিযানত এছ এছ বি আৰু এন ডি আৰ এফৰ অৱদান প্ৰশংসনীয়।

তেওঁ আৰু কয় যে মিৰিকৰ সৌৰেনী টোকলাং ধৰ অঞ্চলত বানাক্ৰান্ত পৰিয়ালসমূহৰ সৈতে সাক্ষাৎ কৰি তেওঁলোকৰ সাহসৰ প্ৰশংসা কৰে। ৰিজিজুৱে উল্লেখ কৰে যে কেন্দ্ৰীয় চৰকাৰে ক্ষতিগ্ৰস্ত পৰিয়ালসমূহক সহায়ৰ বাবে সকলো প্ৰচেষ্টা চলাই আছে।

প্ৰধানমন্ত্ৰী নৰেন্দ্ৰ মোডীৰ দূত হিচাপে ভ্ৰমণলৈ অহা ৰিজিজুৰ সৈতে বিজেপিৰ বিধায়ক শুভেন্দু অধিকাৰী আৰু দাৰ্জিলিঙৰ সাংসদ ৰাজু বিস্তাও উপস্থিত থাকে। তিনিওজন নেতাই ক্ষতিগ্ৰস্ত অঞ্চল পৰিদৰ্শন কৰি সাহায্য শিবিৰত ক্ষতিগ্ৰস্ত লোকৰ সৈতে বাৰ্তালাপ কৰে।

কেন্দ্ৰীয় মন্ত্ৰীগৰাকীয়ে উল্লেখ কৰে যে কেন্দ্ৰীয় চৰকাৰে এই দুৰ্যোগত ক্ষতিগ্ৰস্ত প্ৰতিজন ব্যক্তিক সাহায্য প্ৰদানৰ বাবে প্ৰতিশ্ৰুতিবদ্ধ। তেওঁ লগতে কয় যে কঠিন পৰিস্থিতিতো এছ এছ বি আৰু এন ডি আৰ এফৰ কৰ্মীসকলে দেখুওৱা নিষ্ঠা দেশৰ বাবে গৌৰৱৰ বিষয়।

हिन्दुस्थान समाचार / অৰৱিন্দ