বিশ্বনাথ, ০৫ অক্টোবৰ (হি.স.)। বিশ্বনাথ জিলাৰ মিজিকাজান চাহ বাগিছাত কৰমপুজাৰ লগত সংগতি ৰাখি ঝুমইৰ গীত নৃত্য আৰু ঢোলবাদনৰ বাবে আজি আয়োজন কৰা হয় বিশেষ কৰ্মশালা ৷ বিশ্বনাথ কৌশিক বিকাশ সেৱা ন্যাসে আয়োজন কৰা উক্ত কৰ্মশালাত বাগিছাখনৰ প্ৰায় দুশৰো অধিক ল’ৰা ছোৱালীয়ে অংশগ্ৰহণ কৰে ৷

কৰ্মশালাত ঝুমইৰ গীত নৃত্যৰ উপৰিও ঢোলবাদনৰ প্ৰশিক্ষণ প্ৰদান কৰা হয় ৷ উক্ত কৰ্মশালাত বিশিষ্ট সাংস্কৃতিক কৰ্মী তথা কণ্ঠশিল্পী মংগল নায়কে প্ৰদান কৰে গীত নৃত্য আৰু ঢোল বাদনৰ প্ৰশিক্ষণ ৷ আনহাতে বিশ্বনাথৰ শিল্পী নৰেন পানতাঁতি , যোগেশ কেওঁট আৰু নাৰায়ণ দাসেও সহযোগী প্ৰশিক্ষক হিচাবে কৰ্মশালাত অংশগ্ৰহণ কৰে ৷ উল্লেখ্য যে ঝুমইৰ নৃত্যৰ লয়লাস ভংগী গীত সমুহ গোৱাৰ শৈলী সমুহৰ লগতে যথাৰ্থ প্ৰায়োগিক দিশ সমুহৰ ওপৰত কৰ্মশালাত সুন্দৰকৈ উপস্থাপন কৰা হয় ৷ শিল্পী মংগল নায়কে প্ৰদান কৰা প্ৰশিক্ষণৰ শিক্ষণ পদ্ধতি দেখি ৰাইজে তেওঁক একেমুখে শলাগ লোৱাৰ লগতে ভুয়সী প্ৰশংসা কৰে ৷

হিন্দুস্থান সমাচাৰ / কিশোৰ মিশ্ৰ