গোলাঘাট, ০৫ অক্টোবৰ (হি.স.)। হিয়াৰ আমঠু, জনতাৰ প্ৰাণৰ শিল্পী জুবিন গাৰ্গৰ দেহাৱসানৰ এপষেক উকলিছে। প্ৰাণৰ শিল্পীগৰাকীৰ প্ৰতি নিতৌ শ্ৰদ্ধাঞ্জলিহে জনাই থকা হৈছে ৷ কিন্তু জুবিন গাৰ্গৰ মৃত্যুৰ ৰহস্য আজিও উদঘাটন হোৱা নাই ৷ তেওঁ মৃত্যুৰ প্ৰকৃত ৰহস্য উদঘাটন হ'ব লাগে ৷ সেই লৈ আক্ষেপ কৰিছে নেত্ৰকাই খ্যাত প্ৰবীণ অভিনেতা অৰুণ হাজৰিকাই ৷

প্ৰবীণ অভিনেতা অৰুণ হাজৰিকাই কয় যে জুবিন গাৰ্গে জীৱিত কালত কৈ থকা কথাসমূহ তেওঁৰ মৃত্যুৰ পিছতো প্ৰমাণ কৰি দিলে ৷ প্ৰাণৰ শিল্পীগৰাকীয়ে যি বিচাৰিছিল সেইয়া আমি মৃত্যুৰ পিছত সকলোৱে প্ৰত্যক্ষ কৰিলোঁ ৷ যিটো আমি আৰু ভৱিষ্যতে দেখা নাপাম ৷ দেওবাৰে বোকাখাতৰ জে ডি এচ জি মহাবিদ্যালয়ৰ প্ৰেক্ষাগৃহত অসম জাতীয়তাবাদী যুৱ ছাত্ৰ পৰিষদ বোকাখাত জিলা সমিতিৰ উদ্যোগত বিভিন্ন জাতীয় দল-সংগঠন আৰু বোকাখাতবাসী ৰাইজৰ সহযোগত আয়োজন কৰা শ্ৰদ্ধাঞ্জলি আৰু আদ্যশ্ৰাদ্ধ অনুষ্ঠানত অংশ গ্ৰহণ কৰি এই মন্তব্য কৰে অভিনেতা অৰুণ হাজৰিকাই৷ পুৱা প্ৰিয় শিল্পীগৰাকীৰ শ্ৰদ্ধাঞ্জলিৰ পিছতে সৰ্মধৰ্ম প্ৰাৰ্থনা সভা, নাম-প্ৰসঙ্গ, প্ৰিয় শিল্পীগৰাকীৰ স্মৃতি চাৰণ অনুষ্ঠান অনুষ্ঠিত হয়৷

---------------

হিন্দুস্থান সমাচাৰ / প্ৰকাশ ডেকা