-৬২,০০০ কোটিতকৈ অধিক মূল্যৰ বিভিন্ন যুৱকেন্দ্ৰিক আঁচনি আৰম্ভ

-ৰাষ্ট্ৰীয় দক্ষতা সমাৱৰ্তনত ৪৬ গৰাকী আই টি আই টপাৰক সন্মানিত কৰা হয়

নতুন দিল্লী, ০৪ অক্টোবৰ : প্ৰধানমন্ত্ৰী নৰেন্দ্ৰ মোদীয়ে আজি শনিবাৰে ৬২ হাজাৰ কোটি টকাৰো অধিক মূল্যৰ বিভিন্ন যুৱকেন্দ্ৰিক আঁচনি আৰম্ভ কৰি কয় যে বিহাৰৰ যুৱক-যুৱতীসকলে যাতে নিজৰ ৰাজ্যত সন্মানজনক কৰ্মসংস্থাপন লাভ কৰে আৰু প্ৰব্ৰজনৰ চক্ৰ শেষ হ’ব তাৰ বাবে এন ডি এ চৰকাৰ প্ৰতিশ্ৰুতিবদ্ধ। তেওঁ কয় যে এসময়ত শিক্ষা আৰু কৰ্মসংস্থাপনৰ অভাৱত লাখ লাখ যুৱক-যুৱতীয়ে বিহাৰ এৰি আন ৰাজ্যলৈ যাবলৈ বাধ্য হৈছিল যদিও আজি ৰাজ্যখনে উন্নয়নৰ নতুন যুগত প্ৰৱেশ কৰিছে।

বিজ্ঞান ভৱনত অনুষ্ঠিত ৰাষ্ট্ৰীয় দক্ষতা সমাৱৰ্তন অনুষ্ঠানত ভাষণ দি প্ৰধানমন্ত্ৰীয়ে এই মন্তব্য কৰে। এই উপলক্ষে তেওঁ সমগ্ৰ দেশৰ উদ্যোগিক প্ৰশিক্ষণ প্ৰতিষ্ঠান (আই টি আই)ৰ ৪৬ গৰাকী টপাৰক সম্বৰ্ধনা জনায়। মোদীয়ে কয় যে এই অনুষ্ঠান ভাৰতৰ দক্ষতা বিকাশৰ পুনৰ সজীৱতাৰ প্ৰতীক।

এই উপলক্ষে প্ৰধানমন্ত্ৰী মোদীয়ে প্ৰধানমন্ত্ৰী কৌশল আৰু ৰোজগৰ পৰিৱৰ্তন (পি এম-সেতু) আঁচনি মুকলি কৰে, যাৰ অধীনত সমগ্ৰ দেশৰ ১০০০ আইটিআইক ৬০,০০০ কোটি বিনিয়োগেৰে হাব-এণ্ড-স্পক মডেললৈ উন্নীত কৰা হ’ব। এই মডেলত ২০০টা হাব আইটিআই আৰু ৮০০টা স্প’ক আইটিআই অন্তৰ্ভুক্ত কৰা হ’ব। এইবোৰে আধুনিক আন্তঃগাঁথনি, ডিজিটেল শিক্ষণ ব্যৱস্থা, আৰু ইনকিউবেচনৰ সুবিধা প্ৰদান কৰিব। মোদীয়ে কয় যে পিএম-ছেটুৱে ভাৰতৰ যুৱক-যুৱতীসকলক বিশ্বব্যাপী দক্ষতাৰ দাবীৰ সৈতে সংযোগ কৰিব।

তেওঁ কয় যে বৰ্তমান দেশৰ আই টি আইত ১৭০টা ব্যৱসায়ৰ প্ৰশিক্ষণ দিয়া হৈছে, আৰু যোৱা ১১ বছৰত ১.৫ কোটিৰো অধিক যুৱকে দক্ষতা প্ৰশিক্ষণ লাভ কৰিছে। প্ৰধানমন্ত্ৰীয়ে উল্লেখ কৰে যে ২০১৪ চনলৈকে দেশত ১০ হাজাৰ আই টি আই আছিল, আনহাতে যোৱা দশকত আৰু ৫ হাজাৰ আই টি আই স্থাপন কৰা হৈছে।

প্ৰধানমন্ত্ৰী মোদীয়ে ভাষণত বিহাৰৰ বিশেষ উল্লেখ কৰি বিহাৰৰ যুৱক-যুৱতী জাতিৰ শক্তি বুলি উল্লেখ কৰে। তেওঁ উল্লেখ কৰে যে বিহাৰৰ যুৱক-যুৱতীসকলৰ সম্ভাৱনা বৃদ্ধিৰ লগে লগে ভাৰতৰ শক্তিও বৃদ্ধি পায়। মোদীয়ে স্মৰণ কৰি কয় যে দুটা দশকৰ আগতে বিহাৰৰ শিক্ষা ব্যৱস্থা সম্পূৰ্ণ অশান্তিপূৰ্ণ আছিল— কোনো বিদ্যালয় খোলা নাছিল, কোনো নিযুক্তিৰ ব্যৱস্থা কৰা হোৱা নাছিল। ফলস্বৰূপে লাখ লাখ শিশু বাৰাণসী, দিল্লী, মুম্বাইলৈ প্ৰব্ৰজন কৰিবলৈ বাধ্য হ’ল। তেওঁ উল্লেখ কৰে যে আৰজেডিৰ অপশাসনে বিহাৰৰ ভেটি দুৰ্বল কৰি তুলিছে।

প্ৰধানমন্ত্ৰীয়ে উল্লেখ কৰে যে নীতিশ কুমাৰৰ নেতৃত্বত এন ডি এ চৰকাৰে সেই অৱনতি ঘটা ব্যৱস্থাবোৰক পুনৰ শুদ্ধ পথলৈ আনিছে। আজি বিহাৰৰ শিক্ষা বাজেট বহুগুণে বৃদ্ধি পাইছে, প্ৰতিখন গাঁৱতে বিদ্যালয় খোলা হৈছে, আৰু যোৱা দুবছৰত ২ লাখ ৫০ হাজাৰৰো অধিক শিক্ষক নিযুক্তি দিয়া হৈছে। তেওঁ উল্লেখ কৰে যে আমাৰ এতিয়া লক্ষ্য হৈছে বিহাৰৰ যুৱক-যুৱতীসকলে যাতে বিহাৰৰ ভিতৰতে কৰ্মসংস্থাপন পায়।

প্ৰধানমন্ত্ৰীয়ে বিহাৰৰ বাবে মুখ্যমন্ত্ৰীৰ আত্মসহায়ক ভাট্টা আঁচনি আৰু বিহাৰ ছাত্ৰ ক্ৰেডিট কাৰ্ড আঁচনিকে ধৰি কেইবাখনো নতুন আঁচনি আৰু প্ৰকল্পৰ শুভাৰম্ভ কৰে। এই আঁচনিসমূহৰ অধীনত প্ৰতি বছৰে পাঁচ লাখ স্নাতক ছাত্ৰ-ছাত্ৰীয়ে মাহিলী ১০০০ টকা ভাট্টা আৰু দুবছৰৰ বাবে বিনামূলীয়া দক্ষতা প্ৰশিক্ষণ লাভ কৰিব। ক্ৰেডিট কাৰ্ড আঁচনিৰ জৰিয়তে ছাত্ৰ-ছাত্ৰীসকলক ৪ লাখ টকা পৰ্যন্ত সুতমুক্ত শিক্ষা ঋণ প্ৰদান কৰা হ’ব। প্ৰধানমন্ত্ৰীয়ে বিহাৰ যুৱ আয়োগ আৰু জন নায়ক কাৰ্পুৰী ঠাকুৰ দক্ষতা বিশ্ববিদ্যালয় উদ্বোধন কৰে। বিশ্ববিদ্যালয়খনে উদ্যোগমুখী পাঠ্যক্ৰমৰ জৰিয়তে বিশ্বব্যাপী দক্ষ কৰ্মশক্তি গঢ়ি তুলিব।

তেওঁ পিএম-ইউএছএ (প্ৰধানমন্ত্ৰী উচ্চতাৰ শিক্ষা অভিযান) আঁচনিৰ অধীনত বিহাৰৰ চাৰিখন বিশ্ববিদ্যালয়—পাটনা বিশ্ববিদ্যালয়, ভূপেন্দ্ৰ নাৰায়ণ মণ্ডল বিশ্ববিদ্যালয় (মধেপুৰা), জয়প্ৰকাশ বিশ্ববিদ্যালয় (ছাপৰা), আৰু নালন্দা মুক্ত বিশ্ববিদ্যালয় (পাটনা)ত নতুন শৈক্ষিক আৰু গৱেষণামূলক সুবিধাৰ আধাৰশিলা স্থাপন কৰে।

ভাষণৰ সময়ত প্ৰধানমন্ত্ৰী মোদীয়ে ভাৰতৰত্ন জননায়ক কাৰ্পুৰী ঠাকুৰৰ বিশেষ উল্লেখ কৰি কয় যে তেওঁ সমাজৰ অতি দুৰ্বল শ্ৰেণীৰ উত্থানৰ বাবে নিজৰ জীৱন উৎসৰ্গা কৰিছিল। কৰ্পুৰী ঠাকুৰক ছ’চিয়েল মিডিয়া ট্ৰ’লে জননায়ক বনাই দিয়া নাছিল, বিহাৰৰ ৰাইজে। মোদীয়ে বিহাৰৰ জনসাধাৰণক সকীয়াই দিয়ে যে সম্প্ৰতি একাংশ লোকে জননায়ক উপাধি দখল কৰিবলৈ চেষ্টা চলাইছে। গতিকে ৰাইজে কাৰ্পুৰী ঠাকুৰক প্ৰদান কৰা এই সন্মান যাতে চুৰি নহয় তাৰ বাবে বিহাৰৰ জনসাধাৰণ সজাগ হোৱা উচিত। প্ৰধানমন্ত্ৰীয়ে কয় যে তেওঁৰ নামত নিৰ্মাণ হ’বলগীয়া কাৰ্পুৰী ঠাকুৰ দক্ষতা বিশ্ববিদ্যালয়ে তেওঁৰ শিক্ষা সম্প্ৰসাৰণ আৰু সমাজ সেৱাৰ সপোনক আগুৱাই নিয়াৰ মাধ্যম হিচাপে কাম কৰিব।

মোদীয়ে ৩৪খন ৰাজ্য আৰু কেন্দ্ৰীয় শাসিত অঞ্চলৰ ৪০০খন নৱোদয় বিদ্যালয় আৰু ২০০খন একলব্য আৱাসিক বিদ্যালয়ত ১২০০টা বৃত্তিমূলক দক্ষতা পৰীক্ষাগাৰ উদ্বোধন কৰে। এই পৰীক্ষাগাৰসমূহে ছাত্ৰ-ছাত্ৰীসকলক আই টি, অটোমোটিভ, কৃষি, ইলেক্ট্ৰনিকছ, লজিষ্টিক, আৰু পৰ্যটন আদি খণ্ডত প্ৰশিক্ষণ দিব।

এন আই টি পাটনাৰ বিহতা চৌহদটোও তেওঁ দেশৰ বাবে উৎসৰ্গা কৰে, য’ত ৫জি ইউজ কেছ লেব, ইছৰোৰ সহযোগত আঞ্চলিক মহাকাশ শিক্ষা কেন্দ্ৰ, উদ্ভাৱন আৰু ইনকিউবেচন হাবৰ দৰে সুবিধাসমূহ সন্নিবিষ্ট কৰা হৈছে।

এই অনুষ্ঠানত প্ৰধানমন্ত্ৰীয়ে বিহাৰ চৰকাৰৰ পৰা ৪ হাজাৰৰো অধিক নতুনকৈ নিযুক্তি পোৱা প্ৰাৰ্থীক নিযুক্তি পত্ৰ বিতৰণ কৰাৰ লগতে নৱম আৰু দশম শ্ৰেণীৰ ২৫ লাখ ছাত্ৰ-ছাত্ৰীলৈ ৪৫০ কোটি টকাৰ প্ৰত্যক্ষ বৃত্তিৰ সুবিধা হস্তান্তৰ কৰে।

প্ৰধানমন্ত্ৰীয়ে কয় যে ২০১৪ চনৰ আগতে ভাৰতক দুৰ্বল অৰ্থনীতি বুলি গণ্য কৰা হৈছিল যদিও আজি ভাৰত বিশ্বৰ শীৰ্ষ তিনিখন অৰ্থনীতিৰ ভিতৰত অন্যতম হোৱাৰ দিশত আগবাঢ়িছে। তেওঁ কয় যে বৰ্তমান দেশত জি এছ টি সঞ্চয়ৰ উদযাপন কৰা হৈছে, আৰু বাইক আৰু স্কুটাৰৰ জি এছ টি হ্ৰাস পোৱাত বিহাৰৰ যুৱক-যুৱতীসকল অত্যন্ত সুখী। তেওঁ লগতে কয় যে যুৱ প্ৰগতি ভাৰতৰ প্ৰগতি। এই কাৰণেই চৰকাৰে শিক্ষা, দক্ষতা, নিয়োগক একত্ৰিত কৰি ‘উন্নত ভাৰত’ৰ দিশে আগবাঢ়িছে।

हिन्दुस्थान समाचार / মনোজ কুমাৰ শইকীয়া