বিজয় দেৱেৰাকোণ্ডা আৰু ৰশ্মিকা মাণ্ডন্নাৰ সম্পৰ্কৰ উৰাবাতৰি যথেষ্ট দিনৰ পৰা শিৰোনাম দখল কৰি আহিছে। অসংখ্য ডিনাৰ পাৰ্টি আৰু চিনেমাৰ ডেটত দুয়োকে একেলগে দেখা গৈছে যদিও দুয়োৰে কোনোৱেই ৰাজহুৱাভাৱে তেওঁলোকৰ সম্পৰ্ক স্বীকাৰ কৰা নাই। খবৰ অনুসৰি শেহতীয়াকৈ পৰিয়ালৰ সদস্যৰ উপস্থিতিত ৰশ্মিকা আৰু বিজয়ে ইজনে সিজনক আঙুঠি পিন্ধাই।
খবৰ অনুসৰি বিজয় দেৱেৰাকোণ্ডা আৰু ৰশ্মিকা মাণ্ডন্নাই যোৱা ৩ অক্টোবৰৰ পুৱা বিজয়ৰ ঘৰত নিজৰ এংগেজমেণ্ট ৰীতি-নীতি সম্পূৰ্ণ কৰে। বিশেষ অনুষ্ঠানটোৰ বাবে কেৱল পৰিয়ালৰ সদস্য আৰু ঘনিষ্ঠ বন্ধু-বান্ধৱীহে উপস্থিত আছিল। দুয়োগৰাকী তাৰকাই নিজৰ ব্যক্তিগত জীৱনত সদায় নিম্ন প্ৰফাইল বজাই ৰাখিছে, সেয়েহে তেওঁলোকে নিজৰ এংগেজমেণ্ট সংবাদ মাধ্যমৰ পৰা আঁতৰাই ৰাখিছিল। এতিয়ালৈকে কোনো ফটো ওলোৱা নাই যদিও অনুৰাগীয়ে ছ’চিয়েল মিডিয়াত ধাৰাসাৰ অভিনন্দন যাচিছে।
খবৰ অনুসৰি ২০২৬ চনৰ ফেব্ৰুৱাৰী মাহত বিজয় দেৱেৰাকোণ্ডা আৰু ৰশ্মিকা মাণ্ডন্নাই বিবাহপাশত আবদ্ধ হোৱাৰ প্ৰস্তুতি চলাইছে। দুয়ো পৰিয়ালৰ মাজত ইতিমধ্যে প্ৰস্তুতি পূৰ্ণগতিত চলি আছে, আৰু ৰশ্মিকাই কইনা হোৱাৰ সপোনক লৈ অত্যন্ত উৎসাহিত হৈ পৰিছে। খবৰ ওলাইছে যে এই বিয়াখন গ্ৰেণ্ড এফেয়াৰ হ’ব, আৰু দম্পতীহালে গন্তব্যস্থানত বিয়াৰ পৰিকল্পনা কৰিছে। এই বিশেষ অনুষ্ঠানত দক্ষিণ আৰু বলীউডৰ বহু বিশিষ্ট চেলিব্ৰিটিয়ে অংশগ্ৰহণ কৰাৰ সম্ভাৱনা আছে। অৱশ্যে এই কথা এতিয়াও আনুষ্ঠানিকভাৱে নিশ্চিত হোৱা নাই।
हिन्दुस्थान समाचार / আলোক চক্ৰৱৰ্তী
