নতুন দিল্লী, ০৪ অক্টোবৰ (হি.স.)। ভাৰত আৰু ইউৰোপীয় সংঘৰ মাজত মুক্ত বাণিজ্য চুক্তিৰ চতুৰ্দশ ৰাউণ্ডৰ আলোচনা অহা ৬ অক্টোবৰৰ পৰা আৰম্ভ হ’ব। ইউৰোপীয় আয়োগৰ সভাপতি ভন ডেৰ লেয়েন আৰু প্ৰধানমন্ত্ৰী নৰেন্দ্ৰ মোদীয়ে চলিত বৰ্ষৰ শেষৰ ফালে এফ টি এ চূড়ান্ত কৰাৰ লক্ষ্য নিৰ্ধাৰণ কৰিছে।

ইউৰোপীয় ইউনিয়নৰ ৰাষ্ট্ৰদূত হাৰ্ভে ডেলফিনে শনিবাৰে ফেডাৰেচন অৱ ইউৰোপিয়ান বিজনেছ ইন ইণ্ডিয়াৰ দ্বিতীয় বাৰ্ষিক সাধাৰণ সভাত এই কথা প্ৰকাশ কৰে। চলিত বৰ্ষৰ শেষৰ ফালে চুক্তিখন চূড়ান্ত কৰাৰ লক্ষ্যৰে দুয়োপক্ষই দ্ৰুতগতিত আলোচনা আগবঢ়াই নিছে বুলিও তেওঁ কয়।

এফ ই বি আইৰ দ্বিতীয় বাৰ্ষিক সাধাৰণ সভাত ভাষণ দি হাৰ্ভে ডেলফিনে এই কথাত গুৰুত্ব আৰোপ কৰে যে ভাৰতত ইতিমধ্যে বৃহৎ সংখ্যক ইউৰোপীয় ব্যৱসায় আছে, যিয়ে মুক্ত বাণিজ্য চুক্তিৰ বাবে আৰু অধিক সুযোগ মুকলি কৰিব পাৰে। এফইবিআইৰ এক নতুন সমীক্ষা অনুসৰি ভাৰতত ৬,০০০ৰো অধিক ইউৰোপীয় কোম্পানীয়ে কাম কৰি আছে, যাৰ ফলত ৩০ লাখৰো অধিক চাকৰিৰ সৃষ্টি হৈছে। এই কোম্পানীসমূহে কেৱল বিনিয়োগেই নহয়, ভাৰতৰ পৰা উৎপাদন, উদ্ভাৱন, আৰু ৰপ্তানিও কৰে, যিয়ে প্ৰধানমন্ত্ৰী মোদীৰ ‘মেক ইন ইণ্ডিয়া’ দৃষ্টিভংগীত প্ৰত্যক্ষভাৱে অৰিহণা যোগায়।

উল্লেখযোগ্য যে ইউৰোপীয় সংঘ ভাৰতৰ সৰ্ববৃহৎ বাণিজ্যিক অংশীদাৰ হৈয়েই আছে, ব্যৱসায়িক সামগ্ৰীৰ ব্যৱসায় ১২০ বিলিয়ন ইউৰো পৰ্যন্ত হৈছে, আমেৰিকা আৰু চীন দুয়োটাকে অতিক্ৰম কৰি। সেৱাসমূহকে ধৰি দ্বিপাক্ষিক বাণিজ্যৰ মূল্য ১৮০ বিলিয়ন ইউৰো হৈছে বুলি এফ ই বি আইৰ সমীক্ষাত প্ৰকাশ পাইছে।

हिन्दुस्थान समाचार / মনোজ কুমাৰ শইকীয়া