নতুন দিল্লী, ০৪ অক্টোবৰ (হি.স.)। কেন্দ্ৰীয় বাণিজ্য আৰু উদ্যোগ মন্ত্ৰী পীয়ুষ গোৱেলে ছিংগাপুৰৰ বিনিয়োগকাৰীসকলক ভাৰতে উপস্থাপন কৰা অৰ্থনৈতিক বিকাশৰ সুযোগসমূহ বিবেচনা কৰিবলৈ আহ্বান জনায়।

কেন্দ্ৰীয় বাণিজ্য মন্ত্ৰীগৰাকীয়ে শনিবাৰে ছিংগাপুৰত ইণ্ডিয়া-চিংগাপুৰ পাৰ্টনাৰশ্বিপ ফৰ গ্ৰ'থ শীৰ্ষক বিষয়ত বিনিয়োগকাৰীৰ সৈতে হোৱা বৈঠকত ভাষণ দি এই মন্তব্য কৰে। তেওঁ কয়, মই আপোনালোক সকলোকে আহ্বান জনাইছো যে ভাৰতে আগবঢ়োৱা সুযোগৰ পৰিসৰৰ বিষয়ে বিবেচনা কৰক।

তেওঁৰ ভাষণত গোৱেলে ভাৰতৰ বজাৰৰ আকাৰ, দক্ষ কৰ্মশক্তি আৰু পুঁজি, গৱেষণা আৰু উন্নয়ন, আৰু বহনক্ষমতাৰ সম্ভাৱনাৰ ওপৰত আলোকপাত কৰে। দ্ৰুত অৰ্থনৈতিক বৃদ্ধিৰ ওপৰত গুৰুত্ব আৰোপ কৰি মন্ত্ৰীগৰাকীয়ে ভাৰতৰ তিনিটা মূল বৈশিষ্ট্যৰ ওপৰত আলোকপাত কৰে: বজাৰৰ আকাৰ, সুযোগ, আৰু ইয়াৰ কৰ্মশক্তিৰ দক্ষতা।

বাণিজ্য মন্ত্ৰীগৰাকীয়ে কয় যে আমি একেলগে কাম কৰি ভাৰত-ছিংগাপুৰ ব্যৱসায়িক গোলটেবুলৰ দ্বাৰা আৰম্ভ কৰা বিভিন্ন পদক্ষেপক দ্ৰুতগতিত আগুৱাই নিবলৈ আগ্ৰহী। তেওঁ কয় যে ৰাজহুৱা আৰু ব্যক্তিগত দুয়োটা খণ্ডৰ বিষয়াসকলে অক্লান্তভাৱে কাম কৰি আছে আৰু এনে আৰ্হি প্ৰস্তুত কৰি আছে যিয়ে দুয়োখন দেশৰ মাজৰ সম্পৰ্কৰ বৃদ্ধি ত্বৰান্বিত কৰাত সহায় কৰিব।

গোৱেলে কয়, মই বিশ্বাস কৰোঁ যে একেলগে বহু নতুন সীমা অতিক্ৰম কৰিব লাগিব। সেয়া পুঁজি হওক, গৱেষণা আৰু উন্নয়ন হওক, মানৱ সম্পদ হওক, দক্ষতা হওক, প্ৰতিভা হওক, শিক্ষা হওক, ভাৰত আৰু ছিংগাপুৰ সকলো ক্ষেত্ৰতে একেলগে আগবাঢ়ি যাবলৈ প্ৰতিশ্ৰুতিবদ্ধ।

ইয়াৰ পূৰ্বে বাণিজ্য মন্ত্ৰীগৰাকীয়ে এক্স পোষ্টত উল্লেখ কৰিছিল যে তেওঁ ব্লেকষ্টোন ছিংগাপুৰৰ অধ্যক্ষ গৌতম বেনাৰ্জীৰ সৈতে সাক্ষাৎ কৰে। বৈঠকত তেওঁ যোগান শৃংখল আৰু অধিক শক্তিশালী কৰাৰ বাবে উৎপাদন আন্তঃগাঁথনিৰ দীৰ্ঘম্যাদী মূলধনৰ সুযোগ সম্পৰ্কে আলোচনা কৰে। নোমুৰা এছিয়া পেচিফিক হোল্ডিংছৰ চিইঅ’ নাগছ শংকৰানাৰায়ণৰ নেতৃত্বত এটা প্ৰতিনিধি দলৰ সৈতেও তেওঁ সাক্ষাৎ কৰে। ভাৰতকেন্দ্ৰিক বিনিয়োগক প্ৰসাৰিত কৰাৰ সুযোগ আৰু বিশ্ব বিনিয়োগকাৰীৰ সন্মুখত ভাৰতে উপস্থাপন কৰা বিশাল সুযোগৰ বিষয়ে আলোচনা কৰে।

हिन्दुस्थान समाचार / অৰৱিন্দ