মেলবৰ্ণ, ৩১ অক্টোবৰ (হি.স.। ক্ৰিকেট জগতখনে মেলবৰ্ণৰ যুৱ ক্ৰিকেটাৰ বেন অষ্টিন (১৭)ৰ মৃত্যুত শোক প্ৰকাশ কৰিছে। বৃহস্পতিবাৰে নেট অনুশীলনৰ সময়ত বলৰ খুন্দাত তেওঁৰ মৃত্যু হয়। মেলবৰ্ণৰ ফাৰ্নট্ৰি ক্ৰিকেট ক্লাবত বেটিঙৰ অনুশীলন কৰি থকা অৱস্থাত চাইডআৰ্মৰ ডেলিভাৰীয়ে ডিঙিত আঘাত কৰে। চিকিৎসালয়ত লাইফ চাপৰ্টত ৰখাৰ পিছত বৃহস্পতিবাৰে পুৱা তেওঁ শেষ নিশ্বাস ত্যাগ কৰে।
মেলবৰ্ণ ক্ৰিকেট খেলপথাৰ (এমচিজি)ত অষ্ট্ৰেলিয়া আৰু ভাৰতৰ মাজত অনুষ্ঠিত হোৱা টি-২০ মেচখনৰ পূৰ্বে দুয়োটা দলে মেচৰ বিষয়া আৰু অষ্টিনৰ ক্লাবৰ প্ৰতিনিধিৰ সৈতে এক মিনিটৰ বাবে মৌনতা অৱলম্বন কৰি শ্ৰদ্ধাঞ্জলি জনাইছিল। খেলপথাৰত তেওঁৰ ফটো প্ৰদৰ্শন কৰা হৈছিল, আৰু তেওঁৰ টুপীটো বিশেষভাৱে নিৰ্দিষ্ট প্লেটফৰ্মত ৰখা হৈছিল। দুয়োটা দল আৰু আম্পায়াৰে সন্মান প্ৰদৰ্শনৰ বাবে ক’লা আৰ্মবেণ্ড পিন্ধিছিল।
একেদৰে মহিলা বিশ্বকাপৰ ছেমি ফাইনেলৰ সময়ত অষ্ট্ৰেলিয়া আৰু ভাৰতীয় দলে ক’লা আৰ্মবেণ্ড পিন্ধি শোক প্ৰকাশ কৰে। শ্বেফিল্ড শ্বিল্ডৰ মেচত অংশগ্ৰহণ কৰা খেলুৱৈসকলেও বেট ওপৰলৈ তুলি শ্ৰদ্ধাঞ্জলি জনায় আৰু ভিক্টোৰিয়া-তাছমেনিয়া মেচৰ পূৰ্বে এক মুহূৰ্তৰ মৌনতা অৱলম্বন কৰা হয়।
বেনৰ পিতৃ জেছ অষ্টিনে কয় যে এই ট্ৰেজেডীয়ে আমাক ধ্বংস কৰি পেলাইছে, কিন্তু বেনে তেওঁৰ আটাইতকৈ ভালপোৱা কামটো কৰি আছিল বুলি জানি আমি সান্ত্বনা লাভ কৰিছো— বন্ধুৰ সৈতে ক্ৰিকেট খেলিছিল।”
ক্ৰিকেট ভিক্টোৰিয়াৰ চিইঅ’ নিক কামিন্সে কয় যে বেন আছিল এজন প্ৰকৃত অষ্ট্ৰেলিয়ান ল’ৰা, যিয়ে শীতকালত ফুটবল আৰু গ্ৰীষ্মকালত ক্ৰিকেট ভাল পাইছিল।
এই দুৰ্ঘটনাটোৱে ক্লাব আৰু জুনিয়ৰ পৰ্যায়ত চাইডআৰ্ম সঁজুলিৰ সুৰক্ষাৰ ওপৰত প্ৰশ্ন উত্থাপন কৰিছে। বেন হেলমেট পিন্ধি থকা বুলি খবৰ ওলাইছিল যদিও ইয়াত ষ্টেম গাৰ্ডৰ অভাৱ আছিল, যিটো এতিয়া পেছাদাৰী মেচত বাধ্যতামূলক।
বেনৰ বন্ধু তথা সহযোগী খেলুৱৈ লিয়াম ভাৰ্টিগানে কয় যে তেওঁ সদায় হাঁহিমুখীয়া, অত্যন্ত নম্ৰ আৰু সকলোৰে ভালপোৱা আছিল।
তেওঁৰ বন্ধু-বান্ধৱী আৰু অনুৰাগীসকলে এতিয়া ফাৰ্ণট্ৰি ক্লাবৰ বাহিৰত ফুল, মিঠাই, ক্ৰিকেটৰ বেটৰ দ্বাৰা গঠিত এটা স্মৃতিসৌধ সৃষ্টি কৰিছে।
বেন অষ্টিনৰ মৃত্যুত পুনৰবাৰ ২০১৪ চনত ফিল হিউজৰ মৃত্যুৰ স্মৃতি ঘূৰি আহিছে, যিজনো বলৰ ডিঙিত আঘাতপ্ৰাপ্ত হৈ খেলপথাৰত মৃত্যুবৰণ কৰে।
हिन्दुस्थान समाचार / অৰৱিন্দ
