তিনিচুকীয়া, ২৮ অক্টোবৰ (হি.স.)। তিনিচুকীয়াত নিষিদ্ধ উগ্ৰপন্থী সংগঠন আলফা স্বাধীনৰ এজন সক্ৰিয় কেডাৰে আৰক্ষীৰ ওচৰত আত্মসমৰ্পণ কৰিছে। আত্মসমৰ্পন কৰা আলফা সদস্য়জন সংগঠনটোৰ স্বয়ং-ঘোষিত এছ এছ কৰ্পৰেল সমীৰণ চেতিয়া ওৰফে ‘প্ৰবীণ অসম’ বুলি পৰিচয় পোৱা গৈছে। কেডাৰজনে ২৮ অক্টোবৰত তিনিচুকীয়া জিলাৰ আৰক্ষীৰ ওচৰত আত্মসমৰ্পণ কৰে।
সূত্ৰ অনুসৰি, তিনিচুকীয়া আৰক্ষী আৰু নিৰাপত্তা বাহিনীয়ে যৌথভাৱে চলোৱা সমন্বিত অভিযান আৰু গোপন সূত্ৰৰ তথ্যৰ আধাৰত চেতিয়াৰ আত্মসমৰ্পণ কৰিবলৈ বাধ্য হয়। অভিযান সময়ত কেডাৰজনে স্বইচ্ছাৰে আত্মসমৰ্পণ কৰে বুলি উল্লেখ কৰিছে আৰক্ষীয়ে।
চেতিয়া তিনিচুকীয়া জিলাৰ জাগুন অঞ্চলৰ বাসিন্দা বুলি চিনাক্ত কৰা হৈছে। প্ৰাথমিক তদন্তত উন্মোচিত হৈছে যে তেওঁ ২০২২ চনত আলফাত যোগদান কৰিছিল। সংগঠনটোৰ সদস্য হোৱাৰ পূৰ্বে তেওঁ নাগালেণ্ডৰ নিষিদ্ধ উগ্ৰপন্থী সংগঠন নেচনেল ছ’চিয়েলিষ্ট কাউন্সিল অব্ নাগালেণ্ড (এনএছচিএন)-ৰ সৈতেও জড়িত আছিল বুলি জানিব পৰা গৈছে।
আৰক্ষীৰ সূত্ৰই আশা প্ৰকাশ কৰিছে যে চেতিয়াৰ পৰা সংগঠনৰ ক্ৰমবিন্যাস, সীমান্ত এলেকাত সক্ৰিয় গোটৰ চোৰাংচোৱা কার্যকলাপৰ বিষয়ে গুৰুত্বপূৰ্ণ তথ্য লাভ কৰা সম্ভৱ হ’ব।
হিন্দুস্থান সমাচাৰ / প্ৰকাশ ডেকা
