ইছলামাবাদ, ২৮ অক্টোবৰ (হি.স.)। পাকিস্তান আৰু আফগানিস্তানৰ মাজত চলি থকা উত্তেজনাৰ মাজতে শেহতীয়াকৈ আন্তঃসেৱা চোৰাংচোৱা সংস্থাৰ প্ৰাক্তন মুৰব্বী জেনেৰেল এহছান উল হকৰ দাবীয়ে তালিবান শাসনক অসন্তুষ্ট কৰাৰ সম্ভাৱনা আছে। এই পৰিঘটনাটো ২০০১ চনৰ ১১ ছেপ্টেম্বৰত (৯/১১) আমেৰিকাত সংঘটিত আক্ৰমণৰ সময়ত পাকিস্তানত নিয়োজিত হৈ থকা তালিবানৰ ৰাষ্ট্ৰদূত আব্দুছ চালাম জাইফৰ বিষয়ে। জাইফে মুকলিকৈ কৈছে যে তেওঁক পেছাৱৰত আমেৰিকাক গতাই দিয়া হৈছিল। আই এছ আইৰ প্ৰাক্তন মুৰব্বী হকে এইটো এটা দেখ দেখকৈ মিছা বুলি উল্লেখ কৰে। জায়েফক আমেৰিকাক গতাই দিছিল তেওঁৰ নিজৰ আফগান সমকক্ষই।

ডন কাকতৰ প্ৰতিবেদনত এই শেহতীয়া বিতৰ্কৰ বিষয়ে বিতংভাৱে আলোচনা কৰা হৈছে। প্ৰতিবেদন অনুসৰি, আফগানিস্তান আক্ৰমণৰ পিছত পাকিস্তানে আমেৰিকাৰ সেনাবাহিনীক গতাই দিয়া কুখ্যাত নথিখনৰ ২০ বছৰতকৈও অধিক সময়ৰ পাছত কৰা এহছান-উল-হকৰ এই দাবীয়ে চুবুৰীয়া দেশ দুখনৰ মাজৰ সম্পৰ্ক আৰু অধিক উত্তেজিত কৰিব পাৰে। ২০০১ চনৰ ১১ ছেপ্টেম্বৰৰ আক্ৰমণৰ কিছু সময়ৰ পিছতে হকে আই এছ আইৰ কমাণ্ড লয়। এতিয়ালৈকে আন্তৰ্জাতিক আইন উলংঘা কৰি পাকিস্তানে জাইফক আমেৰিকানসকলৰ হাতত গতাই দিয়া বুলি বিশ্বাস কৰা হৈছিল।

তালিবানৰ প্ৰাক্তন দূত জাইফে তেওঁৰ প্ৰশংসিত গ্ৰন্থ মাই লাইফ উইথ দ্য তালিবানত দাবী কৰিছিল যে তেওঁক পেছাৱাৰত আমেৰিকাৰ জিম্মাত গতাই দিয়া হৈছে। ডন কাকতত প্ৰকাশিত এক বাতৰি অনুসৰি জাইফৰ এই দাবীক কেতিয়াও কোনো পাকিস্তানী বিষয়াই ৰাজহুৱাভাৱে প্ৰত্যাহ্বান জনোৱা নাই। শেহতীয়াকৈ হকে এখন আলোচনা চক্ৰত এই সন্দৰ্ভত দীঘলীয়া মন্তব্য কৰিছিল। তেওঁ বৰ্ণনা কৰে যে কেনেকৈ পূৰ্বৰ তালিবান চৰকাৰক স্বীকৃতিহীন কৰা হৈছিল আৰু কেনেকৈ পাকিস্তানী বিষয়াসকলে দূত জাইফক ইছলামাবাদ এৰি যাবলৈ বুজাবলৈ কেইবামাহো ধৰি চেষ্টা কৰিছিল।

প্ৰাক্তন জেনেৰেল হকে কয় যে জাইফে অটল হৈ আছিল। ইয়াৰ পিছতে তেওঁক হেলিকপ্টাৰেৰে টৰখাম সীমান্তলৈ লৈ যোৱা হয়। আফগানিস্তান পাৰ হোৱাৰ লগে লগে আফগান কৰ্তৃপক্ষই তেওঁক গ্ৰেপ্তাৰ কৰি আমেৰিকাৰ সেনাবাহিনীৰ হাতত গতাই দিয়ে। ইয়াৰ পিছত তেওঁক গুয়ান্তানামো বে’লৈ বদলি কৰা হয়। হকে কয় যে জাইফে গুয়ান্তানামো বে’ৰ কুখ্যাত আমেৰিকাৰ ডিটেনচন চেণ্টাৰত প্ৰায় চাৰি বছৰ বন্দী হিচাপে কটায় আৰু ২০০৫ চনত তেওঁক মুকলি কৰি দিয়া হয়। প্ৰাক্তন জেনেৰেলগৰাকীৰ এই বক্তব্যক জাইফে কঠোৰভাৱে নাকচ কৰে।

আই এছ আইৰ প্ৰাক্তন মুৰব্বী হকে যুটীয়া মুখ্য কৰ্মচাৰী সমিতিৰ অধ্যক্ষ হিচাপে অৱসৰ গ্ৰহণ কৰে। তেওঁ কয় যে সম্পৰ্ক বিচ্ছিন্ন হোৱাৰ পিছতো জাইফে পাকিস্তানত ৰাষ্ট্ৰদূতগৰাকীৰ চৰকাৰী বাসগৃহত বাস কৰি থাকিল, য’ত বিদেশী সংবাদ মাধ্যমে তেওঁৰ বাসগৃহত সঘনাই আহিছিল। তেওঁ কয় যে ২০০১ চনৰ অক্টোবৰ মাহত আমেৰিকাই কাবুলত বোমা বিস্ফোৰণ আৰম্ভ কৰাৰ পিছত তালিবানৰ নেতাসকলে আফগানিস্তান এৰি যাবলৈ আৰম্ভ কৰে। তেওঁলোকে পাকিস্তানত নিৰ্বাসিত চৰকাৰ গঠনৰ পৰিকল্পনা কৰিছিল। এই পৰিকল্পনাৰ মাষ্টাৰমাইণ্ড আছিল জাইফ। হকে কয়, মল্লাহ জাইফক পাকিস্তান এৰি যাবলৈ কোৱাৰ সিদ্ধান্ত লোৱা হৈছিল। সেই সময়ত পাকিস্তানত ৫০ লাখ আফগান বাস কৰিছিল, আৰু আমি কোনো আফগানক আমেৰিকাক গতাই দিয়া নাছিলো।

हिन्दुस्थान समाचार / অৰৱিন্দ