কাঠমাণ্ডু, ২৭ অক্টোবৰ (হি.স.)। নেপালৰ প্ৰাক্তন প্ৰধানমন্ত্ৰী শ্বেৰ বাহাদুৰ দেওবা আৰু তেওঁৰ পত্নী প্ৰাক্তন বৈদেশিক মন্ত্ৰী ডাঃ অৰ্জু দেওবাই চিকিৎসাৰ বাবে সোমবাৰে নিশা ছিংগাপুৰলৈ যাবলৈ সাজু হৈছে। ইয়াৰ বাবে চৰকাৰৰ অনুমতি বিচাৰিছে।

চৰকাৰে নিযুক্তি দিয়া ন্যায়িক তদন্ত আয়োগে জেন–জি প্ৰতিবাদৰ সময়ত প্ৰতিবাদকাৰীৰ আক্ৰমণৰ বলি হোৱা দেওবা দম্পতীৰ পাছপ’ৰ্ট স্থগিত ৰখাৰ লগতে কাঠমাণ্ডু এৰিবলৈ নিষেধাজ্ঞা আৰোপ কৰিছে।

নেপালী কংগ্ৰেছৰ ভাৰপ্ৰাপ্ত সভাপতি পূৰ্ণ বাহাদুৰ খাডকাই উল্লেখ কৰে যে জেন জি প্ৰতিবাদৰ সময়ত সংঘটিত হোৱা মাৰাত্মক আক্ৰমণত শ্বেৰ বাহাদুৰ দেউভা গুৰুতৰভাৱে আহত হৈছিল, যাৰ ফলত তেওঁৰ মূৰত ১২টা চিলাই হৈছিল। একেদৰে তেতিয়াৰ বৈদেশিক মন্ত্ৰী ড০ অৰ্জু দেওবাও গুৰুতৰভাৱে আঘাতপ্ৰাপ্ত হয়। এই ঘটনাৰ পিছত দুয়োকে সামৰিক সুৰক্ষাৰ অধীনত সামৰিক চিকিৎসালয়ত চিকিৎসা প্ৰদান কৰা হয়।

খাডকাৰ মতে, প্ৰাক্তন প্ৰধানমন্ত্ৰী দেওবাই উঠা বহাত অসুবিধা পাইছে আৰু সঘনাই মূৰ ঘূৰোৱাৰ সন্মুখীন হৈছে। এই কাৰণেই তেওঁক চিকিৎসাৰ বাবে ছিংগাপুৰলৈ লৈ যোৱাৰ ব্য়ৱস্থা কৰা হৈছে। খাডকাই উল্লেখ কৰে যে দেউভা দম্পতীহালে আজি নিশা ১০ বজাত ছিংগাপুৰ এয়াৰলাইন্সৰ বিমানেৰে ছিংগাপুৰলৈ ৰাওনা হ’ব।

তেওঁ কয় যে চৰকাৰৰ পৰা দেওবা দম্পতীহালক দেশ এৰি যোৱাৰ অনুমতি বিচাৰিছে, আৰু তেওঁ আশা কৰিছে যে মানৱীয় আৰু চিকিৎসাজনিত কাৰণত তেওঁলোকক ছিংগাপুৰলৈ যোৱাত বাধা দিয়া নহ’ব।

জেন জিৰ প্ৰতিবাদৰ পিছত মাত্ৰ এবাৰহে ৰাজহুৱা স্থানত উপস্থিত হৈছে শ্বেৰ বাহাদুৰ দেওবা আৰু অৰ্জু দেওবা। দলৰ কেন্দ্ৰীয় সমিতিৰ বৈঠকত অংশগ্ৰহণ কৰি শ্বেৰ বাহাদুৰ দেওবাই সক্ৰিয় ৰাজনীতিৰ পৰা অৱসৰ লোৱাৰ কথা ঘোষণা কৰি পূৰ্ণ বাহাদুৰ খাডকাক দলৰ ভাৰপ্ৰাপ্ত সভাপতি হিচাপে নিযুক্তি দিয়ে। বৈঠকত ড° অৰ্জু দেওবাও উপস্থিত থাকে।

हिन्दुस्थान समाचार / মনোজ কুমাৰ শইকীয়া