হেমিল্টন, ২৭ অক্টোবৰ (হি.স.)। ইংলেণ্ডৰ বিৰুদ্ধে চলি থকা তিনিখন মেচৰ এদিনীয়া শৃংখলাৰ বাবে নিউজিলেণ্ডৰ ক্ৰিকেট দলত অন্তৰ্ভুক্ত হৈছে দ্ৰুত বলাৰ ব্লেয়াৰ টিকনাৰ। বাওঁফালৰ আঘাতৰ বাবে সোমবাৰে শৃংখলাৰ পৰা বাহিৰ হোৱা কাইল জেমিছনৰ ঠাইত টিকনাৰে খেলিব।
৩২ বছৰীয়া টিকনাৰে নিউজিলেণ্ডৰ হৈ এই পৰ্যন্ত ১৩খন এদিনীয়া খেলি ১৬টা উইকেট দখল কৰিছে। ২০২৩ চনৰ পিছত প্ৰথমবাৰৰ বাবে আন্তঃৰাষ্ট্ৰীয় ক্ৰিকেটলৈ ঘূৰি আহিছে।
মুখ্য প্ৰশিক্ষক ৰব ৱালটাৰে টিকনাৰক জেমিছনৰ সম্ভাৱ্য প্ৰতিস্থাপক হিচাপে অভিহিত কৰে। তেওঁ কয়, ব্লেয়াৰ এজন অভিজ্ঞ খেলুৱৈ আৰু আন্তঃৰাষ্ট্ৰীয় ক্ৰিকেটত ভালদৰে পৰিচিত। তেওঁ উচ্চতাৰ পৰা বলিং কৰে আৰু তেওঁৰ বলত বাউন্স তথা আক্ৰমণাত্মকতা আছে। গতিকে তেওঁ কাইলৰ ভূমিকা ভালদৰে পালন কৰিব পাৰে।
ইয়াৰ পূৰ্বে দেওবাৰে বে অ’ভেলত অনুষ্ঠিত হোৱা প্ৰথমখন এদিনীয়া খেলত নিউজিলেণ্ডে ইংলেণ্ডক ৪ উইকেটত পৰাস্ত কৰে। ইংলেণ্ডৰ বেটছমেন হেৰী ব্ৰুকে এক চমকপ্ৰদ ইনিংছ খেলিছিল যদিও দলটোক জয়ৰ দিশত আগুৱাই নিব পৰা নাছিল।
এতিয়া দুয়োটা দলেই শৃংখলাৰ দ্বিতীয়খন মেচৰ বাবে হেমিল্টনৰ চেডন পাৰ্কত উপস্থিত হৈছে, য’ত বুধবাৰে (২৯ অক্টোবৰ) দ্বিতীয়খন এদিনীয়া খেল অনুষ্ঠিত হ’ব।
हिन्दुस्थान समाचार / অৰৱিন্দ
