নাগপুৰ, ০২ অক্টোবৰ (হি.স.)। ৰাষ্ট্ৰীয় স্বয়ংসেৱক সংঘ (আৰএছএছ)ৰ সৰসংঘচালক ডা০ মোহন ভাগৱতে আজি বৃহস্পতিবাৰে উল্লেখ কৰে যে হিংসা কোনো সমস্যাৰ সমাধান হ’ব নোৱাৰে। সমাজত যদি সৰ্বাংগীন পৰিৱৰ্তন আনিব লাগে, তেন্তে গণতান্ত্ৰিক উপায়েৰেহে সেয়া সম্ভৱ হ’ব। প্ৰায় ৪০ মিনিটৰ ভাষণত ডা০ ভাগৱতে সমাজত ঘটি থকা পৰিৱৰ্তন, চুবুৰীয়া দেশৰ অস্থিৰতা, আমেৰিকাৰ শুল্ক, চৰকাৰৰ মনোভাৱ, জনশান্তি আদিকে ধৰি কেইবাটাও জৰুৰী বিষয়ৰ ওপৰত আলোকপাত কৰে।

ডা০ ভাগৱতে বৃহস্পতিবাৰে আৰ এছ এছৰ প্ৰতিষ্ঠাৰ ১০০ বছৰীয়া জয়ন্তী উপলক্ষে ৰেশমবাগ খেলপথাৰত অনুষ্ঠিত বিজয়াদশমী উদযাপনত ভাষণ প্ৰদান কৰে। ডা° ভাগৱতৰ সৈতে মঞ্চত উপস্থিত থাকে প্ৰাক্তন ৰাষ্ট্ৰপতি ৰামনাথ কোবিন্দ, বিদৰ্ভ প্ৰদেশ সংঘচালক দীপক তামশ্বেট্তীৱাৰ, প্ৰদেশ সহ-সংসঘচালক শ্ৰীধৰজী গডজে, আৰু নাগপুৰ মহানগৰ সংঘচালক ৰাজেশ লয়া।

সমাজত ইচ্ছাকৃতভাৱে ঘৃণা আৰু শত্ৰুতা বিয়পি পৰাত উদ্বেগ প্ৰকাশ কৰি আৰ এছ এছৰ মুৰব্বী ডা০ ভাগৱতে কয় যে পূজাস্থলীৰ অপবিত্ৰকৰণ, মহাপুৰুষৰ বিষয়ে ভুল তথ্য, অনিয়মৰ ঘটনাৰ জৰিয়তে সমাজখনক বিভাজিত কৰাৰ এক ষড়যন্ত্ৰ ৰচনা কৰা হৈছে। এই কাণ্ডসমূহ পূৰ্ব পৰিকল্পিত আৰু নিৰ্দিষ্ট সম্প্ৰদায়ক উত্তেজিত কৰিবলৈ সংঘটিত কৰা হয়। এনে জালত বন্দী হোৱাটো ৰাষ্ট্ৰীয় স্বাৰ্থৰ বিৰুদ্ধে।

শাসন ব্যৱস্থা পৰিৱৰ্তনৰ বাবে শ্ৰীলংকা, বাংলাদেশ, নেপাল আদি দেশত সংঘটিত হোৱা হিংসাত্মক ঘটনাৰ কথা উল্লেখ কৰি ডা০ ভাগৱতে কয় যে অস্থিৰতা বিয়পোৱা শক্তিসমূহ ভাৰততো সক্ৰিয়, আৰু সেইবোৰ চিনাক্ত কৰি সময়মতে বন্ধ কৰিব লাগিব। চুবুৰীয়া দেশসমূহত শান্তি আৰু স্থিতিশীলতা বজাই ৰখাটো ভাৰতৰ সমৃদ্ধিৰ বাবে অতি গুৰুত্বপূৰ্ণ।

তেওঁ কয় যে হিন্দু, হিন্দুস্থান, ভাৰতীয়, আৰ্য—এই সকলোবোৰ সমাৰ্থক শব্দ, কিন্তু আমাৰ ৰাষ্ট্ৰীয় পৰিচয় স্পষ্টকৈ প্ৰতিফলিত কৰা শব্দটো হ’ল হিন্দু। আমাৰ ৰাষ্ট্ৰখন ৰাজ্যৰ সীমাৰ ওপৰত ভিত্তি কৰি নহয়, বৰঞ্চ সংস্কৃতিৰ ভেটিত গঢ় লৈ উঠিছে। ৰাজ্য আহে আৰু যায়, কিন্তু ৰাষ্ট্ৰ চিৰন্তন হৈ থাকে। সেইবাবেই আমাৰ ৰাষ্ট্ৰ খন অনাদি কালৰ পৰাই হিন্দু ৰাষ্ট্ৰ হৈ আহিছে।

২০২৫ চনৰ ২২ এপ্ৰিলত পেহেলগামত পাকিস্তানৰ পৰা অহা সন্ত্ৰাসবাদীয়ে ২৬ জন পৰ্যটকক নৃশংসভাৱে ধৰ্মীয় হত্যাৰ সন্দৰ্ভত ডা০ ভাগৱতে কয় যে এই আক্ৰমণে সমগ্ৰ ৰাষ্ট্ৰ খনক শোক, দুখ, ক্ষোভত ডুবাই পেলালে। ইয়াৰ প্ৰতিক্ৰিয়া স্বৰূপে ভাৰত চৰকাৰে সু-পৰিকল্পিত ব্যৱস্থা গ্ৰহণ কৰে। তেওঁ কয় যে এই কাণ্ডই আমাক শিকাইছে যে আমি সকলোৰে সৈতে বন্ধুত্বপূৰ্ণ সম্পৰ্ক বজাই ৰাখিব পাৰো যদিও নিজৰ নিৰাপত্তাৰ প্ৰতি সজাগ হৈ থাকিব লাগিব। ভাগৱতে কয় যে এই ঘটনাৰ পিছত আমি কোনবোৰ দেশ ভাৰতৰ প্ৰকৃত বন্ধু আৰু কোনবোৰ শত্ৰু সেই কথাও দেখিবলৈ পালোঁ।

আত্মনিৰ্ভৰশীল ভাৰত সময়ৰ প্ৰয়োজন

মহাত্মা গান্ধীৰ জন্ম বাৰ্ষিকী উপলক্ষে ভাগৱতে কয় যে গান্ধীজী আছিল স্বাধীনতা সংগ্ৰামৰ মূল স্থপতি। স্বাধীন ভাৰতৰ স্বাৱলম্বী উন্নয়নৰ দৃষ্টিভংগীত তেওঁৰ অৱদান অতি গুৰুত্বপূৰ্ণ। আমেৰিকাৰ বাণিজ্য নীতিৰ কথা উল্লেখ কৰি ভাগৱতে কয় যে আজিৰ পৃথিৱীখন পাৰস্পৰিক আন্তঃনিৰ্ভৰশীল, কিন্তু আত্মনিৰ্ভৰশীলতা অবিহনে কোনো উপায় নাই। তেওঁ থলুৱা সামগ্ৰীৰ ব্যৱহাৰ আৰু আত্মনিৰ্ভৰ ভাৰতৰ ধাৰণাক সময়ৰ প্ৰয়োজনীয়তা বুলি অভিহিত কৰে।

শাখা হৈছে নেতৃত্ব, চৰিত্ৰ, দেশপ্ৰেমৰ বিদ্যালয়

সংঘৰ শাখাসমূহ কেৱল শাৰীৰিক প্ৰশিক্ষণৰ মাধ্যম নহয়, বৰঞ্চ ৰাষ্ট্ৰীয়তাবাদ, নেতৃত্ব, চৰিত্ৰ গঠন, দেশপ্ৰেমৰ সংগম। সমাজ সংগঠিত হ’লে কোনো অৱতাৰ, নেতা, চৰকাৰৰ ওপৰত নিৰ্ভৰ কৰাৰ প্ৰয়োজন নাই। সমাজে নিজৰ শক্তিৰ জৰিয়তে পৰিৱৰ্তন আনে। ডা° ভাগৱতে কয় যে আৰ এছ এছৰ মূল উদ্দেশ্য হৈছে এনে এখন সমাজ গঢ়ি তোলা যিয়ে ৰাষ্ট্ৰৰ সকলো দায়িত্ব নিজৰ শক্তিৰে কান্ধত বহন কৰিব পাৰে। ইয়াৰ বাবে ব্যক্তি আৰু ৰাষ্ট্ৰীয় চৰিত্ৰ গঠন অতি প্ৰয়োজনীয়। এই মূল্যবোধসমূহ শাখাত প্ৰদান কৰা হয়।

ভাৰতক কৰিব লাগিব বিশ্ব গুৰু

আৰ এছ এছৰ মুৰব্বী ভাগৱতে কয় যে ভাৰতীয় সংস্কৃতি হৈছে বসুধৈৱ কুটুম্বকমৰ আত্মাক জীয়াই ৰখা সংস্কৃতি। এই সংস্কৃতিয়ে কেতিয়াও ‘আমি আৰু তেওঁলোক’ৰ মানসিকতাক বিশ্বাস নকৰে। গতিকে ভাৰতক একত্ৰিত কৰি পুনৰ গৌৰৱময় ৰাষ্ট্ৰ কৰি বিশ্বক এক নতুন দিশ প্ৰদান কৰাটো হিন্দু সমাজৰ কৰ্তব্য। এই কামটো যোৱা ১০০ বছৰ ধৰি আৰ এছ এছে কৰি আহিছে।

কোবিন্দে কয় - আৰএছএছত জাতিগত বৈষম্য নাই

প্ৰাক্তন ৰাষ্ট্ৰপতি ৰামনাথ কোবিন্দে কয় যে আৰ এছ এছত জাতিগত বৈষম্য নাই আৰু আৰ এছ এছ সদায় সামাজিক ঐক্যৰ পোষকতা কৰি আহিছে। তেওঁ ড° হেডগেৱাৰ আৰু বাবা চাহেব ভীমৰাও আম্বেদকাৰৰ অৱদানক তেওঁৰ জীৱনত গুৰুত্বপূৰ্ণ বুলি অভিহিত কৰে। ১৯৪৯ চনত বাবা চাহেবে সংবিধান সভাত দিয়া ভাষণৰ কথা উল্লেখ কৰি তেওঁ কয় যে তেওঁলোকৰ চিন্তাধাৰা আৰু আৰ এছ এছৰ চিন্তাৰ মাজত সাদৃশ্য আছে য’ত ঐক্য আছে। পৰিচয় আছে আৰু য'ত বিভাজন আছে তাত অৱনতি ঘটে।

কোবিন্দে কয় যে, ১৯৯১ চনৰ সাধাৰণ নিৰ্বাচনৰ সময়ত আৰ এছ এছৰ মতাদৰ্শ আৰু স্বেচ্ছাসেৱকক লগ পোৱাৰ সুযোগ পাইছিলোঁ। সেই নিৰ্বাচনী প্ৰচাৰৰ সময়ত সমাজৰ বিভিন্ন শ্ৰেণীক লগ পোৱাৰ সুযোগ পাইছিলোঁ। আজিও সমাজৰ বহু লোক অজ্ঞাত যে আৰ এছ এছত কোনো অস্পৃশ্যতা বা জাতিগত বৈষম্য নাই। আৰ এছ এছত কোনো ধৰণৰ জাতিগত বৈষম্য নাই। এই প্ৰসংগত মই ২০০১ চনত লালকিলা চৌহদত আয়োজিত দলিত সংগম ৰেলীৰ কথা উল্লেখ কৰিব বিচাৰিছো। কিছু সংখ্যক লোকে অটলজীক দলিত বিৰোধী বুলি বদনাম কৰিছিল। অটলজীয়ে কৈছিল যে আমি আম্বেদকাৰবাদী। ভীম স্মৃতি মানে ভাৰতৰ সংবিধান। মনু স্মৃতিৰ আধাৰত আমাৰ চৰকাৰে কাম নকৰে। ভীম স্মৃতি অৰ্থাৎ ভাৰতৰ সংবিধানৰ আধাৰত আমাৰ চৰকাৰে কাম কৰিব। ৰাষ্ট্ৰপতিৰ পদত অধিষ্ঠিত হোৱাৰ সময়ত সাংবিধানিক মূল্যবোধ আৰু বাবা চাহেবৰ মূল্যবোধক অগ্ৰাধিকাৰ দিছিলোঁ।

প্ৰাক্তন ৰাষ্ট্ৰপতি কোবিন্দে কয়, বিজয়াদশমীৰ দিনা সকলোকে আন্তৰিক শুভেচ্ছা। আজি মহাত্মা গান্ধী আৰু লাল বাহাদুৰ শাস্ত্ৰীৰ জন্ম জয়ন্তী হোৱাটো এক সুখৰ কাকতলীয়া কথা। এই উপলক্ষে তেওঁলোকক শ্ৰদ্ধাঞ্জলি জনাইছো। সৰ্ববৃহৎ স্বেচ্ছাসেৱী সংগঠনটোৰ শতবাৰ্ষিকী উদযাপনৰ কাৰ্যসূচী। বাবা চাহেবে তেওঁৰ মিছন আৰম্ভ কৰা ঠাইখন ভ্ৰমণ কৰাৰ সৌভাগ্য হৈছিল। ডা° হেডগেৱাৰ, শ্ৰী গুৰুজী, আৰু ৰজ্জু ভাইয়ালৈ মোৰ আন্তৰিক শ্ৰদ্ধাঞ্জলি। ডা° হেডগেৱাৰে সংগঠনৰ বীজ ৰোপণ কৰিছিল, গুৰুজীয়ে ইয়াৰ শিপা মজবুত কৰিছিল, অৰ্থনৈতিক পৰিৱৰ্তনৰ মাজত ৰজ্জু ভাইয়াই সংঘক পথ প্ৰদৰ্শন কৰিছিল। কোবিন্দে আৰু কয় যে ডাঃ হেডগেৱাৰ আৰু ডাঃ আম্বেদকাৰে তেওঁৰ জীৱন গঢ় দিয়াত গুৰুত্বপূৰ্ণ ভূমিকা পালন কৰিছিল।

हिन्दुस्थान समाचार / অৰৱিন্দ