গুৱাহাটী, ১৯ অক্টোবৰ(হি.স.)। অসমৰ প্ৰখ্যাত গায়ক জুবিন গাৰ্গৰ অকাল মৃত্যুৰ এমাহ সম্পূৰ্ণ হোৱাৰ বাবে আজি গুৱাহাটীত বিৰোধী দলসমূহে এক বৃহৎ শ্ৰদ্ধাঞ্জলি অনুষ্ঠান আৰু ন্যায় সমাৱেশৰ আয়োজন কৰিছে।

গুৱাহাটীৰ দীঘলীপুখুৰীৰ লক্ষীধৰ বৰা খেলপথাৰত আয়োজন কৰা এই অনুষ্ঠানত সকলো শ্ৰেণীৰ লোক-ৰাজনৈতিক নেতা, সামাজিক সংগঠন, সাংস্কৃতিক সংগঠন, অনুৰাগী—প্ৰয়াত গায়ক গৰাকীৰ জীৱন, উত্তৰাধিকাৰ, কলাত্মক প্ৰতিভাক স্মৰণ কৰিবলৈ সমবেত হ’ব।

অসম প্ৰদেশ কংগ্ৰেছ কমিটি, চিপিআই(এম), চিপিআই, চিপিআই(এমএল), অল ইণ্ডিয়া ফৰৱাৰ্ড ব্লক (অসম ইউনিট), আসম জাতীয় পৰিষদ (এজেপি), ৰাইজৰ দল, আম আদমি পাৰ্টি (আপ), আৰু তৃণমূল কংগ্ৰেছ (অসম ইউনিট)কে ধৰি কেইবাটাও ৰাজনৈতিক আৰু সামাজিক গোটৰ যৌথ উদ্যোগত এই শ্ৰদ্ধাঞ্জলি অনুষ্ঠানৰ আয়োজন কৰা হৈছে।

অসম প্ৰদেশ কংগ্ৰেছৰ সভাপতি গৌৰৱ গগৈৰ নেতৃত্বত সুপ্ৰকাশ তালুকদাৰ, কনক গগৈ, বিবেক দাস, মিহিৰ নন্দী, অখিল গগৈ, ডাঃ ভৰেন চৌধুৰী, লুৰিনজ্যোতি গগৈ, দুলু আহমেদ আৰু অজিত কুমাৰ ভূঞাই ইয়াত অংশগ্ৰহণ কৰিব।

আয়োজকসকলে ছাত্ৰ-ছাত্ৰী, শিক্ষক, স্থানীয় ক্লাব আৰু সাধাৰণ জনতাক উপস্থিত থাকিবলৈ আৰু শান্তিপূৰ্ণভাৱে আৰু পৰম মৰ্যাদাৰে শ্ৰদ্ধাঞ্জলি জনাবলৈ আহ্বান জনাইছে।

অসমৰ অন্যতম প্ৰিয় আৰু বহু প্ৰতিভাশালী শিল্পী হিচাপে গণ্য কৰা জুবিন গাৰ্গে যোৱা ১৯ ছেপ্টেম্বৰত ছিংগাপুৰত শেষ নিশ্বাস ত্যাগ কৰে। তেওঁ ৰাজ্যৰ সাংস্কৃতিক আৰু সংগীত ঐতিহ্যত এক চিৰ যুগমীয়া চাপ ৰাখি গৈছে। এই শ্ৰদ্ধাঞ্জলি সমাৱেশ কেৱল তেওঁৰ স্মৃতিক সন্মান জনোৱাই নহয়, তেওঁৰ মৃত্যুক কেন্দ্ৰ কৰি ন্যায়ৰ সৰ্বসন্মতিক্ৰমে দাবী পুনৰবাৰ উত্থাপন কৰাৰ প্ৰয়াস, যিয়ে সমগ্ৰ অঞ্চলজুৰি তেওঁৰ অনুৰাগী সকলৰ মাজত গভীৰ আৱেগ জগাই ৰাখিছে।

হিন্দুস্থান সমাচাৰ / অৰৱিন্দ