–মই সাংসদ হৈ থাকোঁ বা নহওঁ, লক্ষ্ণৌৰ উন্নয়নৰ প্ৰতি আমাৰ দায়বদ্ধতা থাকিব- প্ৰতিৰক্ষা মন্ত্ৰী

লক্ষ্ণৌ, ১৯ অক্টোবৰ (হি.স.)। প্ৰতিৰক্ষা মন্ত্ৰী তথা আঞ্চলিক সাংসদ ৰাজনাথ সিঙে দেওবাৰে লক্ষ্ণৌত ভাৰত ৰত্ন অটল বিহাৰী বাজপেয়ী আৰু প্ৰাক্তন ৰাষ্ট্ৰপতি ড° এ পি জে আব্দুল কালামৰ প্ৰতিমূৰ্তি উন্মোচন কৰে। লগতে জাংকিপুৰম চেক্টৰ এফত এটা কমিউনিটি চেণ্টাৰ আৰু ছেক্টৰ ছয়ত এটা পুথিভঁৰাল উদ্বোধন কৰে।

এই উপলক্ষে লক্ষ্ণৌৰ সাংসদ তথা প্ৰতিৰক্ষা মন্ত্ৰী ৰাজনাথ সিঙে কয়, মই সাংসদ হৈ থাকোঁ বা নহওঁ, লক্ষ্ণৌৰ উন্নয়নৰ প্ৰতি মোৰ সম্পূৰ্ণ দায়বদ্ধতা থাকিব। মই যি পাৰো কৰিবলৈ চেষ্টা কৰিছো। ৰাজনাথ সিঙে কয় যে লক্ষ্ণৌত বিশ্বৰ আন দেশৰ সৈতে বিমান সংযোগ থাকিব লাগে। ইয়াৰ বাবে প্ৰচেষ্টা অব্যাহত আছে।

তেওঁ কয় যে হিন্দুস্তান এৰ’নটিক্স লিমিটেডে উল্লেখযোগ্য কাম কৰি আছে। মানুহে বিয়া বাৰু পাতিবলৈ ঠাই বিচাৰি হাবাথুৰি খাইছিল। লক্ষ্ণৌৰ প্ৰতিটো বিধানসভা সমষ্টিত এটা বৃহৎ কমিউনিটি চেণ্টাৰ স্থাপন কৰা হ’ব। ইয়াৰ ৰক্ষণাবেক্ষণৰ বাবে মাত্ৰ সামান্য ধনৰ প্ৰয়োজন হ’ব। প্ৰতিৰক্ষা মন্ত্ৰীগৰাকীয়ে কয় যে এখনো পাৰ্ক মুকলি জিম নোহোৱাকৈ থাকিব নালাগে। লক্ষ্ণৌৰ ৩০১খন পাৰ্কত মুকলি জিম মুকলি কৰা হৈছে, আৰু আজিৰে পৰা ২৫০টা স্থান মুকলি কৰা হ’ব। লক্ষ্ণৌত স্থাপন কৰা হৈছে ১২৫০টা সৌৰ লাইট। ২৫খন উৰণীয়া সেতুৰ অনুমোদন লাভ কৰা হৈছে, ইয়াৰে ১৪খন সম্পূৰ্ণ হৈছে। ইয়াৰ উপৰিও আৰু ১১খন উৰণীয়া সেতুৰ অনুমোদন দিয়া হৈছে।

ৰাজনাথ সিঙে কয় যে লক্ষ্ণৌ উন্নয়নৰ পথত দ্ৰুতগতিত আগবাঢ়িছে। আমাৰ লক্ষ্ণৌও বিশ্বৰ শীৰ্ষ ১০ খন চহৰৰ ভিতৰত অন্যতম হৈ পৰিছে। মই বিচাৰো এই লক্ষ্ণৌ এক নম্বৰ হোৱাটো। আমাৰ চহৰখন বিশ্বমানৰ হ’ব লাগে। মাত্ৰ কেইদিনমানৰ আগতে স্বচ্ছ ভাৰত জৰীপত লক্ষ্ণৌ ভাৰতৰ শীৰ্ষ তিনিখন চহৰৰ ভিতৰত নিৰ্বাচিত হৈছিল। উত্তৰ প্ৰদেশত এক নম্বৰ আৰু ভাৰতত তিনি নম্বৰ। আমি লক্ষ্ণৌক পৰিষ্কাৰ-পৰিচ্ছন্নতাৰ ক্ষেত্ৰত এক নম্বৰ হিচাপে গঢ়ি তুলিবলৈ চেষ্টা কৰা উচিত। মোৰ দৃষ্টিভংগী হ’ল লক্ষ্ণৌক এখন বিশ্বমানৰ চহৰ হিচাপে গঢ়ি তোলা য’ত পৰম্পৰা আৰু আধুনিকতাৰ এক আচৰিত সংমিশ্ৰণ থাকিব।

এই অনুষ্ঠানত উপ-মুখ্যমন্ত্ৰী ব্ৰজেশ পাঠক, ৰাজ্যসভাৰ সাংসদ ড° দীনেশ শৰ্মা, ৰাজ্যসভাৰ সাংসদ ব্রিজলাল, মেয়ৰ সুষমা খাৰৱাল, এম এল চি মুকেশ শৰ্মা, ৰামচন্দ্ৰ প্ৰধান, বিজেপি মহানগৰ সভাপতি আনন্দ দ্বিবেদী, বিধায়ক নীৰজ বৰা, যোগেশ শুক্লা, ৰাম অৱতাৰ কনাউজিয়া, সৌৰভ বাল্মিকী,কে ধৰি বিশিষ্ট ব্যক্তি উপস্থিত থাকে। কাৰ্যসূচীৰ অন্তত প্ৰতিৰক্ষা মন্ত্ৰী ৰাজনাথ সিং আৰু উপ-মুখ্যমন্ত্ৰী ব্ৰজেশ পাঠকে কাউন্সিলাৰ ৰাজকুমাৰী মৌৰ্যৰ বাসগৃহত উপস্থিত হৈ তেওঁৰ মাতৃৰ প্ৰতিচ্ছবিত শ্ৰদ্ধাঞ্জলি জনায়। অলপতে তেওঁৰ মাতৃৰ মৃত্যু হৈছিল।

हिन्दुस्थान समाचार / মনোজ কুমাৰ শইকীয়া