নতুন দিল্লী, ১৬ অক্টোবৰ (হি.স.)। দৈনিক উপভোক্তা সামগ্ৰী নিৰ্মাতা প্ৰতিষ্ঠান নেচলে ইণ্ডিয়া লিমিটেডে চলিত বিত্তীয় বৰ্ষৰ দ্বিতীয় ত্ৰৈমাসিকৰ ফলাফল ঘোষণা কৰিছে। ৩০ ছেপ্টেম্বৰত সমাপ্ত হোৱা জুলাই-ছেপ্টেম্বৰ ত্ৰৈমাসিকৰ বাবে নেচলেৰ সমন্বিত নিকা লাভ ১৭.৩৭ শতাংশ হ্ৰাস পাই ৭৪৩.১৭ কোটি ₹ হৈছে। পূৰ্বৰ বিত্তীয় বৰ্ষৰ একে সময়ছোৱাত কোম্পানীটোৱে ৮৯৯.৫ কোটি টকাৰ নিকা লাভ লাভ কৰিছিল।

নেচলে ইণ্ডিয়া লিমিটেডে বৃহস্পতিবাৰে ষ্টক এক্সচেঞ্জত দাখিল কৰা এক তথ্যত প্ৰকাশ কৰা অনুসৰি চলিত বিত্তীয় বৰ্ষৰ দ্বিতীয় ত্ৰৈমাসিকত তেওঁলোকৰ ৰাজহ ১১ শতাংশ বৃদ্ধি পাই ৫,৬৩০.২৩ কোটি টকা হৈছে, যিটো পূৰ্বৰ বিত্তীয় বৰ্ষৰ একে সময়ছোৱাত ৫,০৭৪.৭৬ কোটি টকা আছিল। এই সময়ছোৱাত কোম্পানীটোৰ মুঠ খৰচ ১২.৯ শতাংশ বৃদ্ধি পাই ৪,৬১৬.৭৩ কোটি ₹ হৈছে। কোম্পানীটোৱে জনোৱা মতে, জুলাই-ছেপ্টেম্বৰ ত্ৰৈমাসিকত নেচলে ইণ্ডিয়াৰ ঘৰুৱা বিক্ৰী ১০.৮ শতাংশ বৃদ্ধি পাই ৫,৪১১.০২ কোটি টকা হৈছে, যিটো পূৰ্বৰ বিত্তীয় বৰ্ষৰ একে সময়ছোৱাত ৪,৮৮৩.১৪ কোটি টকা আছিল। এই সময়ছোৱাত ৰপ্তানি ১৪.৪ শতাংশ বৃদ্ধি পাই ২১৯.২১ কোটি ₹ হৈছে।

কোম্পানীটোৰ অধ্যক্ষ তথা পৰিচালন সঞ্চালক মনীষ তিৱাৰীয়ে কয় যে ঘৰুৱা বিক্ৰী দুটা সংখ্যাৰ হাৰত বৃদ্ধি পাইছে, মূলতঃ বৃদ্ধি পোৱা পৰিমাণৰ বাবে। হাৰিয়ানাৰ গুৰগাঁৱত মুখ্য কাৰ্যালয় থকা চুইজাৰলেণ্ডৰ বহুজাতিক কোম্পানী নেচলেৰ ভাৰতীয় সহযোগী প্ৰতিষ্ঠান নেচলে ইণ্ডিয়া লিমিটেড। কোম্পানীটোৰ সামগ্ৰীৰ ভিতৰত আছে খাদ্য, পানীয়, চকলেট, মিঠাই।

हिन्दुस्थान समाचार / অৰৱিন্দ