কলকাতা, ১৬ অক্টোবৰ (হি.স.)। পশ্চিম বংগত বালি সৰবৰাহৰ গোচৰৰ তদন্তৰ বাবে বৃহস্পতিবাৰে পুৱা প্ৰৱৰ্তন সঞ্চালকালয়ে আন এক বৃহৎ অভিযান আৰম্ভ কৰে। ইডিৰ বিষয়াসকলে পুৱা পুৱাই কলকাতা, ঝাৰগ্ৰাম, আছানছলকে ধৰি সমগ্ৰ ৰাজ্যৰ সাতটা স্থানত একেলগে অভিযান চলায়। ইডিৰ দলসমূহে কলকাতাৰ বাণ্টিং ষ্ট্ৰীট, ঝাৰগ্ৰামৰ লালগড় আৰু গোপীবল্লভপুৰ, আৰু আছানছলৰ মুৰগাছল অঞ্চলত উপস্থিত হোৱা বুলি জানিব পৰা গৈছে।
সূত্ৰ অনুসৰি, বালি সৰবৰাহৰ সৈতে জড়িত বিত্তীয় লেনদেনৰ তদন্তৰ অংশ হিচাপে এই কাৰ্য্য গ্ৰহণ কৰা হৈছে। যোৱা মাহত ইডিয়ে ঝাৰগ্ৰামৰ গোপীবল্লভপুৰ অঞ্চলত শ্বেখ জহিৰুল শ্বেখ নামৰ এজন লোকৰ ঘৰত অভিযান চলাইছিল। স্থানীয় লোকে জনোৱা মতে, তেওঁ পূৰ্বে গাঁৱৰ আৰক্ষী বিষয়া হিচাপে কাম কৰিছিল যদিও পিছত চাকৰি এৰি বালিৰ ব্যৱসায়ত নামি পৰে, যাৰ ফলত তেওঁৰ ধন দ্ৰুতগতিত বৃদ্ধি পায়।
সেই অভিযানৰ প্ৰায় এমাহৰ পিছত এই নতুন ইডি অভিযান। এই কাৰ্য ৰাজ্যৰ অবৈধ বালিৰ ব্যৱসায়ৰ গভীৰ তদন্তৰ অংশ বুলি অনুমান কৰা হৈছে।
মন কৰিবলগীয়া যে শেহতীয়াকৈ ইডিয়ে পৌৰসভাৰ নিযুক্তি কেলেংকাৰীৰ তদন্ত তীব্ৰতৰ কৰি তুলিছে। সেই সময়ত সংস্থাটোৱে ৰাজ্য মন্ত্ৰী সুজিত বসুৰ ছল্ট লেক কাৰ্যালয়কে ধৰি কেইবাটাও স্থানত অভিযান চলাইছিল।
ৰাজ্যত ইডিৰ অবিৰত কাৰ্যকলাপে ৰাজনৈতিক মহলত আলোড়নৰ সৃষ্টি কৰিছে। সংস্থাটোৱে কয় যে এই অভিযানসমূহ কেৱল অবৈধ লেনদেন আৰু ধন সৰবৰাহৰ তদন্তৰ অংশ হিচাপেহে চলোৱা হৈছে, য’ত কেইবাজনো ব্যৱসায়ী আৰু প্ৰভাৱশালী ব্যক্তিৰ ভূমিকা তদন্ত কৰা হৈছে।
हिन्दुस्थान समाचार / মনোজ কুমাৰ শইকীয়া
