ডিব্ৰুগড়, ১৫ অক্টোবৰ (হি.স.): ছয় জনগোষ্ঠীৰ জনজাতিকৰণক লৈ উত্তাল হৈ পৰিছে ৰাজ্য়ৰ ৰাজনীতি। জনজাতিকৰণ বিচাৰি মৰাণ-মটক-চাহ জনগোষ্ঠীৰ পাছত ৰাজ্যৰ দ্বিতীয় ৰাজধানী ডিব্ৰুগড় মহানগৰ কঁপাই তুলিবলৈ সাজু হৈছে আহোমৰ কেইবাটাও জাতীয় সংগঠন । সেই অনুসৰি অহা ১ নবেম্বৰত ৫০ হাজাৰ আহোম জনগোষ্ঠী লোকৰ উপস্থিতিৰে জোৰ সমদল বাহিৰ কৰাৰ হুংকাৰ দিছে বিজেপি চৰকাৰৰ বিৰুদ্ধে ।
উল্লেখ্য় যে যোৱা কালি মঙলবাৰে আবেলি ডিব্ৰুগড়স্থিত হোটেল ইন্দসুৰিয়াত অনুষ্ঠিত এক সংবাদ মেল যোগে মৰাণ-মটক-চাহ জনগোষ্ঠীৰ নেতাসকলে জনজাতিকৰণক লৈ জনগোষ্ঠী কেইটাই নিজৰ দাবী পুনৰ দোহাৰে। ইফালে জনজাতিকৰণ সন্দৰ্ভত বিতৰ্কিত মন্তব্য আগবঢ়োৱা আদিত্য খাকলাৰীৰ বিৰুদ্ধে সৰৱ হৈ উঠে সংগঠন কেইটাৰ বিষয় ববীয়া সকলে ।
প্ৰণিধানযোগ্য় যে প্রধানমন্ত্রী নৰেন্দ্ৰ মোদী নেতৃত্বাধীন বিজেপি চৰকাৰে ক্ষমতাত অধিষ্ঠিত হ'লে অসমৰ ছয় জনগোষ্ঠী ক্রমে- মৰাণ, মটক, আহোম, কোচ ৰাজবংশী, চুতীয়া আৰু চাহ জনগোষ্ঠীক জনজাতিৰ মর্যদা দিব বুলি বিজেপিয়ে অসমবাসীক নিৰ্বাচনী প্রতিশ্রুতি দিছিল । পৰৱৰ্তী সময়ত চৰকাৰ গঠন কৰাৰ পিছত বিজেপি চৰকাৰৰ জনজাতিকৰণৰ প্ৰতিশ্ৰুতি পূৰণ নহ’ল ৷ দিছপুৰতেই চৰকাৰী ৰঙা ফিটাৰ মেৰপেচত আবদ্ধ হৈ থাকিল জনজাতিকৰণৰ বিষয়টো ।
উল্লেখ্য যে, জনজাতিকৰণ সন্দৰ্ভত চলিত বছৰৰ ১ মাৰ্চত ৰাজ্য চৰকাৰে দ্বিতীয়খন মন্ত্ৰীগোটৰ কমিটী গঠন কৰিছিল । মাৰ্চ মাহৰ ভিতৰতে এই মন্ত্ৰীগোটৰ কমিটীখনে তেওঁলোকৰ পৰামৰ্শৰ সৈতে প্রতিবেদন দাখিল কৰাৰ কথা আছিল যদিও সেই প্রতিবেদনখন কেন্দ্রলৈ প্ৰেৰণ নকৰিলে ৷ সংসদত কেন্দ্ৰীয় মন্ত্ৰীগৰাকীযে ২০১৯ চনত গৃহ বিভাগৰ নিৰ্দেশমতে ৰাজ্য চৰকাৰে গঠন কৰা মন্ত্ৰীগোটৰ কমিটীখনে দিয়া পৰামৰ্শৰ বিষয়ে উল্লেখ কৰে ।
হিন্দুস্থান সমাচাৰ / কিশোৰ মিশ্ৰ