নতুন দিল্লী, ১২ অক্টোবৰ (হি.স.)। কংগ্ৰেছ দলে দেওবাৰে অভিযোগ কৰে যে বিজেপি নেতৃত্বাধীন চৰকাৰখনে ২০১৯ চনত তথ্যৰ অধিকাৰ আইন সংশোধন কৰি ইয়াৰ মনোভাৱ দুৰ্বল কৰি তুলিছে।

আজি তথ্যৰ অধিকাৰ আইন প্ৰণয়নৰ ২০ বছৰ সম্পূৰ্ণ হ'ল। ২০০৫ চনত কংগ্ৰেছ নেতৃত্বাধীন ইউ পি এ চৰকাৰে এই আইন প্ৰৱৰ্তন কৰে। এই উপলক্ষে কংগ্ৰেছ দলে সংবাদমেল অনুষ্ঠিত কৰে।

সংবাদমেলত দলৰ সাধাৰণ সম্পাদক জয়ৰাম ৰমেশে কয় যে এই আইনখনে পূৰ্বে নাগৰিক আৰু সংবাদ মাধ্যমক চৰকাৰী কামৰ বিষয়ে স্বচ্ছতা আৰু তথ্যৰ সুবিধা প্ৰদান কৰিছিল যদিও ২০১৯ চনৰ সংশোধনীসমূহে ইয়াৰ ক্ষমতা সীমিত কৰি জবাবদিহিতাত প্ৰভাৱ পেলাইছে।

ৰমেশে উল্লেখ কৰে যে তথ্যৰ অধিকাৰ আইনখনৰ খচৰা প্ৰস্তুত কৰাৰ সময়ত ইয়াক স্থায়ী সমিতিলৈ প্ৰেৰণ কৰা হৈছিল। ড০ মনমোহন সিং নেতৃত্বাধীন চৰকাৰে স্থায়ী সমিতিৰ সকলো পৰামৰ্শ গ্ৰহণ কৰি প্ৰয়োজনীয় সকলো সংশোধনীৰে আইনখন গৃহীত কৰে। কিন্তু ২০১৯ চনত স্থায়ী সমিতিৰ পৰামৰ্শ দিয়া সংশোধনী মোডী চৰকাৰে নাকচ কৰি আইনখনক প্ৰথমটো বৃহৎ আঘাত কৰে।

তেওঁ কয় যে পূৰ্বে কোনো চৰকাৰী বিভাগৰ পৰা তথ্য উপলব্ধ নহ’লে মানুহে তথ্য লাভৰ বাবে তথ্যৰ অধিকাৰ আইন ব্যৱহাৰ কৰিব পাৰিছিল। অৱশ্যে ২০১৯ চনৰ সংশোধনীৰ ফলত কেইবাটাও গুৰুত্বপূৰ্ণ ক্ষেত্ৰত তথ্যৰ প্ৰৱেশত প্ৰভাৱ পৰিছিল। তেওঁ কয় যে চৰকাৰে লাখ লাখ লোকৰ হাতত ভুৱা ৰেচন কাৰ্ড আছে বুলি দাবী কৰিছিল, যিটো তথ্যৰ অধিকাৰ আইনৰ অধীনত বিচৰা তথ্যই মিছা বুলি প্ৰমাণিত হৈছে। বিমুদ্ৰাকৰণৰ চাৰি ঘণ্টা পূৰ্বে আৰ বি আইৰ কেন্দ্ৰীয় সমিতিৰ বৈঠকত বিমুদ্ৰাকৰণে ক’লা ধনৰ ওপৰত কোনো প্ৰভাৱ নপৰে বুলি উল্লেখ কৰে। তদুপৰি তথ্যৰ অধিকাৰ আইনৰ জৰিয়তে চৰকাৰৰ পৰা এনপিএ ডিফল্ট আৰু ডিফল্টৰ তালিকা বিচৰা হৈছিল। দেশলৈ কিমান ক’লা ধন ঘূৰাই দিয়া হৈছে সেই সন্দৰ্ভতো তথ্য বিচৰা হৈছিল যদিও কোনো ক’লা ধন ঘূৰাই দিয়া হোৱা নাই বুলি জানিব পৰা গৈছে। ৰমেশে কয় যে এই সংশোধনীসমূহে জনসাধাৰণৰ তথ্যৰ প্ৰৱেশ সীমিত কৰি আইনখনৰ মূল উদ্দেশ্য দুৰ্বল কৰি তুলিছে।

हिन्दुस्थान समाचार / মনোজ কুমাৰ শইকীয়া