নতুন দিল্লী, ১২ অক্টোবৰ (হি.স.)। তথ্যৰ অধিকাৰ আইন ২০০৫ৰ ২০ বছৰীয়া জয়ন্তী উপলক্ষে কংগ্ৰেছৰ সভাপতি মল্লিকাৰ্জুন খৰ্গে কয় যে তথ্যৰ অধিকাৰ আইনখনে প্ৰথমে স্বচ্ছতা আৰু জবাবদিহিতাৰ নতুন যুগৰ ভেটি স্থাপন কৰিছিল যদিও বিগত ১১ বছৰত কেন্দ্ৰীয় চৰকাৰে এই আইনখনক পদ্ধতিগতভাৱে দুৰ্বল কৰি গণতন্ত্ৰ আৰু নাগৰিকৰ অধিকাৰক ক্ষতিগ্ৰস্ত কৰিছে।

খৰ্গে নিজৰ পোষ্টত লিখিছে যে ২০ বছৰ পূৰ্বে কংগ্ৰেছ নেতৃত্বাধীন ইউ পি এ চৰকাৰে তেতিয়াৰ প্ৰধানমন্ত্ৰী ড০ মনমোহন সিঙৰ নিৰ্দেশনাত আৰ টি আই আইন প্ৰণয়ন কৰিছিল। দুৰ্নীতিৰ বিৰুদ্ধে যুঁজ দিয়া, চৰকাৰী জবাবদিহিতা ৰক্ষা আৰু জনস্বাৰ্থ ৰক্ষাৰ বাবে এই আইনখন আছিল এক শক্তিশালী আহিলা, যদিও ২০১৪ চনৰ পিছত ইয়াৰ মূল উদ্দেশ্যক ধাৰাবাহিকভাৱে আক্ৰমণ কৰা হৈছিল।

তেওঁ কয় যে ২০১৯ চনত মোডী চৰকাৰে এই আইনখন সংশোধন কৰি তথ্য আয়ুক্তৰ কাৰ্যকাল আৰু দৰমহা নিয়ন্ত্ৰণ কৰি স্বতন্ত্ৰ বিষয়াক আমোলালৈ হ্ৰাস কৰিছিল। ২০২৩ চনত কাৰ্যকৰী হোৱা ডিজিটেল ব্যক্তিগত তথ্য সুৰক্ষা আইনখনে আৰ টি আইৰ জনস্বাৰ্থৰ উপাদানটোক প্ৰভাৱিত কৰাৰ লগতে দুৰ্নীতিৰ তদন্তত বাধাৰ সৃষ্টি কৰিছিল।

কেন্দ্ৰীয় তথ্য আয়োগৰ মুখ্য তথ্য আয়ুক্তৰ পদ পূৰণ নোহোৱাকৈয়ে আছে, আৰু ১৫ মাহ ধৰি ৮টা পদ খালী হৈ থকাৰ ফলত আপীল প্ৰক্ৰিয়া মন্থৰ হৈ পৰিছে আৰু হাজাৰ হাজাৰ লোক ন্যায়ৰ পৰা বঞ্চিত হৈছে।

তেওঁ দাবী কৰে যে চৰকাৰে ক’ভিড মহামাৰীৰ সময়ত হোৱা মৃত্যু আৰু তথ্যৰ তথ্য, ২০১৭-১৮ চনৰ ৰাষ্ট্ৰীয় জনসংখ্যা জৰীপ, ২০১৬-২০২০ চনৰ কৃষি সমীক্ষা, পি এম কেয়াৰছ পুঁজিৰ জবাবদিহিতাৰ পৰা হাত সাৰিবলৈ লুকুৱাই ৰাখিছিল।

কংগ্ৰেছৰ সভাপতিগৰাকীয়ে কয় যে এতিয়া আৰ টি আই আইনখনৰ মূল উদ্দেশ্য সুৰক্ষিত কৰা আৰু নাগৰিকে তেওঁলোকৰ তথ্য লাভ কৰাটো নিশ্চিত কৰাটো আৰু অধিক গুৰুত্বপূৰ্ণ।

हिन्दुस्थान समाचार / মনোজ কুমাৰ শইকীয়া