কোকৰাঝাৰ, ১২ অক্টোবৰ (হি.স.): অল ইণ্ডিয়া ইউনাইটেড ডেমোক্ৰেটিক ফ্ৰণ্ট (এআইইউডিএফ)-ৰ কোকৰাঝাৰ জিলা সভাপতি আনোৱাৰ হুছেইনে নিজৰ পদৰ পৰা পদত্যাগ কৰিছে। প্ৰায় ছয় বছৰৰ পৰা দলৰ সৈতে জড়িত থকা আৰু প্ৰায় পাঁচ বছৰ ধৰি জিলা সভাপতি হিচাপে দায়িত্ব পালন কৰা হুছেইনে নিজৰ পদত্যাগ পত্ৰত ব্যক্তিগত কাৰণ উল্লিখিত কৰিছে আৰু তেওঁৰ কাৰ্যকালত দলৰ পৰা পোৱা সঁহাৰি আৰু সুযোগৰ বাবে তেওঁ গভীৰ কৃতজ্ঞতা ব্যক্ত কৰে।

আনোৱাৰ হুছেইনে উল্লেখ কৰে, ব্যক্তিগত পৰিস্থিতিৰ বাবে আগলৈ দললৈ সময় দি আগবঢ়িব পৰা নাই। সেই বাবে তেওঁ জিলা সভাপতিৰ পদৰ লগতে এআইইউডিএফৰ প্ৰাথমিক সদস্য পদৰ পৰা পদত্যাগৰ সিদ্ধান্ত লৈছে।

আনোৱাৰ হুছেইনে দলীয় নেতৃত্বক অনুৰোধ জনাইছে যে তেওঁৰ পদত্যাগ পত্ৰ গ্ৰহণ কৰি উপকৃত কৰিব।

হিন্দুস্থান সমাচাৰ / কিশোৰ মিশ্ৰ