নতুন দিল্লী, ১১ অক্টোবৰ (হি.স.)। ৰাজ্যসভাৰ উপ সভাপতি হৰিৱংশে কয় যে জলবায়ু পৰিৱৰ্তন হৈছে এক বাস্তৱতা যিয়ে আমাৰ সকলোকে প্ৰভাৱিত কৰে। এনে সময়ত সেউজ বৃদ্ধি আমাৰ সমূহীয়া ভৱিষ্যত। ইয়াক লাভ কৰিবলৈ আমাৰ বাবে ইজনে সিজনৰ লগত সহযোগিতা আৰু অংশীদাৰিত্ব কৰাটো গুৰুত্বপূৰ্ণ। আমি গ্ল’বেল চাউথৰ আমাৰ বন্ধুসকলৰ সৈতেও থিয় দিব লাগিব, বিশেষকৈ সৰু সৰু দ্বীপ উন্নয়নশীল ৰাষ্ট্ৰসমূহৰ সৈতে, যিসকলে জলবায়ু পৰিৱৰ্তন আৰু ইয়াৰ প্ৰভাৱ তেওঁলোকৰ সমাজত আটাইতকৈ বিৰূপ প্ৰভাৱৰ সন্মুখীন হৈছে। আনকি সাগৰৰ জলপৃষ্ঠ বৃদ্ধিৰ ফলত তেওঁলোকৰ অস্তিত্বৰ প্ৰতিও ভাবুকি আহি পৰিছে। কমনৱেলথ পৰিয়ালৰ এক তৃতীয়াংশ গঠন কৰা এই ক্ষুদ্ৰ দেশসমূহে সন্মুখীন হোৱা প্ৰত্যাহ্বানসমূহৰ বিষয়ে ভাৰত সম্পূৰ্ণৰূপে সচেতন। এই দেশসমূহৰ সৈতে ভাৰতে সেউজ বৃদ্ধি আৰু বহনক্ষম উন্নয়নৰ ওপৰত বিশেষ গুৰুত্ব আৰোপ কৰি কাম কৰি আছে।

বাৰ্বাডোছৰ ব্ৰীজটাউনত অনুষ্ঠিত ৬৮ সংখ্যক কমনৱেলথ কনফাৰেন্স অৱ পাৰ্টিছ (চিঅ’পি২০)ৰ সময়ত চিপিএৰ সাধাৰণ পৰিষদৰ চৰ্চাত ভাষণ দি উপ-সভাপতি হৰিবংশে জলবায়ু প্ৰত্যাহ্বানৰ প্ৰেক্ষাপটত গ্ল’বেল চাউথৰ সৈতে সংহতিৰ গুৰুত্বৰ বিষয়ে কয় আৰু কমনৱেলথৰ সৈতে বিশেষকৈ দ্বীপ ৰাষ্ট্ৰৰ সৈতে জলবায়ু আৰু শক্তিৰ বিষয়সমূহৰ বাবে ভাৰতৰ দৃষ্টিভংগীৰ ৰূপৰেখা দাঙি ধৰে। সকলোৰে বাবে নবীকৰণযোগ্য শক্তিৰ প্ৰসাৰৰ বাবে আন্তঃৰাষ্ট্ৰীয় সৌৰ মিত্ৰতা স্থাপনৰ ক্ষেত্ৰত ভাৰতে লোৱা পদক্ষেপৰ বিষয়েও তেওঁ আলোচনা কৰে। হৰিবংশে ক’ভিড-১৯ মহামাৰীৰ সময়ত ১০০ খনতকৈও অধিক দেশলৈ ঔষধ আৰু ভেকচিন যোগান ধৰাৰ ক্ষেত্ৰত ভাৰতৰ অৱদানৰ কথাও স্মৰণ কৰে। তেওঁ ভাৰতীয় কাৰিকৰী আৰু অৰ্থনৈতিক সহযোগিতা কাৰ্যসূচীৰ অধীনত সামৰ্থ্য বিকাশৰ পদক্ষেপসমূহৰ ওপৰতো আলোকপাত কৰে যিয়ে বহু কমনৱেলথ দেশক উপকৃত কৰিছে। এই কাৰ্যসূচীয়ে এতিয়ালৈকে ১৬০খনতকৈও অধিক দেশৰ ২ লাখৰো অধিক বিষয়াক অসামৰিক আৰু প্ৰতিৰক্ষা দুয়োটা খণ্ডতে প্ৰশিক্ষণ দিছে। ২০১৪ চনৰ পৰা ভাৰতে প্ৰিমিয়াৰ প্ৰতিষ্ঠানসমূহত প্ৰায় এক লাখ উচ্চ পৰ্যায়ৰ সামৰ্থ্য বিকাশৰ প্ৰশিক্ষণ আৰু বৃত্তি প্ৰদান কৰিছে।

ভাৰতীয় প্ৰতিনিধি দলটোৰ নেতৃত্ব দিছে লোকসভাৰ অধ্যক্ষ ওম বিৰলাই। উপ সভাপতিৰ লগত উপস্থিত থাকে ড° ডি পুৰন্দেশ্বৰী, ড° কে সুধাকৰ, ড° অজিত গোপচাদে, ডি ৰেখা শৰ্মা, আৰু বিভিন্ন ৰাজ্যৰ সংশ্লিষ্ট বিষয়ববীয়াসকল। লোকসভা আৰু ৰাজ্যসভাৰ সচিব প্ৰধান সচিবসকলো এই প্ৰতিনিধি দলৰ অংশ আছিল।

हिन्दुस्थान समाचार / অৰৱিন্দ