নতুন দিল্লী, ০১ অক্টোবৰ (হি.স.)। দিল্লীৰ মুখ্যমন্ত্ৰী ৰেখা গুপ্তাই কয় যে আজি, ৰাষ্ট্ৰীয় স্বয়ংসেৱক সংঘৰ শতবাৰ্ষিকী উদযাপনত, আৰএছএছৰ ১০০ বছৰীয়া ৰাষ্ট্ৰ সেৱাক সন্মান জনাই বিশেষ ডাক টিকট আৰু স্মৃতি মুদ্ৰা মুকলি কৰাটো সকলো দেশপ্ৰেমিকৰ বাবে এক ঐতিহাসিক মুহূৰ্ত।

মুখ্যমন্ত্রীয়ে এক্স-পোষ্টত উল্লেখ কৰে যে ড০ হেডগেৱাৰে স্থাপন কৰা ভেটিৰ পৰা আৰম্ভ কৰি বৰ্তমানৰ সৰসংঘচালক ডা০ মোহন ভাগৱতলৈকে সকলোৱে ৰাষ্ট্ৰ-নিৰ্মাণৰ ক্ষেত্ৰত অমূল্য অৱদান আগবঢ়াইছে। আৰ এছ এছৰ মূলমন্ত্ৰ হৈছে অনুশাসন, নিষ্ঠা, আৰু মাতৃভূমিৰ প্ৰতি নিস্বাৰ্থ সেৱা বুলিও তেওঁ উল্লেখ কৰে। আৰ এছ এছৰ স্বেচ্ছাসেৱকসকল কেৱল সাংগঠনিক কামত সীমাবদ্ধ নহয়, বৰঞ্চ ভাৰতৰ সংস্কৃতি, পৰম্পৰা, সামাজিক সম্প্ৰীতি জনসাধাৰণৰ মাজলৈ বিয়পাই দিয়াত অগ্ৰণী ভূমিকা পালন কৰে।

মুখ্যমন্ত্ৰীয়ে কয় যে জৰুৰীকালীন অৱস্থাৰ দৰে সময়তো আৰ এছ এছে গণতন্ত্ৰৰ সজাগ প্ৰহৰী হিচাপে কাম কৰিছিল। অতি কঠিন প্ৰাকৃতিক দুৰ্যোগ আৰু সংকটৰ সময়তো আৰ এছ এছৰ স্বেচ্ছাসেৱকসকলে নিস্বাৰ্থভাৱে সমাজৰ সেৱা কৰে। আজি আমি উন্নত ভাৰতৰ দিশে আগবাঢ়ি যোৱাৰ সময়ত আৰ এছ এছ আৰু ইয়াৰ লাখ লাখ নিষ্ঠাৱান স্বেচ্ছাসেৱকে ইয়াৰ বাবে দৃষ্টান্তমূলক অৱদান আগবঢ়াইছে।

সংঘৰ ১০০ বছৰৰ গৌৰৱময় যাত্ৰাৰ স্মৃতিত ভাৰত চৰকাৰে বিশেষ ডাক টিকট আৰু স্মৃতি মুদ্ৰা মুকলি কৰাৰ বাবে প্ৰধানমন্ত্ৰী মোডীক অভিনন্দন জনোৱাৰ লগতে ৰাষ্ট্ৰীয় সেৱাৰ প্ৰতি উৎসৰ্গিত সংঘৰ স্বেচ্ছাসেৱকসকললৈ শুভেচ্ছা জ্ঞাপন কৰে।

উল্লেখযোগ্য যে আজি দিল্লীৰ ড০ আম্বেদকাৰ আন্তঃৰাষ্ট্ৰীয় কেন্দ্ৰত কেন্দ্ৰীয় সাংস্কৃতিক মন্ত্ৰালয়ৰ কাৰ্যসূচীত প্ৰধানমন্ত্ৰীয়ে ৰাষ্ট্ৰীয় স্বয়ংসেৱক সংঘৰ ৰাষ্ট্ৰ নিৰ্মাণত অৱদানৰ ওপৰত বিশেষ ডাক টিকট আৰু ১০০ টকাৰ স্মৃতি মুদ্ৰা মুকলি কৰে। অনুষ্ঠানত আৰ এছ এছৰ সাহকাৰ্যৱাহ দত্তত্ৰেয় হোছাবালে, কেন্দ্ৰীয় সাংস্কৃতিক আৰু পৰ্যটন মন্ত্ৰী গজেন্দ্ৰ সিং শ্বেখাৱট আৰু মুখ্যমন্ত্ৰী ৰেখা গুপ্তা উপস্থিত থাকে।

हिन्दुस्थान समाचार / মনোজ কুমাৰ শইকীয়া