শিৱসাগৰ, ০২ ছেপ্তেম্বৰ (হি.স.): শিৱসাগৰ জিলাৰ বৰচিলা মথাউৰি নিৰ্মাণৰ স্থায়ী সমাধান নোহোৱাৰ ফল ভুগিছে সাধাৰণ ৰাইজে । আমগুৰি ৰাজহ চক্ৰৰ অন্তৰ্গত বৰচিলা নৈৰ মথাউৰিৰ এটা অংশ ১৯ জুলাইতেই প্ৰলয়ংকাৰী বানে ভাঙি নিয়াৰ পিছতেই বহুকেইখন গাঁও জলমগ্ন হৈ পৰিছিল । পিছে আজি পৰ্যন্ত নিৰ্মাণ কৰা নাই এই বৰচিলা মথাউৰিটো ।

এজাক সামান্য বৰষুণ আহিলেই জীয়াতু ভুগিব লাগে বহু কেইখন গাঁৱৰ লোকসকলে । বৰচিলা নৈৰ মথাউৰিটো বিজ্ঞানসন্মত ভাৱে নিৰ্মাণ কৰি ৰাইজৰ এক বৃহৎ সমস্যাৰ পৰা পৰিত্ৰাণ দিবলৈ ৰাইজ তথা তাই আহোম ছাত্ৰ সন্থাই বিভাগীয় কৰ্তৃপক্ষলৈ আহ্বান জনাইছে । অন্যথা তাই আহোম ছাত্ৰ সন্থাই ৰাইজৰ সহযোগত প্ৰতিবাদী কাৰ্যসূচী লোৱাৰ হুংকাৰ প্ৰদান কৰিছে ।

হিন্দুস্থান সমাচাৰ / কিশোৰ মিশ্ৰ