ব্ৰীজটাউন, ১২ ছেপ্টেম্বৰ (হি.স.)। ভাৰতীয় বেটছমেন হৰ্লিন দেওলে মহিলা কেৰিবিয়ান প্ৰিমিয়াৰ লীগ (ডব্লিউ চি পি এল) ২০২৬ৰ বাকী অংশৰ বাবে ডিফেণ্ডিং চেম্পিয়ন বাৰ্বাডোছ ট্ৰাইডেণ্টছৰ সৈতে যোগদান কৰিছে। এইবাৰ মহিলা কেৰিবিয়ান প্ৰিমিয়াৰ লীগত খেলিব। বাৰ্বাডোছত উপস্থিত হোৱা হৰ্লিন দলটোৰ পঞ্চমজন বিদেশী খেলুৱৈ হ’ব।

২৮ বছৰীয়া হৰ্লিন বৰ্তমান ভাৰতৰ ছিনিয়ৰ বা ইণ্ডিয়া ‘এ’ দলৰ অংশ নহয়। সেই হিচাপে তেওঁ গোটেই প্ৰতিযোগিতাখন বাৰ্বাডোছ ট্ৰাইডেণ্টছৰ সৈতে থাকিব। হাৰ্লিনৰ সংযোজনে ২০২৬ চনৰ মহিলা কেৰিবিয়ান প্ৰিমিয়াৰ লীগত ভাৰতীয় খেলুৱৈৰ উপস্থিতি আৰু অধিক শক্তিশালী কৰি তুলিছে। প্ৰতিযোগিতাখনত উপলব্ধ ২০টা বহিঃৰাজ্যৰ খেলুৱৈৰ স্থানৰ ভিতৰত পাঁচটা স্থান এতিয়া ভাৰতীয় খেলুৱৈয়ে দখল কৰিছে। হৰ্লিনৰ উপৰিও কিৰণ নৱগিৰে আৰু পূজা বাষ্ট্ৰকাৰ বাৰ্বাডোছ ট্ৰাইডেণ্টছৰ অংশ হোৱাৰ বিপৰীতে শিখা পাণ্ডে আৰু যস্তিকা ভাটিয়াই ট্ৰিনবাগো নাইট ৰাইডাৰ্ছক প্ৰতিনিধিত্ব কৰে।

ভাৰতৰ হৈ ২৮ খন টি-২০ ইণ্টাৰনেশ্যনেল মেচ খেলিছে হৰ্লিনে। তেওঁ ২০ টা ইনিংছত ৯২.০১ ষ্ট্ৰাইক ৰেটত ৩১১ ৰান সংগ্ৰহ কৰিছে। ভাৰতৰ হৈ তেওঁৰ শেষ মেচ আছিল মাৰ্চ মাহত অষ্ট্ৰেলিয়াৰ বিৰুদ্ধে। হৰ্লিনে মহিলা প্ৰিমিয়াৰ লীগত গুজৰাট জায়েন্টছ আৰু ইউ পি ৱাৰিয়ৰ্ছৰ হৈও খেলিছে। মহিলা প্ৰিমিয়াৰ লীগৰ ২৮খন খেলত ১১৫.৬৮ ষ্ট্ৰাইক ৰেটত ৬৪৯ ৰান সংগ্ৰহ কৰিছে।

বাৰ্বাডোছ ট্ৰাইডেণ্টছে ৫ ছেপ্টেম্বৰত ট্ৰিনবাগো নাইট ৰাইডাৰ্ছৰ বিৰুদ্ধে ২১ ৰানৰ পৰাজয়ৰে খিতাপ ৰক্ষাৰ অভিযান আৰম্ভ কৰিছিল । এই সপ্তাহৰ শেষৰ ফালে দলটোৰ দুখন মেচ আছে। শনিবাৰে জামাইকা এম্প্ৰেছৰ বিৰুদ্ধে আৰু দেওবাৰে গায়ানা আমাজন ৱাৰিয়ৰ্ছৰ বিৰুদ্ধে খেলিব ।

হিন্দুস্থান সমাচাৰ / মনোজ কুমাৰ শইকীয়া