-এতিয়ালৈকে বিক্ৰী হৈছে ৮ লাখ ৯০ হাজাৰ ৫ কেজিৰ চিলিণ্ডাৰ

নতুন দিল্লী, ০৮ এপ্ৰিল (হি.স.)। পশ্চিম এছিয়াত যুদ্ধবিৰতি ঘোষণাক আদৰণি জনাই কেন্দ্ৰীয় চৰকাৰে বুধবাৰে কয় যে ইয়াৰ দ্বাৰা অঞ্চলটোত স্থায়ী শান্তি আহিব। চৰকাৰে উল্লেখ কৰে যে দেশত পেট্ৰ’ল-ডিজেলৰ যোগান সুস্থিৰ। তেল শোধনাগাৰসমূহে পৰ্যাপ্ত খাৰুৱা তেলৰ সৈতে সম্পূৰ্ণ ক্ষমতাৰে কাম কৰি আছে, আৰু ২৩ মাৰ্চৰ পৰা প্ৰায় ৮ লাখ ৯০ হাজাৰ ৫ কিলোগ্ৰাম ওজনৰ চিলিণ্ডাৰ বিক্ৰী হৈছে । কয়লা ভিত্তিক শক্তিয়ে দেশৰ শক্তিৰ প্ৰয়োজনীয়তাৰ প্ৰায় ৭০% পূৰণ কৰি আহিছে।

পেট্ৰলিয়াম আৰু প্ৰাকৃতিক গেছ মন্ত্ৰালয়ৰ যুটীয়া সচিব (বিপণন আৰু তেল শোধনাগাৰ) সুজাতা শৰ্মাই আন্তঃমন্ত্ৰালয়ৰ সংবাদমেল সম্বোধন কৰি এই তথ্য প্ৰদান কৰে । শৰ্মাই কয় যে বিগত পাঁচ দিনত তেল বিপণন কোম্পানীসমূহে প্ৰায় ১৬০০ সজাগতা শিবিৰৰ আয়োজন কৰিছে, প্ৰায় ১৪ হাজাৰ চিলিণ্ডাৰ বিতৰণ কৰিছে । কালি প্ৰায় ১১ লাখ গেছ চিলিণ্ডাৰ যোগান ধৰাৰ ফলত ২৩ মাৰ্চৰ পৰা পাঁচ কিলোগ্ৰাম ওজনৰ চিলিণ্ডাৰৰ মুঠ বিক্ৰী প্ৰায় ৮.৯ লাখ হৈছে বুলিও তেওঁ উল্লেখ কৰে।

তেওঁ কয় যে ঘৰুৱা প্ৰয়োজনীয়তাক অগ্ৰাধিকাৰ দিয়া হৈছে, সাৰ উদ্যোগসমূহে গেছ যোগানৰ প্ৰায় ৯৫% লাভ কৰিছে। পেট্ৰ’ল আৰু ডিজেলৰ যোগান সুস্থিৰ আৰু ক’তো নাটনি হোৱা নাই কাৰণ শোধনাগাৰসমূহে পৰ্যাপ্ত খাৰুৱা তেলৰ সৈতে সম্পূৰ্ণ ক্ষমতাৰে কাম কৰি আছে। শৰ্মাই উল্লেখ কৰে যে চৰকাৰে যোগান বৃদ্ধিৰ বাবে চি ৩ আৰু চি ৪ ষ্ট্ৰিমক এল পি জি পুলত ডাইভাৰচন কৰাৰ নিৰ্দেশ দিছে, একে সময়তে পেট্ৰ’কেমিকেলৰ সীমিত ব্যৱহাৰৰ অনুমতি দিছে ।

সুজাতা শৰ্মাই উল্লেখ কৰে যে প্ৰাকৃতিক গেছৰ সন্দৰ্ভত ঘৰুৱা গ্ৰাহকক অগ্ৰাধিকাৰ দিয়া হৈছে আৰু তেওঁলোকৰ যোগান নিশ্চিত কৰা হৈছে। ইয়াৰ উপৰিও উদ্যোগসমূহলৈ প্ৰাকৃতিক গেছৰ যোগানো পুনৰ আৰম্ভ কৰা হৈছে। ৰাজ্যিক চিবিজি নীতিৰ খচৰা প্ৰকাশ কৰা হৈছে, আৰু এই নীতি গ্ৰহণ কৰা ৰাজ্যসমূহে অতিৰিক্ত বাণিজ্যিক এলপিজি আবণ্টনত অগ্ৰাধিকাৰ লাভ কৰিব। ভাৰত চৰকাৰে সকলো ৰাজ্য চৰকাৰ আৰু কেন্দ্ৰীয় শাসিত অঞ্চললৈ পত্ৰ প্ৰেৰণ কৰি অগ্ৰাধিকাৰ বাণিজ্যিক এল পি জি যোগানৰ সুবিধাৰ বাবে সংস্কাৰ ৰূপায়ণ কৰিবলৈ অনুৰোধ জনাইছে। প্ৰায় ১৮খন ৰাজ্যই পদক্ষেপ গ্ৰহণ কৰিছে আৰু অতিৰিক্ত এলপিজি আবণ্টন দিয়া হৈছে।

পেট্ৰলিয়াম আৰু প্ৰাকৃতিক গেছ মন্ত্ৰালয়ৰ যুটীয়া সচিবে কয় যে মাৰ্চ মাহৰ পৰা প্ৰায় ৩ লাখ ৮৭ হাজাৰ পিএনজি সংযোগ প্ৰদান কৰা হৈছে আৰু প্ৰায় ৪ লাখ ২১ হাজাৰ নতুন গ্ৰাহকে পঞ্জীয়ন কৰিছে। এল পি জি আৰু পি এন জি দুয়োটা সংযোগ থকা গ্ৰাহকক তেওঁলোকৰ এল পি জি সংযোগ আত্মসমৰ্পণ কৰিবলৈ অনুৰোধ জনোৱা হৈছে। তেওঁ উল্লেখ কৰে যে এতিয়ালৈকে ১৭ হাজাৰতকৈ অধিক গ্ৰাহকে নিজৰ এল পি জি সংযোগ আত্মসমৰ্পণ কৰিছে। লগতে সকলো নাগৰিককে উৰাবাতৰি আওকাণ কৰি প্ৰয়োজন সাপেক্ষেহে ইন্ধন ক্ৰয় কৰিবলৈ আহ্বান জনায়।

শৰ্মাই উল্লেখ কৰে যে অনিয়ম ৰোধৰ বাবে চোৰাংচোৱাগিৰি বৃদ্ধি কৰা হৈছে। শেহতীয়াকৈ প্ৰায় ৪ হাজাৰ অভিযান চলোৱা হৈছে, আৰু যোৱা কেইদিনমানত প্ৰায় ৫৬ হাজাৰ চিলিণ্ডাৰ জব্দ কৰা হৈছে। তেল বিপণন কোম্পানীয়ে ১৭৭০টা কাৰণ দেখুৱাই জাননী জাৰি কৰিছে, ৫১জন বিতৰকক নিলম্বন কৰিছে, আন ১৭৫ জনৰ বিৰুদ্ধে ব্যৱস্থা গ্ৰহণ কৰিছে। পেট্ৰ’ল, ডিজেল, এল পি জিৰ যোগান নিৰৱচ্ছিন্ন হৈ আছে। নাগৰিকসকলক আতংকিত নহ’বলৈ আৰু কেৱল চৰকাৰী তথ্যৰ ওপৰত নিৰ্ভৰ কৰিবলৈ পৰামৰ্শ দিয়া হৈছে।

যুদ্ধবিৰতি আদৰণি জনোৱা হৈছে: বৈদেশিক পৰিক্ৰমা মন্ত্ৰালয়

এম ই এৰ মুখপাত্ৰ ৰণধীৰ জয়ছৱালে ইৰাণ আৰু আমেৰিকাৰ মাজত যুদ্ধবিৰতিক আদৰণি জনাই পশ্চিম এছিয়াত স্থায়ী শান্তি কঢ়িয়াই আনিব বুলি আশা প্ৰকাশ কৰে। তেওঁ কয় যে সংঘাতৰ অতি সোনকালে অন্ত পেলাবলৈ ডি-এস্কেলেচন, আলোচনা, আৰু কূটনীতি অতি প্ৰয়োজনীয়। এই সংঘাতে ইতিমধ্যে জনসাধাৰণৰ বাবে অপৰিসীম দুখ-কষ্টৰ সন্মুখীন হোৱাৰ লগতে বিশ্বজুৰি শক্তি যোগান আৰু বাণিজ্যিক নেটৱৰ্কত ব্যাঘাত জন্মাইছে। জয়ছৱালে হৰমুজ জলদ্বীপৰ মাজেৰে যাতায়তৰ সম্পূৰ্ণ স্বাধীনতা আৰু বাণিজ্যৰ প্ৰবাহ বজাই ৰখাৰ আশা প্ৰকাশ কৰে। তেওঁ উল্লেখ কৰে যে ভাৰতে শান্তি আৰু স্থিতিশীলতাত অৰিহণা যোগোৱা সকলো পদক্ষেপক আদৰণি জনায়। তেওঁ আশা প্ৰকাশ কৰে যে পশ্চিম এছিয়াৰ এই উন্নয়নে ইউক্ৰেইনত শান্তিৰ প্ৰচেষ্টাও বৃদ্ধি কৰিব।

ভাৰতৰ খনি আৰু বিদ্যুৎ কেন্দ্ৰসমূহত পৰ্যাপ্ত পৰিমাণৰ কয়লাৰ মজুত আছে। ইফালে কয়লা মন্ত্ৰালয়ৰ যুটীয়া সচিব সঞ্জীৱ কুমাৰ কাছিয়ে সাংবাদিকক সম্বোধন কৰি কয় যে খনি, বিদ্যুৎ কেন্দ্ৰ, বন্দৰ আৰু ট্ৰেনজিটত পৰ্যাপ্ত পৰিমাণৰ কয়লাৰ মজুত উপলব্ধ, যিটো অতি কম সময়ৰ ভিতৰতে গ্ৰাহকৰ বাবে উপলব্ধ কৰিব পৰা যাব। তেওঁ উল্লেখ কৰে যে আমি বিদ্যুৎ উৎপাদনৰ কোনো নাটনিৰ সন্মুখীন হোৱা নাই আৰু ইয়াৰ ব্যৱহাৰৰ দৰে একে গতিৰে কয়লা উৎপাদন কৰি আছো।

তেওঁ দাবী কৰে যে ভাৰতত বৰ্তমান খনি আৰু বিদ্যুৎ কেন্দ্ৰত পৰ্যাপ্ত পৰিমাণৰ কয়লাৰ মজুত আছে, যাৰ ফলত কম সময়ৰ ভিতৰতেও গ্ৰাহকক যোগান ধৰাৰ ব্যৱস্থা নিশ্চিত কৰা হৈছে। কয়লা উৎপাদন খৰচৰ মাত্ৰাৰ লগত খোজ মিলাই চলি থকাৰ বাবে বিদ্যুৎ উৎপাদন ক্ষমতাৰ অভাৱ নহয়।

তেওঁ কয় যে কয়লা ভিত্তিক শক্তিয়ে দেশৰ শক্তিৰ প্ৰায় ৭০% প্ৰয়োজনীয়তা পূৰণ কৰি আহিছে। সমন্বিত প্ৰচেষ্টাৰ জৰিয়তে ভাৰতে কয়লাৰ সুলভ আৰু পৰ্যাপ্ত যোগান বজাই ৰাখি একেৰাহে দ্বিতীয় বছৰৰ বাবে ১ বিলিয়ন টন কয়লা উৎপাদনৰ লক্ষ্যত উপনীত হৈছে।

हिन्दुस्थान समाचार / মনোজ কুমাৰ শইকীয়া