নতুন দিল্লী, ০৩ মাৰ্চ (হি.স.)। ভাৰতে পশ্চিম এছিয়াত ক্ৰমবৰ্ধমান সংঘাতক লৈ গভীৰ উদ্বেগ প্ৰকাশ কৰি আলোচনা আৰু কূটনীতিৰ ওপৰত পুনৰবাৰ গুৰুত্ব আৰোপ কৰিছে। ভাৰতে এই সংঘাতৰ আগতীয়া অন্ত পেলোৱাটো নিৰ্দ্বিধায় সমৰ্থন কৰে বুলি উল্লেখ কৰিছে। দুৰ্ভাগ্যজনকভাৱে ইতিমধ্যে বহু লোকৰ প্ৰাণ হেৰাই গৈছে, আৰু আমি এই সন্দৰ্ভত গভীৰ শোক প্ৰকাশ কৰিছো ।

এক প্ৰশ্নৰ উত্তৰত বৈদেশিক পৰিক্ৰমা মন্ত্ৰালয়ৰ চৰকাৰী মুখপাত্ৰ ৰণধীৰ জয়ছোৱালে কয় যে চৰকাৰে সাম্প্ৰতিক পৰিস্থিতিৰ ওপৰত তীক্ষ্ণ দৃষ্টি ৰাখিছে আৰু ৰাষ্ট্ৰীয় স্বাৰ্থত সকলো উপযুক্ত সিদ্ধান্ত গ্ৰহণ কৰিব। অঞ্চলটোৰ চৰকাৰসমূহৰ লগতে অন্যান্য গুৰুত্বপূৰ্ণ অংশীদাৰসকলৰ সৈতেও চৰকাৰৰ যোগাযোগ আছে। প্ৰধানমন্ত্ৰী আৰু বৈদেশিক মন্ত্ৰীয়ে সমকক্ষৰ সৈতে আলোচনাত মিলিত হৈছে ।

ভাৰতে গভীৰ উদ্বেগ প্ৰকাশ কৰিছে যে এই সংঘাতে বাণিজ্য আৰু শক্তি যোগান শৃংখলত ব্যাঘাত জন্মাব পৰা সম্ভাৱনা আছে। ইয়াৰ ফলত ভাৰতীয় অৰ্থনীতিৰ বাবে ভয়াৱহ পৰিণতি হ’ব পাৰে। বিশ্বৰ কৰ্মশক্তিত ভাৰতীয়সকলে মূল ভূমিকা পালন কৰে। সেয়েহে ভাৰতে বণিক জাহাজত আক্ৰমণৰ তীব্ৰ বিৰোধিতা কৰে। বিগত কিছুদিনত এনেধৰণৰ আক্ৰমণৰ ফলত একাংশ ভাৰতীয় নাগৰিকে প্ৰাণ হেৰুৱাইছে বা নিৰুদ্দেশ হৈছে।

মুখপাত্ৰগৰাকীয়ে উল্লেখ কৰে যে ক্ষতিগ্ৰস্ত দেশসমূহত থকা ভাৰতীয় দূতাবাস আৰু কনছুলেটসমূহে ভাৰতীয় নাগৰিক আৰু সম্প্ৰদায়ৰ সংগঠনসমূহৰ সৈতে অহৰহ যোগাযোগত আছে আৰু প্ৰয়োজন অনুসৰি নিয়মিতভাৱে পৰামৰ্শ জাৰি কৰি আছে। সংঘাতত আবদ্ধ হৈ পৰাসকলকো সম্ভৱপৰ সকলো সহায় আগবঢ়াইছে। এই সংঘাতৰ বিভিন্ন কনছুলাৰ দিশ সমাধানৰ ক্ষেত্ৰত দূতাবাস আৰু কনছুলেটসমূহে সক্ৰিয় ভূমিকা গ্ৰহণ কৰি যাব।

বিবৃতিটোত কোৱা হৈছে যে ২৮ ফেব্ৰুৱাৰীত ইৰাণ আৰু উপসাগৰীয় অঞ্চলত সংঘাত আৰম্ভ হোৱাৰ লগে লগে ভাৰতে সকলো পক্ষকে সংযম ৰক্ষা কৰিবলৈ, তীব্ৰতৰ বৃদ্ধিৰ পৰা হাত সাৰিবলৈ, সাধাৰণ নাগৰিকৰ সুৰক্ষাক অগ্ৰাধিকাৰ দিবলৈ আহ্বান জনাইছিল। কিন্তু দুৰ্ভাগ্যজনকভাৱে পবিত্ৰ ৰমজান মাহত অঞ্চলটোৰ পৰিস্থিতি ক্ৰমান্বয়ে ভয়াৱহ হৈ পৰিছে।

বিবৃতিটোত কোৱা হৈছে যে, শেহতীয়া দিনবোৰত আমি কেৱল সংঘাতৰ তীব্ৰতা বৃদ্ধি হোৱাই নহয়, ইয়াৰ বিয়পি আন দেশলৈও দেখা পাইছো। ধ্বংস আৰু মৃত্যুৰ সংখ্যা বৃদ্ধি পাইছে, আনহাতে স্বাভাৱিক জীৱন আৰু অৰ্থনৈতিক কাৰ্যকলাপ স্থবিৰ হৈ পৰিছে। অঞ্চলটোৰ নিৰাপত্তা আৰু স্থিতিশীলতাৰ ক্ষেত্ৰত গুৰুত্বপূৰ্ণ ভূমিকা গ্ৰহণ কৰা ঘনিষ্ঠ প্ৰতিবেশী হিচাপে এই উন্নয়নসমূহ অত্যন্ত চিন্তনীয়।

মুখপাত্ৰগৰাকীয়ে কয় যে উপসাগৰীয় অঞ্চলত প্ৰায় এক কোটি ভাৰতীয় লোকে বাস কৰে আৰু কাম কৰে। তেওঁলোকৰ সুৰক্ষা আৰু মংগল আমাৰ সৰ্বোচ্চ অগ্ৰাধিকাৰ । তেওঁলোকৰ ওপৰত নেতিবাচক প্ৰভাৱ পেলোৱা কোনো ধৰণৰ উন্নয়নৰ প্ৰতি আমি অৱহেলিত থাকিব নোৱাৰো ।’

हिन्दुस्थान समाचार / মনোজ কুমাৰ শইকীয়া