কাঠমাণ্ডু, ০৫ ডিচেম্বৰ (হি.স.)। নেপালৰ সংসদীয় নিৰ্বাচন অহা বছৰৰ মাৰ্চ মাহত হ’ব, আৰু মাত্ৰ ৯০ দিন বাকী থকা অৱস্থাত প্ৰস্তুতি দ্ৰুতগতিত আগবাঢ়িছে। নিৰ্বাচন আয়োগে নিজৰ কাৰ্যকলাপ তীব্ৰতৰ কৰাৰ বিপৰীতে ৰাজনৈতিক দলসমূহেও সক্ৰিয়ভাৱে আভ্যন্তৰীণ কাৰ্য্য পৰিকল্পনা প্ৰস্তুত কৰিছে।
আয়োগৰ মুখপাত্ৰ নাৰায়ণ প্ৰসাদ ভট্টৰাইৰ মতে, অহা ৬ ডিচেম্বৰৰ পৰা আয়োগে আনুপাতিক নিৰ্বাচনী ব্যৱস্থাৰ কাৰ্যসূচী ৰূপায়ণ কৰিব। নিৰ্ধাৰিত সময় অনুসৰি ৰাজনৈতিক দলসমূহে আনুপাতিক নিৰ্বাচনী ব্যৱস্থাৰ বাবে পুৱা ১০ বজাৰ পৰা বিয়লি ৪:০০ বজাৰ ভিতৰত আবেদন দাখিল কৰিব লাগিব। আবেদনকাৰী পক্ষৰ তালিকা ১০ ডিচেম্বৰত প্ৰকাশ কৰা হ’ব। আবেদনকাৰীয়ে ২৮ আৰু ২৯ ডিচেম্বৰত, পুৱা ১০:০০ বজাৰ পৰা বিয়লি ৪:০০ বজাৰ ভিতৰত তেওঁলোকৰ বন্ধ তালিকা দাখিল কৰিব পাৰিব। ১৩ ফেব্ৰুৱাৰীত আনুপাতিক প্ৰতিনিধিত্বৰ বাবে চূড়ান্ত তালিকা প্ৰকাশ কৰা হ’ব।
প্ৰত্যক্ষ নিৰ্বাচনী কাৰ্যসূচীৰ অধীনত ২০ জানুৱাৰীত প্ৰাৰ্থীৰ মনোনয়ন দাখিল কৰা হ’ব, আৰু সেইদিনা মনোনীত প্ৰাৰ্থীৰ তালিকা প্ৰকাশ কৰা হ’ব। মনোনয়নৰ বিৰুদ্ধে অভিযোগ ২১ জানুৱাৰীত দাখিল কৰিব পাৰিব। ২২ জানুৱাৰীত প্ৰকাশ পাব প্ৰাৰ্থীৰ প্ৰাৰম্ভিক তালিকা। ২৩ জানুৱাৰীত প্ৰাৰ্থীসকলে মনোনয়ন প্ৰত্যাহাৰ কৰিব পাৰিব, তাৰ পিছত চূড়ান্ত তালিকা প্ৰকাশ কৰি নিৰ্বাচনী চিহ্ন আবণ্টন দিয়া হ’ব।
নিৰ্বাচনী প্ৰচাৰৰ বাবে ৩ মাৰ্চলৈকে সময় দিয়া হৈছে। ৩ মাৰ্চৰ সন্ধিয়া ৫ বজাৰ পৰা আৰম্ভ হ’ব মৌনতা। ৫ মাৰ্চৰ পুৱা ৭ বজাৰ পৰা ভোটগ্ৰহণ আৰম্ভ হ’ব, আৰু সন্ধিয়া ৭ বজালৈকে ভোটদান প্ৰক্ৰিয়া চলি থাকিব। নিৰ্বাচন আয়োগৰ মতে, ভোটদানৰ পিছত জিলা সদৰত অৱস্থিত গণনা কেন্দ্ৰত সকলো বেলট বাকচ সংগ্ৰহ কৰা হ’ব, আৰু তাৰ লগে লগে গণনা আৰম্ভ হ’ব।
হিন্দুস্থান সমাচাৰ / মনোজ কুমাৰ শইকীয়া
