ধুবুৰী, ০১ জুন (হি স)। ধুবুৰী জিলাৰ দক্ষিণ শালমাৰা সমষ্টি আৰু জলেশ্বৰ সমষ্টিৰ সীমান্তৱৰ্তী অঞ্চল কুশবাৰীত ব্ৰহ্মপুত্ৰ নদীৰ গৰাখহনীয়াই ভয়ংকৰ ৰূপ ধাৰণ কৰিছে ৷ অঞ্চলবাসী ৰাইজে সম্প্ৰতি ভীতিগ্ৰস্থ হৈ পৰা পৰিলক্ষিত হৈছে ৷

খহনীয়াৰ ভয়াৱহতাৰ বাবেই কুশবাৰী অঞ্চলৰ ৰাইজে আপোন ঘৰ খন ভাঙি নিৰাপদ স্থানলৈ স্থানান্তৰ কৰাত ব্যস্ত হৈ পৰিছে ৷ কুইশবাৰী অঞ্চলৰ ১১৯ নং অঙ্গনবাড়ী কেন্দ্ৰ খনটোও ৰাইজে আঁতৰাই নিয়ে ৷ যোৱা দুই মাহৰ ভিতৰতে উক্ত অঞ্চলৰ সুন্দৰপাৰা গাওঁ পঞ্চায়ত খন সম্পূৰ্ণৰূপে ব্ৰহ্মপুত্ৰৰ বুকুত বিলিন হৈ যোৱাৰ লগতে নস্কৰা গাওঁ পঞ্চায়তৰ বহু কেইটা গাওঁ ব্ৰহ্মপুত্ৰৰ বুকুত বিলিন হৈ গৈছে ৷ যোৱা কেইদিন ধৰি ব্ৰহ্মপুত্ৰৰ গৰাখহনীয়াই ভয়ংকৰ ৰূপ ধাৰণ কৰি এটাৰ পিছত আন এটাকৈ বাসগৃহ ভাঙি লৈছে ব্ৰহ্মপুত্ৰৰ বুকুত আৰু ভিতিগ্ৰস্ত হৈ পৰিছে অঞ্চলবাসীসকল ৷ কুশবাৰী অঞ্চলৰ একমাত্ৰ ঐতিহাসিক শিক্ষা প্ৰতিষ্ঠান কুশবাৰী হাই স্কুলখন ইতিমধ্যে ব্ৰহ্মপুত্ৰৰ বুকুত বিলিন হৈ যোৱাত উক্ত অঞ্চলৰ ছাত্ৰ-ছাত্ৰীৰ জীৱনলৈ নামি আহিছে অনিশ্চয়তা ৷

দক্ষিণ শালমাৰা আৰু জলেশ্বৰ সমষ্টিৰ সীমান্তৱৰ্তী অঞ্চলটোত গৰাখহনীয়া প্ৰতিৰোধৰ ক্ষেত্ৰত কোনোধৰণৰ গুৰুত্ব নিদিয়াৰ অভিযোগ উঠিছে স্থানীয় সাংসদ- বিধায়কৰ বিৰুদ্ধে । চৰকাৰক গৰাখহনীয়া প্ৰতিৰোধৰ ব্যৱস্থা গ্ৰহণৰ দাবী জনাইছে ৰাইজে ৷

হিন্দুস্থান সমাচাৰ/প্ৰকাশ/মনোজ